جە شارو ھالەزالە-و ووڵاتو ئەڵمانیای.، هاموڵاتیێوی هەورامانی بە ڕڤارێوەنە خنیکیا و گیانش جەدەستدا.
بەپاو زانیارییەکان کە پەی ئاژانسەکەیمان فڕات نفوزی کیانیێنۍٚ، گەنجەکە نمێش ھێمن حەمە کەریم-با و خەڵکو دەگاو خەرپانی سەر بە هەرێمو هەورامانو دیمو پانیشتو کوردستانیا.
 
بە پاو ئا زانیاریا، وێرەگانەو چوارشەمەی ٢٠٢٢/٠٧/٢٠ی، ھێمنی کۆچکەردە، چەنی چن کەسێوە ملانۍٚ پەی شارێوە بەنامێ ھالەزالە-ی بەمەمەستو گێڵای و مەلەکەردی جە ڕڤارو زاڵەیەنە. بەڵا بەداخەوە هێمن و وەختو مەلە کەردەینە خنیکیۆ و تەرمەکە دیار نمەمەنۆ.
دماو ئانەیە ھەواڵ دریۆن بە پۆلیسو شارەکەی کە حاڵەتێوە خنیکیای ڕووەشدان، بەپەلە پۆلیس و تیمەک فریاگوزارەکۍٚ دەس مکەرانۍٚ بە گێڵای شونو تەرمەکەیشەرە. دماجار دمانیمەرۆو هەینی (جمەی) تەرمەکەی مئێزانێوە.

جە ئیسەنە تەرمو ھێمنی ئینا جە پزیشکی دادوەرینە  و بڕیارەن دمای ئانەی کە راکارە ئیداری و یاساییەکێش تەمیانێ، کیانیۆوە پەی پانیشتو کوردستانی و تاوەکو ھەڵەبجەنە ئەسپەردە بکریۆ.
ھێمن حەمە کەریم، تەمەن سی و دوێ ساڵانێ بییەن، بەرشیەو پەیمانگاو ھونەرە جوانەکاو ھەڵەبجەی بییەن و هاموەخت بەکالۆریۆسش جە بەشو پەیکەرسازی زانکۆ سلێمانی بەدەست ئاردەبێ.
کۆچکەردە ماوەو چن ساڵێوەن ڕووەش کەردەبێ ئەوروپا و جە ئەڵمانیا نیشتەجا بییەبێ و ماوەو ھەفتان مافو مەنەوە (پەنابەری)ش، هۆرگێرتەبێ.