یۆ جە فەرماندەکاو ئەنجومەنو سەروازیی دێرەزۆری ئەبوو لەیس ئەل خەشام داواش جە خەڵکو دێرەزۆری کەرڎ و واتش: "خەڵكو ئی هەرێمەینمۍ و پەی پارێزنای گەلەکەیما ئینایمۍ چۍ. جە دژو هرووژمەکا بیمۍ بە پارێزنەرۍ گەلەکەیما."
ئەنجومەنو سەروازی دێرەزۆر جە مېیانو شارو دێرەزۆری بە دیمەنێوە ڤیدۆیی پەیامێوەش پەی گەلوو دێرەزۆری وەڵا کەرڎۆ و جە دیمەنەکەنە فەرماندەو ئەنجومەنی سەروازی دێرەزۆری ئەبوو لەیس ئەل خەشام پەیامێوە ئاڕاسەو خەڵکو شارەکەی مکەرۆ و باس جە گرنگی ئامای دلۍ شارەکەیشا مکەرۆ پەی پارێزگاری کەردەی جە گەلی.
فەرماندە ئەل خەشام ئاماژە پانەی مکەرۆ بیەیشا جە هەرێمەکەنە پەی پارێزنای گەلەکەیشانە جە مەتەرسی چەتەکا دۆڵەتو تورکی و چەتەکا داعشی جە هەرێمەکەنە و داوا جە گەلی مکەرۆ بە حیچ جۆرۍ نەتەرسا.
ئا فەرماندە سەروازییە دەربارەو حکومەتو شامی ئینەش وات: "گرڎو هەڕەشە چەکڎاریی و نەژاڎپەرسییەکا ڕژێمی دمایشا پنە ئاما. ئێمە خەڵکو ئی ناوچەینمۍ و پەی پارېزنای گەلەکەیما ئینایمۍ چۍ. پەی دمایی ئاردەی بە ستەمو سەرو گەلەکەیما ئامێنمۍ."
هەر جە قسەکاشەنە ئەل خەشام باسش جە مەرامو هێزەکاو قەسەدەی کەرڎ و جەختش چانەی کەرڎۆ کە قەسەدە ئەرکش پارێزنای گەلین جە ۋەرا ۋەرو هرووژمەکانە و واتش: "جە دژو گرڎوو مەترسییەکا بیمۍ بە قەڵغانێوە هێقمو پارێزگاریی."
هەر دەربارەو ئاژەی تازەو دێرەزۆری، ئەنجومەنو سەروازی دێرەزۆری بە ئەرەیاۋنێوە ئاماژەش پانەی کەرڎەن جە دماو کیشیایۆ هێزەکاو حکومەتو شامی، بە مەرامو پارێزنای گەلوو دێرەزۆری، جەنگەوانەکێشا ئامێنۍ دێرەزۆر و ۋەرنیشتوو دەرەو فوراتی.
