گرڎ چېوۍ سەرەتېوەش هەن و ئا سەرەتایچە پاسە کاریگەریی وزۆ سەروو مرۆڤەکا کە جە ۋیر مەکریۆ. جە ١١ەمین ساڵیاڎوو گەشمەرڎەبیەو سەکینە جانسزېنە رێبازەکەش جە ۋەرنیشتەنە بەردەواما.

سالیم عومەر جە ساڵەو ١٩٧٧ ی تا وەختوو ئاخېزوو ۋەرنیشتی جە دیمەشقەنە مەنېوە. ساڵەو ١٩٨٠ پەکەکەش ئشناسا. پەکەکەییەکۍ کە جە سەرنیشتوو کوردسانیۆ پڕێنۍ پۍ ۋەرنیشتوو کوردسانی، جە دیمەشقیچەنە نامێشا ژنەوییا، کە چا وەختەنە هەستوو کوردایەتی زیاتەر پەرەش سانابۍ. جە ساڵەو ١٩٨٣ جە ڕاو وێنێوە سەروو گۆڤارێوە بە نامۍ سەکینە جانسزێچ ئاشنا بۆ. سالم عومەر جە دیڎارېنە چنی ئاژانسوو هەواڵوو فوراتی باس جە سەکینە جانسزۍ (سارۍ) کەرۆ.

نەزانېنا کێنە

"جە ساڵەکا ١٩٨٢پۍ ١٩٨٣ ېنە گفتوگۆ و مشتومڕ جە بارەو گێڵایۆ پۍ سەرنیشتوو کوردسانی ئارانە بۍ، ۋەروو ئانەی چا وەختەنە مدرامان جە زینڎانەنە قەتیس مەنەبۍ. قەراردریابۍ کە مشۊم رێبازێوە تازەو کۊشیای دیاری کریۆ. جە ئاژېوە چانەنە دلۍ گۆڤارێوەنە کە یاوابۍ هەرێمەکە من وێنەو هەڤاڵ سارێم دی. بێگومان ئا وەختە نەزانام کێنە. وێنەکە سەرنجش کێشتا. وێنەو دووۍ هامڕایا ژەنۍ بۍ. وەختۍ پەرسام، وتیان یووەنە جە ئەرەمەرزنەراو پەکەکەی سەکینە جانسزەنە. من نەزانابېن کە دلۍ پەکەکەینە ژەنی هەنە. جە ڕاو سەکینە جانسزېوە زانام کە دلۍ پەکەکەینە ژەنی بیەیش هەن. پارتەکۍ ۋەرنیشتی ڕا بە ژەنا نەڎېنۍ. یۆ چا مەڵامەتا بە پەکەکەیۆ وابەستەبیا ئانەبۍ کە جیاوازبۍ جە پارتەکا تەری. هەڤاڵ سارا هەم ژەنۍ بۍ، هەم سەرمەشقایەتیش کەردەبۍ. بەتایبەتی وەختۍ من مدرامانوو ئاڎېم جە ۋەران ۋەروو ئەشکەنجەینە جە زینڎانوو ئامەڎینە ژنی، کاریگەری فرەش سەروو منۆ نیارە، ژیۋای من فاڕیا.

من لوبنانەنە هەڤاڵ سەکینەم دییە

ساڵەو ١٩٩٢ شانس یاوەرم بۍ کە بلوو پۍ لاو ڕابەر ئاپۆی. من چا هەڤاڵ سەکینەیچم دییە. جە ڕاسینە هەڤاڵێوەم هەڤاڵ ساراش نیشانە دانی، واتش تازە جە زینڎانەنە ئازاڎە بیېنە و ئامېنە پۍ مېڎانوو ڕابەرایەتی. وێنەو دلۍ گۆڤارەکەیم ۋیر کۊتۆ. ۋیرمەنە مەنەبۍ. ئنڎەو دلۍ وێنەکەی شکۆمەنڎەبۍ. لووایمۍ لاش و داوام ۋنەکەردە پېوەرە وێنێوە گێرمۍ، دڵوەشەبۍ ، پېوەرە وێنێوەما گێرت. هەڵای ئا وێنەمە مەنەن. بیەو جەماوەرێوە فرەی جە مېڎانەکەنە هەڤاڵ سارۍ دڵوەش کەرۍ. جۆش و خرۆشوو گەلی ورە و وزەش پنە بەخشێنۍ. ئنڎەو گەلی ئاڎەیچ دڵوەشە بۍ.

ئانەۍ نامېش ئژنەوێنۍ، گەرەکشابۍ ویناش

گرڎوو ئانیشا کە نامۍ سەکینە جانسزێشا ژنەویۍ بۍ گەرەکشابۍ ئاڎۍ ۋینا. تا ئا وەختە ژەنېوە پا ڕادە ۋېڕاگرە نەوینیۍ بۍ. ئانۍ کە جە نزیکۆ کۊشیای ئازاڎییشا ئشناسابۍ، ژنیەبېشا کە سەرەش ۋەروودەموو ئەشکەنجەکا دەوڵەتوو تورکینە نە نامنانەرە، بە فەخرۆ باسش کەرېنۍ. حەرپاسە ۋینای یووە جە ئەرەمەرزنەرا پەکەکەی دڵسۆزی و وەفاڎاری زیاتەر کەرۍ و بۍ بە نمونێوە.

شۆڕشگێڵنېوە ۋێڕاگرەبۍ

مدرامانوو هەڤاڵ سارۍ لووا دلۍ وەڵینگەیۆ، بیە بە سەرگوزشتە. ژەنېوە شۆڕشگێڵنەو سەرمەشقەو، گۊرۍ بۍ. رەمزێوە بۍ پۍ ئانیشا کە دلۍ گلېرگەینە تەنگوچەڵەمەشا توش بۍ، ڕا نیشاندەرە بۍ. هامڕۍ ڕابەر ئاپۆی بۍ، تا دما نەفەس ڕێوگار و شۊنکۊتۍ شۆڕشگێڵنا پېسە هەڤاڵ سارۍ بیمۍ".