تەجەشە دژو هرووژمە ئەرەگیریەکا دۆڵەتو تورکی ئەرەگیری و چەتەکاش پەی سەرو ۋەرنیشتی ڕاپیمایێش ئەنجامدا و هامبورگەنە قەرارو چالاکی و ۋێنیشاندای سەرەمڕەیش ئەرەیاۋنا.
جمېیەرو جوانا شۆڕشگێڵنی (تەجەشە) شارو هامبورگو ئەڵمانیاینە جە دژو هرووژمە ئەرەگیریەکا دۆڵەتو تورکی و چەتەکاش کە ئەوەمەڼۍ داعشینۍ، پەی سەرو سەرنیشتوو ۋەرکۆتوو سوریای قەرارو چالاکی و ۋێنیشاندای سەرەمڕەیش دا. چا چوارچێوەنە هێزی وێرەگا جالاکا تەجەشەی جە چوارچێوەو چالاکی درێژخایەنینە ڕاپیمایێشا سازکەرد.
ڕاپیماکەی جە Hamburg Hauptbahnhof بە دەیەقێوە بە بێدەنگی مردای پەی یاڎو گەشمەرڎا ئازادیی کوردەسانی دەسشپنەکەرڎ و بە نامۍ تەجەشەیۆ فەرهاد مێردین قسێش کەردۍ و ئاماژەش پانەی کەرڎ پېسە جوانا ئاپۆیی جە دژو ئەرەگیریەکا سەرو ۋەرنیشتی، بە گیانو فیدایی گەشمەرڎا ئاسیۍ و رۆژگەری چالاکی مکەرا و داواو پارێزنای ۋەرنیشتیش جە جوانا وڵاتپارێزنی، دیموکراتیکی و رۆشنۋیری کەرد.
دماو قسەکا کوردەسانیا و دۆسەکێشا دەسشا بە ڕاپیماکەی کەرڎ و چڼین دروشمۍ پېسە "بژیۋۆ سەرۆک ئاپۆ" و "بژیۋۆ مڎرامانوو ۋەرنیشتیشا" واتێوە. هەر جە ڕاپیماکەینە پەی بەشداری ۋێنیشانداکەی ئارۆ پەنج شەممە سەعات ١٨:٠٠ کە جە وێسگەو قیتارو هامبورگی جە چوارچێوەو ۋێنیشاندایە سەرەمڕەکانە ملۆڕاوە، بانگەوازێوە ئەرەیاۋېیا.
