یووە جە ئەرەمەرزنەرا پەکەکەی، ساکینە جانسزە، فیدان دۆغانە و لەیلا شایلەمزە جە ٩و ڕابڕان و ٢٠١٣ ینە جە پاریسوو پایتەختوو فەرەنسای گەشمەرڎۍ کریۍ. تا ئیسە دەوڵەتوو فەرەنسای بکوژەکەش ئاشکرا نەکەردەن. هەزاران ژەنۍ شۆڕشگێڵنۍ جە کەشە سەرکەشەکا کوردسانینە پۍ حەق ئەسایۆ ئا کۊکوشییە کۊشیای کەرا.

'جە دژوو فاشیزمی هەڵوێستیوە ڕۊشنش بۍ'

ئاڤاشین جودیە، باسش کۊکوشی پاریس کەرد و واتش:"جە کەسایەتی سارۍ و ڕۆژبینۍ و ڕۆناهیێنە گرڎوو  هەڤاڵاما کە جە ئاخوو ئاخېزینە گەشمەرڎۍ بیۍ بە ڕێزو حورمەتۆ یاڎشا کەرمېوە. هەڤاڵ سارا کە یووەنە جە یووەم سەرمەشقەکا جمیەرەکەیما پێگېوە جیاوازش هەن. هەڤاڵ سارا یووە بۍ جە هەڤاڵا یووەم و ڕابەر ئاپۆی، هەڵوێسێوە ۋێڕاگرانەش بۍ. وەختۍ تەماشەو تاریخوو زینڎانییەکا پەکەکەی کەرمۍ، هەڤاڵ سارا مدرامانی گۊرەش جە دژوو فاشیزمی نیشانە دان. پېسە ژەنێوە ۋەرەنگارەو گرڎ جۆرە ئەشکەنجېوە نامرۆڤانەی بیۆ. هەڤاڵ سارا جەکتێبەکەشەنە بە نامۍ "ژیۋایم هەمیشە جەنگ بۍ" بە ڕۊشنی باسوو مدرامانوو وېش کەردەن. ژیۋای سارۍ بەردەوام جەنگەرە وییەرڎەن، تەسلیمەو کەسی نەبیېنە و هەڵوێسێوە ڕۊشنش دژوو فاشیزمی ئەرمانان. ئی شێوازە و مدرامانیش پۍ ئێمە بیەن بە میراتێوە، ئێمە بەردەوام چی ڕێنە جە وێما پەرسمۍ  و کۊشیەیمۍ. هەڤاڵ سارا دلۍ ڕێکوستەینە ڕەنجی فرەش کېشتەن".

"ئێمە بەردەوام ئاماڎېنمۍ جە ڕاو هەڤاڵ سارێنە بەدیل بڎەیمۍ "

ئاڤاشین جودیە ئەرەیاۋناش کە هامڕایی بەینوو سارۍ و ڕابەر ئاپۆی حەقەتینە بۍ و ئەرەیاۋناش کە ئا هامڕاییە نیشانۍ حەقەتینە. حەرپاسە ئاڤاشین جودیە ئاماژەش پانەیچ کەرڎ، ۋەروو ئانەی ڕابەر ئاپۆ چېروو کاریگەری مدرامانوو هەڤاڵ سارێنە بیەن، وێنەکەیش جە ژوورەکەو ۋېشەنە هۊرواسۍ و جە درێژەو قسەکاشەنە ماچۆ: "ئینە چێش بەروزۆ؟" متاومۍ پېسە ژەنێوە کە یاوېنە بە ئازاڎیی، نامېش بنیەیمۍ. کە ئیسە جە کەسایەتیی دەلال، لەیلا، سۆرخوینۍ، شیلانۍ و هەزاران هەڤاڵامانە کە سەروو ڕێبازوو سارۍ لوۍ و ملا، تەماشەش کەرمۍ؛ پی جۊرە ڕەنج و بەدیلێوە گۊرەشا دان. گرڎوو ئا هەڤاڵا کە گەشمەرڎۍ بیۍ ساراشا کەردە بە نمونە و دەورېوە گۊرەشا جە کۊشیاینە وینا. ئا هەڤاڵە ژەنە گەنجۍ جە پێگەو مدرامانینە کۊشیانە، ئازاڎیی سارۍ بە نموونە  پۍ ۋېشا هۊرگێرا و ڕووبەڕوو دەوڵەتوو ئەرەگیری تورکی باوە، هەڤاڵەکېما پی جۊرە مدرامان کەرا و هەمیشە سەرۍ گنا. چونکی ئینە ئەرکێوە پیرۆزوو ئێمەن".

'هەڤاڵیەتی چنی ڕابەر ئاپۆی'

 ئاڤاشین جودیە ئاماژەش پانەی دا کە مدرامان جە زینڎانوو ئامەڎینە ئیرادەو فاشیزمیش ماڕا و جە درێژەو قسەکاشەنە واتش: "بکوژ، ئەسەد ئۆکتای، نەتاواش ئیراڎەو هەڤاڵ سارۍ ماڕۊنە، جە ۋەران ۋەروو مدرامانوو سارێنە، ئەسەد ئۆکتای، شکسش ئارڎ. ئی مدرامانە ناوازە نەک هەر ئەسەد ئۆکتای، بەڵکم دەوڵەتوو تورکیچش ماڕان. هامڕۍ سارۍ ئیلهام و ئی مدرامانەیشە جە سەرۆکیۊ هۊرگێرتەن. ئینەیچ ئانەی بەروزۆ کە هەڤاڵیەتی سارۍ چنی ڕابەر ئاپۆی هامراییۍ ڕاسەقینە بیەن. وەفاڎاری بە ڕابەر ئاپۆی بە پەیوەندییەکاش چنی گەلیچ دیار بۍ. پێگەش دلۍ گلېرگەینە بە وەشەسیای و ڕێزۆ پێشوازیش ۋنەکریا و کەسێوە وەشەسیۍ بۍ دلۍ گەلینە. چی ڕوۆ گەشمەرڎەبیەو هامڕا سارۍ کاریگەری فرەش سەروو گەلی نیانەرە. حەرپاسە سەروو ئاستوو جەهانی هامسۆزییێوە فرە پۍ هامڕا سارۍ نیشانەدریا، ئا ژەنۍ کە پۍ ئازاڎیی ۋېشا کۊشیا، هەڤاڵ سارۍ پېسە سەرمەشقەو ۋېشا موینا.

'ئێمە قەرزارۍ ڕابەر ئاپۆینمۍ'

گەریلا ئاڤاشین جودیە جە دما دمایی قسەکاسەنە واتش: "تا سەرۍ گنمۍ هەر کۊشیەیمۍ. پیمەروو سەرەکی ئێمە ماڕای گۆشەگیریی و ئازاڎیی جەستەیی ڕابەر ئاپۆیا. چونکە قەرزۍ ڕابەر ئاپۆینمۍ. هەزاران قارەمانېما هەنۍ کە ڕابەر ئاپۆی خوڵقنېنۍ، پېسە هامڕا سارۍ، زیلانۍ، بێریتانە، دەلالە و لەیلۍ. پېسە شۊنکۊتەو ئا هەڤاڵا وەعدوو بەردەوامیدایما بە کۊشیای هەڤاڵاما دان، کە ڕابەر ئاپۆ بە ئێمەش ئسناسان. جە دما دمایینە سڵام جە مدرامانوو زینڎانیا کەروو کە پۍ ئازاڎیی ڕابەر ئاپۆی، چالاکیی مانگرتەی جە واردەی ئەنجام مڎا. هەتا ئاخر ڕاشا وەر مەڎەیمۍ. داوا جە جووانا کەروو دژوو فاشیزمی گژییا. چونکی ئانەی متاوۆ فاشیزمی وڕنۆ و سەرمەشقایەتی ئی ئاخېزەیە کەرۊ جوانېنۍ. هەتا دما نەفەس پەشتگیری جە جووانا کەرمۍ و چېشما دەسەنە بۍ کەرمېش. قەناعەتما پاسەن جە کەسایەتی هامڕا سارۍ، فیدانۍ و لەیلێنە سەرکۊتەی بەدەس مارمۍ و جە کۊشیای جەنگوو مەڕەکانە بە ڕێزۆ یاڎشا کەرمېوە. وەعد مڎەیمۍ سەروو ڕاو ئاڎیشاوە بەردەوامۍ بیمۍ.