گەریلا کەلیمێوە ئیسپانیایییەنە و کەلیمەشناسیی فارسیینە بە ماناو چریكی ئامێنە. هێزێوەن بەپاو ئەدەبیاتی سیاسی، سەروازی"عەسكەری"سیستموو دەوڵەت ـ نەتەوەكا جەنگوو سەنگەر بەسەنگەریش ورنەچنیەن و یەك بەرەنە مەگژیۊ. وەخت و شۊنەو ڕووبەڕووبیەیوەکاش دیار نییا. گەریلا هێزێوەن کتوپڕ ورکوۊ سەروو هێزوو دوژمنی و چەمترووکناێونە دەسش وەنە کەرۊوە و زەبری كەمەرماڕش وەنە مدۊ و بەبۍ ئانەی یاگەپۍ جیا بازۊ، جەنگەکەنە مۍ بەرۊ. بەگردی گەریلا؛ بە یەكینەی گولانە و پرۊفیشیۊناڵ "شارەزا" بەشێوەی بەورئاسا و فیداییانە ورکوۊ سەروو هێزوو وەراوەری. بەڕاو سابۊتاژی، سەرەمڕ، هەوڵۍ مدۊ بە كەمتەرین زەرەر، مەیدانوو جەنگەکەی جیا بازۊ و مانۊڕ و مناوەرەی سەروازیینە، یاگۍ و وەختێوە تەرنە دوژمنی وزۊ دلۍ كەمینۍ و هەقە کەرۊوە.

جە بنەمانە گەریلا هێزوو هەقسانایۊن، یاگۍ دیارەش نییەنە. گرد یاگۍ لانە و مەکانشا، هێزوو مانۊڕی و وێگوجنایش چەنی بارودۊخەکا هەن، پەشتی بە هێزی گەوهەریی وێش بەسۊ. پەشتی بە حیچ هێز و تاقم و گرووپ و دەوڵەتێوە مەبەسۊ. گەریلا هێزوو گەلین و سەرچەمەش گەلا. وەراوەروو ئا هجوومانە کریا سەرش گەل وەرپەرسا و حیساب مدۊ گەلەكەیش و حیساب پەی حیچ هێز و لایەنێوە مەکەرۊ جگە گەلەكەیش.

حەقیقەتنە گەریلا هێزی فیدایی گەلین. هێزێوەن گەل پەشتی و پەناشنە و وەیش کەرۊ. سەرچەمە ماددی و مەعنەویەكەش گەلا. پەوکای گەل گرد نۊعێوەرە خاوەندارییش وەنە کەرۊ. هێزێوەن دلۍ دڵوو گەلیوە ئامان و وێگەرەکنەبییەن. تاكە ئامانجش ڕزگاریی گەلەكەیشا چێروو چەپۊكەو زوڵمی و ستەمی و ئەرەگیری و قڕكەرڎەی و دلێنەبەرڎەینە. هێزێوەن پەی كەسی مەگژیۊ، جگە گەلی و وەڵاتەكەیش و نرخە مەبارەکەکاش و ئامانجەكاو گەشمەردا.

كوردستاننە و گەرمەو هەردووە جەنگە جیهانییەکانە، واچۍ پێشمەرگەی مۍ دلۍ وێژەنامەی سیاسیی كورداوە و پاسەش منیارە، كە پێشمەرگە ماناو مەرڎەی مدۊ وەڵۍ مەرڎەی گەلینە. وەلۍ گەریلا باسوو مەرڎەی مەکەرۊ، باسوو ژیوای کەرۊ وەشەسیای ژیوای لاو ئینسانەکاوە. بە بەرکەوتەی پەكەكەی جاری یوەم گەریلا مۍ دلۍ مەیدانوو ئەدەبی و وێژەی سیاسی، سەروازی، ڕێكوستەی كورداوە. هەوڵۍ مدۊ جە مەرڎەی ژیوای سازنۊ. بنەڕەتنە هێزێوەن دژوو مەرەی، كۊیلایەتی و چێرڎەسەبییەی ئامان. ئینەیچە وێش فەلسەفەو ژیوای و مەرڎەی و کۊشیای و مدرامان و وێگێری كوردستاننە وروێڵنۊوە. ئانۍ تا هیزی و ئارۊیچ چەنیش هەڵوەدۍ مەرگی بێنێ، بە بییەی گەریلای گیانێوە تازەشا مێوە پۊرەرە. گەریلا چەمكوو مەرڎەی پەی ژیوای فاڕۊ و ژیوای ئازادی بە بنەما گێرۊ.

ئەرەمەرزنوو جمیەری گەریلایی كوردستاننە بەگردی؛ ڕابەر ئاپۊن"عەبدوڵڵا ئۊجەلان"ا و ئۊجەلانیچ وێش ماناو هەقساناین. هەقسانای چەمكێوە گەریلایەتیین. داراو باگراوەندێوە فەلسەفی، هزری و سیاسی و سەروازیی قووڵین. چەمكێوەن بەپاو ڕاسینەی تارێخی و جوگرافیی كوردی و كوردستانی.

تارێخو گەلەكەیمانە جمیەرۍ فرۍ گەریلایەتیی بیێنۍ وەلۍ هێزە نەیارەكاو دەوروپەشتی گەرەکشا بییەن ئا هێزاو گەلی، پێسە لادەری و تەسلیمنەبییە بە دەسەڵاتی نامۍ بنیا. گەرەکشا بییەن بە شێوێوەجە شێوەكا تیرۊریزە و هێزی زیاتەری دژش كۊ کەراوە.

هۊریەكێ، ئۊرارتۊیەكێ، ئەیوبیەكێ، سەباحیەكێ، خەوارجیەكۍ و قرمەتیەكێ، مانەویەكۍ و مەزدەكیەكۍ گرد سەرڎەموو وێشانە ساعیبۍ هێزی گەریلایی بیێنێ. وەلۍ ئا هێزۍ جە وەشکەرڎەی ئەرەمەرزیای رێبەرایەتیینە كەم مەنێنێ. وەراوەروو هجوومەکاو دلۍ و بەرینە نەتاوانشا بەپاو پێویسی بەپلانی درێژخواینە، سیستموو ڕاوەبەرڎەی و پارێزنای مەرزنارە. داراو هێزوو جەنگی فیدایی و قارەمانی و بەجەرگی با، وەلۍ دیارا ئانە تەنیا فێروو ئانەیش نەکەرڎێنۍ وەراوەروو نەیارا كوردستاننە پەی ماوێوە درێژی ئیرادەبییەی هێزی گەلی وەراوەروو هجوومەکانە پارێزنا. پاڵەوانۍ و سوارخاسۍ و قارەمانۍ ئەفسانەیۍ جە ژەنۍ و پیای چا جمیەرانە دەورشا دیەن، بەرەكاو جەنگینە قارەمانانە تا دماین هەناسەشا مدرامانشا کەرڎەن بە بنەما. گیانشا دلۍ سەرەی ماڵێشانە نیانرە و پەی پارێزنای ئامانجەكاشا گەشمەرڎۍ بیێنێ. ئانۍ تارێخوو کوردی و کوردسانینە گیانشا بەخت کەرڎەن، گردشا زارۊڵۍ ئی ئاو و خاكینێ. ئی ئاو و خاكە بە ونەو ملوێنا ئینسانە کۊشەرا، وێگیرا و مدرامانکەرا ئاوی دریان. پارێزیان و ئارۊ ئێمە سەرشۊ مژیومێ.

وەختێو ڕابەر ئاپۊ ماچۊ؛ گەشمەرڎۍ ساعیبۍ هەقەتینۍ ئی وەڵاتەینێ، ئینسان هەست بە گەورەییێوە فرەی کەرۊ. دیارا پەی پارێزنای ئی خاك و گەلەیە بە درێژایی تارێخی قوربانیما دان. وەختۍ ڕابەر ئاپۊ پەی گەریلاكا قسۍ کەرۊ، پەنەشا ماچۊ؛ شمە فرە فیداكارێندێ، قارەمانۍ و بەجەسارەتێندێ، جەنگکەرێندێ. هێزێوەندۍ جەنگنە بەچەمەکۊرانە ملدۍ سەروو دوژمنی. ئینە جەسارەتێوە گەورە و نەبەزانەن، مەبەسش ئا لایەنە کۊنە و كۊمەڵایەتییەو گەلەكەیمانە و بەتێركەرش مەوینۊ.

حەرسەرڎەمێوە، ئینسانی تایبەت بە وێش خولقنان. سەرڎەموو کۊشیای و جمیەرە سۊسیالیستییەكانە، گەریلا پێسە ئەفسانێوە نەژنەویای وینیان. وەلۍ گەریلایەتیێوە كە كوردستاننە ڕابەر ئاپۊی مەرزنانرە؛ فرە جیاوازتەر چا مۊدێلا وەڵاتاو ئەمریكای لاتینینە و ئیسپانیا و ئانگۊلا و چین و ڤیتنامنە ئەرەمەرزیێبێنێ.

ڕابەر ئاپۊ گەریلایەتییش ئەدێشۊ فێر بییەن، ژەنە ـ خواوەندە، ئەدا ئۊوەیشە بە نزیكبییەیۊش جە ڕێبەر ئاپۊی و هەڵوێستە مدرامانییەکەیش وەراوەروو ژیواینە، نۊعێو جە مدرامانی و هەقۍ و چالاكییش فێر کەرۊ.

مشۊم ئندە بە زەبر بی، کە فرسەتوو ویرۊکەرڎەی بە وەرانوەرەکەیت نەدە. سیستموو فكرنای و هۊش و ویریش تێک دەی. پاسە شڵەژنییش كە وێكۊكەرڎەیۊش ئاسان نەبۊ. وەراوەرەکەت جە چالاكی و جووڵەی وزی و تواناو وەڵێکەوتەیش چەنە ورگێری و دەس وزی وەڵێ. ئا شێوە گەریلایەتییە ڕابەر ئاپۊی وەراوەروو محۊی و جمۊ کەرۊ. ئا دووە برۍ بەچەتوونی گەرەکشانە وەنەو ڕابەر ئاپۊی بدا. وەلۍ ئەدا ئۊوەیشە فرە تووڕۍ بۊ و ماچۊ تا هەقەو وێت نەسانیوە نەیۊ یانە. ئی هەڵوێستەو ئەدا ئۊوەیشۍ پاسە کەرۊ، یوەم چالاکیی گەریلایی كەسایەتیی ڕابەر ئاپۊینە شێوە و فۊڕمێوە ژیوای وێشۊ گێرۊ.

ڕابەرایەتی وانە و مانا پەی بابەتە ژیواییەکاش دەگانە بار کەرۊ. چالاكییب دووەمینش وەراوەروو نزیکبییەیوەن جە حەسەن بینداڵی. بنەیانەو حەسەن بینداڵی سەر بە عەشیرەتێوە تەرینۍ و دوژمنایەتیی ونۍ بەینوو عەشیرەتوو ڕابەر ئاپۊی و حەسەن بینداڵینە بۊ. ڕابەر ئاپۊ چا وەختانە چەنی حەسەن بینداڵی بابە دووۍ هامڕۍ گیانیێ. ئینەیچە لاو ئەدا ئۊوەیشێوە مایۍ قبووڵی نییا. وەلۍ جارێوە تەر ڕابەر ئاپۊ تا وەختوو گەشمەرڎەبییەی حەسەن بینداڵی با دووۍ هامڕۍ حەرەنزیكۍ یۊی. ئینە ئانەیە یاونۊ كە پیمانە و پرەنسیپەكاو ڕابەرایەتی جە وەشکەرڎەی یەكێوە هامڕایانەینە ئەوەڵوو زارۊڵەییوە چەكەرەش کەرڎەن.

گەریلایەتی لاو ڕابەر ئاپۊیۊ، بە ماناو بونیادنیای هامڕایەتی ڕاسی و دروسین. نە سەروو سەلیقەو معیاریی تاكەكەسی و بنەیانەیی و عەشیرەتی. گەریلا داراو ئامانجێوە گەورەو بونیادنیای گلێرگێوە ئەخلاقیین، كە پەشتی بە نرخە هامبەشەكاو ئینسانەکا بەسۊ. ئینسانبییەی بەرزتەرین و ڕازیاوەتەرین هەستەكاو ژیوای ئازادین. ئینەیچ بە ماناو ئانەینە كە گەریلا، هێزوو گەلین و پەی گەلی و ئینسانیەتی كۊشیۊ. كۊشەروو هەقەتینوو گەلین و پەی گەلی مژیوۊ.

گەریلا ڕاسیێوەن كوردستاننە، كە بە كەس ڕام و دەسەمۊ مەکریۊ. گەریلا ئیتر بییەن بە هێزێوە جە پۊڵای، جە ئیرادەی و وزەی و ورەی و مەعنێ. ئەها ئەگەر ئیساتۍ گردوو هێزە نەیارەكاو سیستموو مۊدیرنیتەی سەرمایەداری دەوڵەت ـ نەتەوەكا دژوو گەریلای هەقەتینوو كوردستانی، ڕابەر ئاپۊی باوە یۊ تا بە پیلانگێڵنیی میاننەتەوەیی بڕفاناش چا ڕاسییوە سەرچەمە گێرۊ. ئیسە ڕا مەدا پەی ماوەو یەرۍ ساڵان تاكە کەلیمێوەش چۊوە بژنەویۊ، بۊنەو ئا هێزیوە جە كەسایەتیی وێشنە بونیادش نیان، یانۍ هێزی گەریلایی. گەریلایی لاو ڕابەر ئاپۊیۊ، یانۍ فکرنای ویری ئازادی كە بە هیچ كەسێوە بەند مەکریۊ.

گەریلاكاو ئازادیی كوردستانی، كە هێزوو وێشا جە ڕابەر ئاپۊیۊ ورگێرا، تاكە هێز و هومێدوو گەلوو كوردستانی و ئینسانیەتینۍ وەراوەروو دڕندەتەرین سوپاو توركی و جەندەرمەی و گرووپە چەتەكاو داعشیوە نرخە هامبەشەكاو ئینسانیەتی پارێزنا.