گەلوو شەنگالی ۋەردەمو بیناو ئەنجوومەنو شارو شەنگالینە تا ۋەردەمو بیناو ۋەننگەو زەریفە عوسێ ڕاپیمایشا کەرد. جە ڕاپیماکەینە هوتافەکۍ "بژیۋۆ مڎرامانوو یەبەشە"ی و "بژیۋۆ مڎرامانوو شەنگال"ی و "بژیۋۆ دادپەروەری، مرۆنە خیانەت" وچیێوە.

بە نامۍ گەلیۆ ئەرەیاۋنێوە ۋنیاوە، هرووژمەکۍ ١٨ و ئاداری دژ بە یەبەشەی شەرمەزارۍ کریۍ، تەئکیدش مکەراوە تا پووچ کەردەیۆ هرووژمەکا چالاکییەکێشا بەردەوامۍ با.

جە ئەرەیاۋناکەینە سەرنج وزیان سەرو مڎرامانوو جەنگەوانا یەبەشەی جە ساڵۊو ٢٠١٤ یۆ پەی پارېزنای گلېرگەو ئێزدی، ماچۆ: "ئی هێزەما کە چا کاتۆ گلېرگەکەیما پارېزنا، جە لایەنو دۊڵەتو عێراقیوە پېسە هێزۍ ناشەرعی نامێشا بریۆ. بەڵام با دۊڵەتو عێراقی عال بزانۆ، پېسە گلېرگەو ئێزدی و بەتایبەت جوانا ئێزدی بە گرڎو هێزیماوە ئینایمۍ پەشتەو هێزەکاماوە، چونکی جەنگەوانەکۍ بێنۍ کە داراییشا جە ئێمە و بیەو ئێمە کەرد".

ئەرەیاۋناکەی بە هوتافەو "بژیۋۆ دادپەروەری، مرۊنە خیانەت" دمایش ئاما.