جە زینانەکا تورکیاینە نزیکەو ٢٥٠٠ زینانیا سیاسی ۋەرنیشتی و ۋەرکۊتی هەنۍ. توهای-دەر  سەبارەت بە ئاژەو ئا زینانیا کە جە مافە یاساییەکاشا ئیسفاڎە نمەکەرا ئەرەیاۋناش؛ ڕاشا پنە نمەڎریۆ چنی بنەیانەکاشا کوۍ باوە، هەرپاسە نمەتاوا چەمشا بە پارێزنەرەکاشا گنۆ.

چەتین ئویار هامسەرۆکو توهای-دەرو وانی، سەبارەت بە ئاژەو زینانیا چنی ئاژانسوو فوراتی قسېش کەرڎۍ و واتش: "بنەیانە ۋەرنیشت و ۋەرکۊتیەکۍ نمەتاوا چنی ڕۆڵەکاشا کوۍ باوە. ۋەرو ئانەی نەتاوانشا پارێزنەر پەی کەسوکارە زینانیکریایەکاشا پېڎا بکەرا، ڕاشا پنە مەڎا چنی ڕۆڵەکاشا دیدار ئەنجام بڎا و ئیجازەو چەمپنەکۊتەیما پنە مەڎریۆ. فرەو ڕۆڵەکاشا جە ژووری تاکەکەسینە مەناوە، جە ژووری تاکەکەسینە تەنیا واردەشا پنە مڎریۆ، ئیتر پەنەوازیەکۍ تەرێشا چنە قەڎەغە کریان.

'دوورۍ وزیاوە پەی شارەکا ۋەرنیشتوو تورکیای'

ئویار ئاشکراش کەرد بە تایبەتی ئا زینانیۍ سزای هەتاهەتاییشا سەرەرە مسەپیۆ؛ جیای ئانەی ڕەوانەو زینانەکا وان، ئامەدی و مێردینی بکریا، دوورۍ وزیاوە پەی زینانەکا ۋەرنیشتوو تورکیای و واتش: "ئاژەی ئابووری و پەیوەندی کۊسپا ۋەردەمو بنەیانەکانە کە بتاوا بە ئاسانی سەردای کەسوکارەکاشا بکەرا. ئێمە پەی ئانەی ئا زینانیۍ بتاوا جە مافی یاساییەکاشا بێبەشۍ نەبا ئینایمۍ کۊششو ئەوەکۊشاینە و هامکارییشا مکەرمۍ ۋەرو ئانەی دەرفەتەکېشا فرە کەمېنۍ تەنانەت جل و بەرگ و پاڵێشا نییەنۍ. پۊکەی داوا جە شالیارو دادی و کۆمیتەو ئەوەکۊڵیای پەرلەمانی مکەرمۍ؛ هەوڵبڎا ۋەربەسەکاشا هۊرگېرا پەی ئانەی بتاومۍ بە ئاسانی هامکاری زینانیا بکەرمۍ چی ئاژەنە. زینانیا ۋەرنیشتی و ۋەرکۊتی بێ پاڵێنۍ."