گەنجاو ئێزیدخان، عەرەب و تورکمانی، ئەرەیاۋنېوە هامبەششا وەڵاکەردۆ و ئاماژەشا پانەی دا مشۊم کۊشیایشا فراوانتەر کەراو واتشا: "بە قەرارداریێوە تۆکمە و بە ڕوحیەتێوە گەنجانەو ئاپۆییوە دڵنیێنمۍ جە سەرکۊتەی".
یۊبیەی گەنجاو ئێزیدخانی هېزی جە گلېرگەو دگۆری شەنگالی، یەرەمین کۆنفرانسوو ۋېش بە دروشمەو "پۍ ئازاڎیی ڕابەر ئاپۆی جەنگوو ئازاڎیی سەروزمۍ و خۆسەری شەنگالی مسۆگەرکەرمۍ" ئەنجامدا. دماو کۆنفرانسەکەی بە سەڎان گەنجۍ ئێزیدی، عەرەب و تورکمانی کوۍ بیېوە و ئەرەیاۋنېوەشا وەڵاکەردۆ. ئەرەیاۋناکە جە تەرەفوو ئەنداموو ڕاوەبەری یۊبیەی گەنجاو ئێزیدخانی، زێدان شەنگالیۆ ونیاوە.
ئەرەیاۋناکەی پی جۊرەنە:
" پېسە مزانمۍ هەڵمەتەو "ئازاڎیی پۍ ڕابەر ئاپۆی، چارەسەری سیاسی پۍ پرسوو کوردی" دەسشپنەکریان. ئېمەیچ پېسە یۊبیەو گەنجا ئێزیدخانی بەشدارۍ ئا هەڵمەتۍ بیەیمۍ. یەرەمین کۆنفرانسوو ۋېما بە دروشمەو "پۍ ئازاڎیی ڕابەر ئاپۆی جەنگوو ئازاڎیی سەروزمۍ و خۆسەری شەنگالی مسۆگەر کەرمۍ" ئەنجامدا. قەرار و هەڵوێسەکا کۆنفرانسی کەرمۍ بە بنەماو ئازاڎیی جەستەی ڕابەر ئاپۆی. پېسە یۊبیەو گەنجا ئێزیدخانی، گێرتەو سەرۆک ئاپۆی قبوڵ مەکەرمۍ و ۋنەپەرسایۆ جە دوژمنوو مرۆڤایەتی کەرمۍ. بە فکر و فەلسەفە ڕابەر ئاپۆی ڕۆحما دا بە گلېرگەو ئێزیدی، جە سایەو ڕابەر ئاپۆیۊ دۆس و دوژمنوو ۋېما مشناسمۍ. جە ٧٤ قڕکاریۍ ئێزیدینە ئانېما دیۍ کە ۋېشا پېسە دۆسوو ئێزدی نیشانە دېنۍ، کە چنی ڕووە دژوارەنە ئێمەشا جیا ئاست پۍ ئا قڕکاریە. چی حەقەتینە وەڵینگەییەنە دەرزما هۊرگێرت. ئێمە سەروو فکر و فەلسەفەو ڕابەر ئاپۆی پەرەوردە و ڕێکوستەی ۋېما کەرمۍ. هێزوو ۋېما پۍ پارېزنای ۋېما مەرزنارە. ئینە گرڎ جە سایەو ڕابەر ئاپۆیۊ پێکئاما. دەوڵەتوو ئەرەگیر و قڕکەرو تورکی دوژمنی بنەڕەتیمانە، مەتاوۆ هەنگامەکا ئازاڎیما مردنۆ. ئێمە بە قەرارداریېوە تۆکمە و ڕۆحیەتېوە گەنجانەو ئاپۆییەوە بەدڵنیاییوە سەرۍ گنمۍ".
