گۆشەگیریی ئیمراڵی کۆنسەو مافەکاو ئینسانوو نەتەوە یۆگێرتەکانە تاوتۆ مکریۆ
چا کۆنفرانسەنە کە جە چوارچوەو ٥٦ەمین ئەرەنیشتەی مافەکاو ئینسانوو نەتەوە یۆگێرتەکانە مکریۆ، گۆشەگیریی سەروو ڕابەروو گەلوو کوردی عەبدوڵا ئۆجالانی تاوتۆ مکریۆ.
ڕابەروو گەلی کوردی عەبدوڵا ئۆجالان ٢٥ ساڵێن زیندانوو ئیمراڵیینە هەلومەرجی تندەنە دا گۆشەگیر کریان، زیاتەر جە ٤٠ مانگان هیچ زانیارییێوە بارەشۆ نییەن.
کۆمیتەو ڕاگێری جە ئەشکەنجەو کۆنسەو ئەورووپا (سی پی تی)، کە تاکە لایەنا متاوۆ بلۆ ئیمراڵی و پی مانێ وەرپەرسا جە گۆشەگیری، درێژە بە بێدەنگییش مدۆ.
پەی ماڕای ئی بێدەنگییە و پەی وەرپەرسکەردەی گلێرگەی میاننەتەوەیی تشرینوو یوەموو ٢٠٢٣ ێـوە بە داواو "ئازادیی پەی عەبدوڵا ئۆجالانی، چارەسەری سیاسی پەی پرسەو کوردی" کەمپەینێوی جیهانی دەسش پەنە کەردەن.
جمیەروو دۆسایەتیی گەلا دژوو نەژادپەرسی (مراپ) کە وەڵتەرێ ڕاو ڕاپۆرتا و ئەرەیاونایەکاوە گۆشەگیری ئیمراڵییش کەردەن پەرسەو ڕۆو کۆنسەو مافەکاو ئینسانوو نەتەوە یۆگێرتەکا، وێش ئامادە مکەرۆ تا جە ئۆفیسوو ژنێڤوو نەتەوە یۆگێرتەکانە بە ناموونیشانوو "مافەکاو ئینسانی تورکیانە" کۆنفرانسێوە مگێرۆ.
چوارچوەو ٥٦ەمین ئەرەنیشتەی مافەکاو ئینسانو کۆنسەو مافەکاو ئینسانوو نەتەوە یۆگێرتەکا، کە ١٨و حوزەیرانی دەسش پەنە کەرد و تا ١٢و تەمووزی بەردەوام مبۆ، بابەتی سەرەکیی ئەرەنیشتەی ٣ێ تەمووزی دەربارەو هەلومەرجوو گۆشەگیریی سەروو ڕابەروو گەلوو کوردی عەبدوڵا ئۆجالانی و هەرمانە نایاساییەکاو دەوڵەتوو تورکی کوردستانەنە مبۆ.
ئەرەنیشتەکەی لاو نوێنەروو جمیەروو دۆستایەتیی گەلا دژوو نەژادپەرستی (مراپ)وو نەتەوە یۆگێرتەکاوە، جیانفرانکۆ فاتۆرینی مبریۆ ڕاوە. پارێزنەراو نویسگەی یاسایی سەدەی، ئیبراهیم بیلمەز و ئەنداموو پەرلەمانو ئەوروپای لاورا کاستێل فۆرت و سیاسەتمەداروو کوردی فورات ئانلی، پێسەو قسەکەری بەشدارێ ئەرەنیشتەکەی با.
