یاگەگیرەو سەرۆکوو دەسەو ژەنا کانتۆنوو عەفرینی و شەهبای ئارین بەکیرە ئاماژەش پانەی دا کە چنی تەوقۍ و زەحمەتیەکا، عەفرین جە مدرامانوو وێش بەردەواما، ئی مدرامانە تا ڕزگاری عەفرینی بەردەوام بۆ.
یاگەگیرەو سەرۆکەو دەسەو ژەنا کانتۆنوو عەفرینی و شەهبای ئارین بەکیرە پەیوەس بە مدرامانەکا عەفرینی و ئەرەگیریەکاو دەوڵەتوو تورکی پێ ئاژانسوو هەواڵوو فوراتی (ANF)ی قسێش کەردۍ.
ئارین بەکیرە جە سەرەتاو قسەکاشەنە ئاماژەش پانەی کەرد کە سیاسەتوو ئەرەگیری عەفرینی جە ٢٠١٨ەنە تەمامکەروو پیلانگێڵنی میان نەتەوەی سەروو ڕابەروو گەلوو کوردی عەبدوڵا ئۆجالانیا و واتش: "هەر ئا وەختە ڕۆشنبیۆ سیاسەتوو دەوڵەتوو ئەرەگیری تورکی چ سیاسەتێوە گڵیاوا، پێوەرەژیۋای فرە نەتەوەیی جە عەفرینەنە، عەفرینی جە شارەکا تەری جیاکەرێوە. پۍ ئانەی ئی پێوەرە ژیۋای نەتەوەکا جە عەفرینەنە جە بەین بەرا، عەفرین ئەرەگیرکریا. جە ۋەرا ۋەروو ئی ئەرەگیریەینە گەلاو عەفرینی مدرامانێوە تاریخیش نویستۆ و پۍ ماوەو ٨٥ ڕووا مدرامانشا کەرد. ئا مدرامانە دماو ئەرەگیرکەردەو شارەکەیچۆ، هەتا ئیساتۍ بەردەواما و تا ڕزگارکەردەو عەفرینیچ بەردوام بۆ. جە ئیساتێچەنە سیاسەتێوە پیس ۋەرا ۋەر بە شەهبای ملۆڕاوە. جە لێوەتەرۆ تەوقەو حکومەتوو شامی سەروو شەهبای بەردەواما."
ئارین بەکیرە باسش جە دەوروو ژەنا جە مدرامانوو گەلوو عەفرینینە هەرێموو شەهباینە کەرد و واتش: "ۋەروو ئانەی ژەنی نیمەو گلێرگەینۍ، دەورێوە گۆرە چی مدرامانەنە گێڵنا. ژەنی کە بە فکر و فەلسەفەو ڕابەر ئاپۆیۆ پەروەردۍ بیێنۍ، چی مدرامانەنەو وەڵۍ ئاخێزیچەنە ئەرکی فرەشا وستەبۍ ئەستۆو ۋێشا. بەتایبەتی جە هەرێموو شەهباینە، سەرەڕاو گرڎوو زەحمەتییەکا ئاستەنگیەکۍ ژیۋای جە مدرامانەنە بەردەوامۍ بێنۍ. پۊکاتی ئی مدرامانە بە گەل و ڕاوەبەروو خۆسەریوە تا دلێنەبەردەو ئا سیاسەتە پیسەیە و تا ڕزگارکەردەی عەفرینی بەردەوام بۆ."
