گەنجاو کەمپوو پەنابەرا مەخمووری، ئەرەیاۋناشا فکر و فەلسەفەو عەبدوڵا ئۆجالانی جە کوردسان و جەهانەنە وەڵا بیەنۆ و واتشا: " سایەو سەیەو ڕابەر ئاپۆینە گەلوو کوردی، کولتوور و ئشناسنامەو ۋێش بەدەس ئاردۆ."
گەلوو کوردی جە ئەڎابیەو ڕابەر ئۆجالانی پېسە ژیۋایۆ ۋێش پېناسە مکەرۆ. چونکی چنی جە ئەڎابیەو عەبدوڵا ئۆجالانی، کورد ۋێش ئشناساوە و پۊکاتی ساڵانە بە جۆش و خرۆشێوە گەورۆ ئی ڕووەیە پیرۆز مکەرا. سەبارەڎ بە٤و نیسانی، گەنجاو کەمپوو پەنابەرا گەشمەرڎە ڕوستەم جودی (مەخموور)ی قسێشا پۍ ئاژانسوو هەواڵوو فوراتی کەردۍ و داواشا جە گەلوو کوردی و گەلا جەهانی کەرد کە ئێساڵی بکەرا بە ساڵەو ئازاڎیی جەستەیی عەبدوڵا ئۆجالانی.
'فکر و فەلسەفەو ڕابەر ئاپۆی کوردسان و جەهانەنە وەڵا بیەنۆ'
زیرین نێروهیە یووە جە گەنجاو مەخمووری قسێش کەردۍ و ٤و نیسانیش جە ڕابەروو گەلوو کوردی عەبدوڵا ئۆجالانی و تەماموو گەلی ئازاڎیوازی کوردی پیرۆز کەرد و واتش: وەڵۍ ئانەی ڕابەر ئاپۆ بەرگنۆ، کوردسان جە ئاژێوە چوار پارچەیینە بۍ فشار و چەوەسنایۆ سەروو گەلوو کوردی لووۍ ڕاوە. بە ئامای ڕابەرایەتی گەلوو کوردی جە جەهانەنە ئشناسیاوە. ڕابەر ئاپۆ بە فەلسەفە و ئایدۆلۆژی ۋێش کۊشیایۍ کەم ۋێنەش پەی ئازاڎیی کورد و کوردسانی دژوو دەسەڵاڎدارا دەسشپنەکەرد. ڕابەر ئاپۆ نەک تەنیا پۍ گەلوو کوردی، بەڵکم پەی گەلاو جەهانی بیەن بە ڕابەرێوە.
جە سایەو ڕابەر ئاپۆیۆ گەلوو کوردی بە کەلتوور و نەتەوەکەیش ئاشنا بیۆ
گەنجێوەتەر بەنامۍ سەرکان بیلەنی، جە ئەڎابیەو ڕابەر ئۆجالانیش جە گەلوو کوردی پیرۆز کەرد و واتش: "وەڵۍ پەیڎابیەو رابەر ئاپۆینە گەلوو کوردی جە تەرەفوو دەسەڵاداراوە جە کورد بیەی، کەلتوور و زۋانوو ۋێش دوور وزیابێوە، گەرەکشا بۍ بەزۋانوو ئەرەگیرا بژیۋۆ، بەڵام بە بەرکۊتەی ڕابەر ئاپۆی گەلوو کوردی دیسان گێڵاوە پەی حەقەتینی وەڵینوو کوردبیەی ۋێش.
