ماوەو چوار ڕوان سوپاو عێراقی لوێنە سەروو ١٧٢ خێزاناو گەڕەکەو نەورۆزی کەرکوکنە کە ئەرەنیشتەکێش کوردێنێ، گەرەکشا بە زەبروو هێزی یانەکاشا پەنە چۆڵێ کەرۆ و بە بەهانێ  ئانەیۆ ئا زەمینێ موڵکێ وەزارەتوو وەرگێری و سوپاو عێراقی بیێنێ سەردەموو ڕژێمی وەڵینوو بەعسینە.  

وێرەگاو ئارۆ پەنجشەممەی، بارودۆخەکە گرژییش چەنە کەوتۆ، وەختێ کە سوپاو عێراقی گەرەکش بێ یانە کوردەکا بەرێ کەرۆ و عەرەبێشا دلێنە ئەرەنیشتێ کەرۆ، هامنیشتمانیێ گەڕەکەکێ دلێ کۆڵانەکانە کوێ بیێوە و ڕەتشا کەردۆ یانەکاشا چۆڵێ کەرا و کورداو گەرەکەکێ واتشا "چێگە مەجممێ".

یاگێ واتەینە، گەڕەکەو نەورۆزوو شاروو کەرکوکینە ١٢٢ یانێ گەورێ هەنێ، کە ١٧٢ خێزانێ کوردێشا چەنەنێ، کە لاو ڕژێمی وەڵینوو بەعسیوە پەی کەساو نزیکوو حیزبوو بەعسی وەشێ کریێبێنێ، وەلێ دماو پڕۆسەو ئازادیی عێراقیوە ئا یانێ چۆڵێ بیێبێنێ و ئا خێزانە کوردێ کە خەڵکی ڕەسەنوو شارەکەینێ و ئاوارێ شارەکاو هەرێموو کوردستانی بیێبێنێ، گێڵێوە و دلێشانە ئەرەنیشتێ بیێ.  

یاگێ واتەینە، ماوەو ٦ ساڵی وەڵیننە کەرکوکنە پرۆسەو بەعەرەبکەردەێوە بەپلانە ملۆ ڕاوە، کە ڕۆدماو  ڕۆی پلانەکانێ زیاتەرێ با، چەمدارێ و لایەنە سیاسییە کوردییەکێ هەوڵەکاو سوپاو عێراقی بە بەشێوە  جە پڕۆسەو بەعەرەبکەردەی تۆمەتبارێ کەرا، چونکوم بەردەوام دژوو کوردی هەرمانە کەرا و پەشتیوانیی جە عەرەبە ئامایەکا کەرا پەی هجوومکەردەی سەروو یاگە کوردنشینەکاو شارەکەی و ئەرەگیرکەردەی زەمینەکاو کوردی.

هەرپاسە هامنی وەڵین، سوپاو عێراقی گەرەکش بێ دەس سەروو ١٣٥ هەزار دۆنم زەمینا هیتیاراو کوردی و تورکمانی کەرکوکینە گێرۆ، ئینەیچ بە بەهانێ ئانەی کە سەردەموو حکومەتوو ڕژێمی وەڵینوو بەعسینە ئا زەمینێ بە قەراروو (هەرمانوکاروو سەرنیشت)وو سەردەموو بەعسی دریێنێ بە وەزارەتوو وەرگێریی عێراقوو ئاوەختی، کە ئا وەخت هیتیاراو کوردی و تورکمانوو شارەکەی پەی ماوەو چندین مانگا ناڕەزایەتی و مانگێرتەیشا دەس پەنە  کەرد دژ بە ئەرەگیرکەردەی  زەمینەکاشا لاو سوپاو عێراقی و عەرەبە ئامایەکاوە تا جە دماپڕۆسەنە مردنیا.