فەد-کورد ئەرەیاۋناش، هەواڵگری ئەڵمانیای هەڕەشۍ ئەسایۆ مافوو مەنەیۊی جە کوردا کەرۊ و سیخوڕیشا سەرەرە سەپنۆ و ئی بانگەوازشە ئاراسەو گەلی کەرد، "بە بێ ئاماڎەبیەی پارێزنەراتا و بە بێ ئاگاڎارکەردەیۊیما حیچ چەمپنەکۊتەیۍ ئەنجام مەڎەیدۍ".
فیدراسیۆنوو کوردسانیا ئازاڎیی جە ۋەرکەوتوو ئەڵمانیای (فەد-کورد) جە ئەرەیاۋنێوەنە باسش چانەی کەردەن، "جە ۋەرکەوتوو ئەڵمانیاینە سیاسەتوو سیخوریکەردەی بە تەمامی پاش وستەن دلۍ ئاژێوە قیزەونی و چەپەڵیۆ".
'کاربەدەسێوە تورکی بە نامۍ هاکان ئاکبوڵوتی سیخوڕیکەردەی سەروو بنەیانە کوردەکارە سەپنۆ
جە ئەرەیاۋناکەینە ئامان؛
"کەسانێوە جە هەواڵگری ئەڵمانیای کە بانگەشەو ئانەی کەرا پۆلیسۍ مەڎەنیێنۍ، بە واتەی ئانەی کە 'جە بارەو شمۆ گرڎ زانیاریێوەما ئینا وەروو دەسانە، یان هەرمانە پۍ ئێمە کەردۍ و جە بارەو ڕێکوزیاو و ئەرەمەرزیا کوردیەکاوە زانیاریما پنە مڎەیدۍ، یاخوڎ ئێمە ڕا مەڎەیمۍ مافوو مەنەیۊی و هۊرگێرتەی پاسپۆرتیتا بۆ' هەڕەشۍ کەرا. بڕۍ ژەنی سەردایشا کەردیمۍ و ناڕەزایی ۋێشا پنە ئەرەیاۋنایمۍ. بڕۍ کەسۍ تەرسۍ و جە ئەڵمانیاوە بەرەو وڵاتا تەری بڕەمۍ. جە لایپزیگ و دەوروبەرشەنە، جە هالێ و سال و دەوروبەرشانە، جە فرەو شارانە و بە تایبەتیچ ئانەی جە ماگدیبورگ ڕووە مڎا مایۍ قبوڵکەردەی نییا. کارمەندێوە ژەنی کوردێوەش کە بەمەبەسوو تازەکەردەیۆ هەویەو مەنەیۊیش سەردای فەرمانگە بیانیەکاش کەردەبۍ، بەردەبێش پۍ قاتوو سەری رادەسوو ژەنێوە گەنجۍ کاربەدەسۍ و کاربەدەسێوە تورکی بە نامۍ هاکان ئاکبوڵوتی کەردەبۍ. ئاکبوڵوت پی جۆرە قسێش کەردێبێنۍ، 'مشناسمێت، هەرمانەما پۍ کەرە، کوردەکێما پۍ ئاشکرا کەرە و جە بارەشاوە زانیاریما دەپنە، کارێ کەرمۍ کە بە ئاسانی مافوو هاموڵاتیبیەی هۊرگیری'. هاکان ئاکبولوت یەرۍ ڕووۍ چا وەڵتەریچ جە ماگدیبورگ لووابۍ پۍ یانێوە کوردی و پێشنیازوو سیخوڕیش پۍ کەردێبێنۍ.
ئانڎەی مزانمێش ئانە ئاژێوە نایاساییا، کاربەدەساو ئەڵمانیایچ مزانا. جەنگی تایبەت و دەرونی کە جە دژوو کوردا جە تورکیانە کریۆ، ئەڵمانیایچەنە بەردەواما. ئێمە داوا جە کاربەدەسا ئەڵمانیای کەرمۍ؛ دەموودەس ئا ئاژەیە ڕۊشن کەراوە، نە یاساییا و نە مرۆڤانەیچا کە شمە ئا مرۆڤۍ کە بە مەڵامەتوو ستەموو دەوڵەتوو تورکیوە بڕەمێنۍ و ئامێنۍ وڵاتەکەتا، رادەسوو فشاری و چەوەسنایشاوە کەردۍ.
داوا جە گەلەکەیما کەرمۍ؛ ئەگەر دیڎاری پا جۆرە چنی شمە ئەنجام دریابۆ، نزیک تەرین ئەرەمەرزیاکا سەر بە ئێمە ئاگاڎار کەردێوە و بە بێ پارێزنەراتا چنی ئا کەسا دیڎار ئەنجام مەڎەیدۍ. ئێمە ئا ئاژەیە میاونمۍ بە دەسەڵاڎداری دادوەری و تا دمایی شۊنیرە لووای یاساییش پۍ کەرمۍ".
