ئەڎایا بەشدار جە ئێشکگیریی دادپەروەری بە مەرامو ماڕای گۆشەگیری درێژە بە چالاکییەکەیشا مڎا. عەفیفە کارتاڵە یۆنە چا ئەڎایا و پەی بەشداری جە گلېرۆبیەکەو ١٣و تشرینو یووەم و ئامەدی داواو بەشداربیەیش کەرڎو واتش، "مشۆم دژو گۆشەگیری دەنگ هۆربڕمۍ".
ئەڎایا بەشدار جە ئێشکگیریی دادپەروەری بە داواکاری دمایئارڎەی بە گۆشەگیری سەرو رابەرو گەلوو کورڎی عەبدوڵا ئۆجالانی و دمایئارڎەی بە پاشێلکارییەکا مافەکا مرۆڤی سەرو زیڼانیا سیاسی درێژە بە چالاکی 'دەنگ بڎە بە ئازاڎی'. ئەڎایا گرڎ ڕوانۍ دووەشەمەی کوۍ باوە و قسۍ پەی رۆنامەوانا مکەرا.
ئەڎاو زیڼانی سیاسی محەمەد کارتاڵی، عەفیفە کارتاڵە جەبارەو گلېرۆبیەو ١٣و تشرینو یووەم و ئامەدی داواو بەشداربیەیش کەرڎ و واتش: "مەرامو چالاکیەکەیما دمایئارڎەین بە گۆشەگیری و مسۆگەرکەرڎەی ئازاڎیی جەسەیی بەڕێز ئۆجالانی. داوا جە جەهانی مکەرمۍ؛ دمایی بە گۆشەگیری بارانۍ".
عەفیفە کارتاڵە ئانەش وست ڕووە کە ئاڎۍ ئینۍ سەرو رێبازو دۆزو رابەرو گەلوو کورڎی عەبدوڵا ئۆجالانی و واتش، "زاوڵەکېما بۆنەو رێبازەکەیشۆ گیانو ۋێشا بەخشا. ئاڎ رابەرو ٥٠ ملیۆن کوردان. با دمایی بە گۆشەگیری بێنە، گەلوو کوردی و رابەرەکەشا میاواوە بەیۆی. ئەگەر بەڕێز ئۆجالان قسۍ بکەرۆ، جوانەکێما نمەمرا، سروشتو ئێمە تاڵان نمەکریۆ، قەیران و جەنگ تەمامۍ مەبا. ئی دۆڵەتە مرۆڤ، ژیۋگە و ئاژەڵەکا کوشۆ. نکۆڵی جە کولتور و زۋانیما مکەرۆ. داواو ئاشتیێوە شکۆمەندانەی مکەرمۍ".
عەفیفە کارتاڵە بە داواکاری 'مشۆم جە دژوو گۆشەگیری دەنگ هۆربڕمۍ' داواش جە گرڎو کورڎا کەرڎ کە بەشداری ١٣و تشرینو یوەمی بکەرا ئامەدەنە کە دژو گۆشەگیری ساز مکریۆ و واتش، "گرڎ کوردێوە بەشکۆ مشۆم جە ۋەرا ۋەر بە گۆشەگیرینە مردۆوە و دەنگ هۆربڕۆ".
کارتاڵە باسش چانەی کەرڎ کە ئاژەو تەندروسی زینانیا نەوەشی دژواربیەن و واتش، "مشۆم زیڼانیا نەوەشۍ ئازاڎۍ بکریا. ئا زیڼانیۍ کە ماوەو سزاکێشا سەرشینە مشۆم ئازاڎۍ بکریا. دووۍ جارۍ عەمەڵ کریێنا، گلکەکۍ پایم بە مەڵامەتو نەوەشە قەنیۆ ڕێزێنێرە، نمەتاوو نلو ڕانە، بەڵام پی حالەیچمۆ دەسبەردارو چالاکیەکەیم نمەبوو. ئەگەر ئارۆ دەنگ هۆرنەبڕمۆ، سەوای کەس دەنگ هۆرمەبڕۆ، مشۆم کورد یۆگێرا، جە ۋەرا ۋەرو گۆشەگیری و نادادینە مرداوە، خاوەنداری جە ئەرەکۊشای ۋێشا بکەرا. مشۆم کەس نەگنۆ شۊنەو ئاکەپە-مەهەپەی. ئێمە ئاورۍ بیمۍ، بەڵام دەس جە شکۆو ۋێما هۆرنمەگێرمۍ. جە ١٣و تشرینو یووەمینە ئامەدەنە گلېرۆبیەی جە دژوو گۆشەگیری ملۊڕاوە. داواکارێنمۍ ئاشتیێوە شکۆمەندانە رووە جە کورڎەسانەکەیما بکەرۆ. با ئیتر جەرگما نەسۆچۆ. با زېڵۍ دژمنا کوردی بسۆچۆ. زەڕما گەرەک نیا، ماڵو دنیێما گەرەک نیا ، ئێمە هەژارۍ بیمۍ، ئاورۍ بیمۍ کێشە نییا تەنیا بە بەڕێز ئۆجالانی بیاومۍ، چوار پارچەو کورڎەسانی یۆگێراوە، ئاشتی چەسپیۆنە، رۆڵەکېما جە زیڼانەنە ئازاڎۍ بکریا. جە گلێرۆ بیەکەینە پەی ئینیشا دەنگ بەرزمکەرمێوە".
