فەرماندەو گرڎیی هێزەکا سوریای دیموکراتیکی (قەسەدە)ی مەزڵوم عەبدی سەرو پەلیانەو ۋێشۆ جە میدیای دیجیتاڵیۆ جە بارەو جەنگی جە سوریانە ئەرەیاۋنێوەش وەڵاکەردۆ. مەزڵوم عەبدی باسش چانەی کەرڎ، کە دماو ئانەی سوپاو سوریای و هامپەیمانەکێش مەڕیۍ، ئاڎۍ هەوڵشا دا ڕاڕەوۍ مرۆیی پەی پارێزنای گەلی بکەراوە.

فەرماندەی گرڎیی قەسەدەی عەبدی واتش، "هێزەکێما جە حەڵەب، تل رەفعەت و شەهبانە بە قارەمانیۆ پارێزگاری جە گەلەکەیما مکەرمۍ. بەڵام هرووژمەکۍ گروپە چەکڎارەکا سەر بە تورکیای ئا ڕاڕەوە مرۆییەیشە پڕچنا، کە ئێمە گەرەکمانە جە مابەینو هەرێمەکامانە جە ۋەرکۆت و ئا هەرێمانە سازشا بکەرمۍ".

 مەزڵوم عەبدی باسش چانەی کەرڎ، کە ئاڎۍ هەوڵ مڎا چنی گرڎو لایەنە بەشدارەکا دلۍ سوریای پەیوەندی سازبکەرا، پەی ئانەی ئاسایشو گەلی دەسەبەر بکەرا و ئاڎیشا جە تل رەفعەت و شەهباوە فاڕاوە پەی هەرێمە پارێزیاکا سەرنیشتی و ۋەرکۆتوو وڵاتەکەی.

عەبدی ئانەیچش وست ڕووە، کە هێزەکێشا جە گەڕەکە کوردیەکا حەڵەبینە مڎرامان درێژە پنەمڎا و واتش، "ئەرکی سەرەکیما ئانەنە کە پارێزگاری جە گەلەکەیما بکەرمۍ و چی قۆناغە دژوارەنە گەلەکەیما تەنیا جیانمازمۍ".

مەزڵوم عەبدی پەی پەشتیوانی ۋەرفراوانی بانگەوازێوەش ئاراسەو گلېرگەی مېیاننەتەوەیی کەرد و ئانەش وست ڕووە، کە پەنەوازا هەنگامەی دەمودەسیە پەی ئاسایشو گەلی بنیا.