جیهان خالدە، هامڕاو زارۆڵەیی گەشمەرڎە زەلال زاگرۆس (فریاڵ سلێمان)ێنە، باسوو ژیۋای گەشمەرڎە زەلالۍ و کاریگەرییەکاش پۍ کەردیمۍ. جیهانە پی جۊرە باسش جە یاڎەوەری زارۊڵەیی ۋێش کەرد:

 "من و زەلالەی هامڕێم تا تەمەنوو ١٥ ساڵی جە یانێوەنە گۊرۍ بیەیمۍ، جە کەسی توڕۍ نەبۍ و کەسیچ چنەش توڕە نەبۍ، چنی گەورە و گولانەی پێسە یۊی هەڵسوکەوت کەرۍ، بە ۋۍ نەویستی ئشناسیێبۍ، مشۊم ۋەروو ئانەی بۆ کە"گردی وەش سیۍ و قەڎرش زانێنۍ. ئاڎە کاریگەریێوە بەقوەتش سەروو منیچ بۍ".

یاڎەوەریێوەم جە یاڎا کە قەد ویرم مەشۊوە؛ جە دەگاگێمانە بیرێوە بۍ و وەختۍ لوێنمۍ پۍ وای ، دلۍ ترۊمبێلەکەینە دەسم بەرز کەردۆ تا خواحافیزیش چنە کەروو، ۋەروودەم و بیرەکێنە نیشتێبێرە و چەمەکێش پەڕۍ بیێبێنۍ جە هەڵسا، پێسە ئانەی واچۆ چۍ مەلە جیام نمازە. پێسە بۍ چا وەختەنە بەشێوە جە جەستەیم چا جیا ئاستەبۆ. دماو ماوێوە ئاڎێچ ئامۍ لاو ئێمە. چونکی گۊرۍ یانەی بۍ، ناچارە بۍ گرڎوو ۋەرپرسیاری واڵە و براکاش بگێرۊنە ئەستۆ کە لە تەمەنێوە کەمەنە بێنۍ و وەنای وەنێنۍ. حەرچنڎە ئاڎە نەوانۍ، بەڵام کەسێوە زیرەکە بۍ و جە وەناکەیشانە یاردەی واڵە و براکاش دۍ. وەڵۍ ئانەی بلۆ ڕیزەکاو کۊشیای ئازاڎیی، جە ماوێوە کەمەنە هەم عەرەبی و هەم کوردی فێرە بیە. زەلالە هەمیشە کەسێوە سەرمەشقە بۍ و هێزوو ئانەیش بۍ کە جە تەمەنوو ۋێش زیاتەر هەرمانە کەرۆ و ئەنجامیچش دان.

'زەلالە کەسایەتیێوەبۍ کە بە ئازاییۆ وەعدەکاش جابەجێ کەرۍ'

جیهان خالدە باسش چانەی کەرد کە بنەیانەکەش وەڵتەر وڵاتپارێز بیەن و واتش: "زەلالە شۊنکۊتۍ نەریتوو بنەیانەکەیش بۍ، حەرپاسە جە ساڵەکا نەوەکانە پۍ ئانەی هامکاریێوە گولانەو گەریلای کەرمۍ، وەزی و پەمە نیێنمۍ و ورەشێنمۍ. چا وەختەنە جە تەمەنوو ٧ ساڵییوە تا تەمەنوو ٧٠ ساڵی، پۍ یاردەیدای وڵاتی گرڎ دلۍ سەفەر بەریینە بێنۍ. چا وەختەنە گەشمەرڎەبیەو هەڤاڵ ڕێناس، عادڵ و عەدنانی کاریگەری قووڵشا سەروو زەلالۍ وەش کەرد و وەعدوو هۊرگێرتەو چەکەکاشا داش. زەلالە یووە بۍ چا کەسا کە خاوەن ئازایێوە پاسەی بۍ کە وەعدەکا جابەجێ کەرۆ.

گەشمەرڎە زەلالە ساڵەو 1993 پی ئەنەیاوایۆ ۋەرپرسیاری بەشداریش جە ڕیزەکاو کۊشیای ئازاڎیوازی گەریلایۆ کەرد و ئەرکوو بەدیئاردەی ویست و وەشەسیایی ۋێش پۍ دۆزوو ئازاڎیی کوردی پێسە شەرتەو دڵسۆزی و وڵاتپارێزییوە جابەجێ کەرد. بەشداری زەلالۍ هێزێوە جیاوازش بە ئێمە بەخشا و بیە بە سەرچەمەو مۆڕاڵی. زەلالە یووەم گەشمەرڎۍ ئێمە نییەنە، گەشمەرڎە فەواز جە سەرەتاو نەوەڎەکانە پەیوەندیش بە قافڵەو گەشمەرڎاوە کەرد. جە ساڵەو ١٩٩٥ چنی گروپێوە کە گۆرانی مامۊزاش چنەش بۍ، ڕاش بەرەو کەشە ئازاڎەکا کوردسانی دەسپنەکەرد. دماو ساڵێوە نامێوەش پۍ نویستێبێنمۍ و واتەبێش: "سەرەو ڕێزیما پۍ یاڎوو گەشمەرڎا منامنمێرە، چا وەختەنە گەشمەرڎەبیەو فەوازی و گۆرانیما نەزانابۍ، بەڵام دماتەر ئاگاڎاروو گەشمەرڎەبیەو ئا هەڤاڵا بیەیمۍ".

جیهان خالدە دماو چنڎین ساڵا گەشمەرڎە زەلالۍ وینۍ و پی جۊرە باسوو ئا ساتە وەختەیە کەرۆ:

"ڕۊو جەژنۍ بۍ، زەلالە پۍ ئەوەڵجاری تەلەفۆنش پۍ کەردیمۍ و ئەحواڵپەرسیش چنە کەردیمۍ، واتش ئاژەش خاسا، کەش وزێوە جیاوازش پنەبەخشۆ و چاڎیچ پێسە ئانەی جە ئەڎۍ بیێبۆوە، پاسەن". ئێمەیچ وەعدما دا شۆن کۊتۍ ئاڎۍ بیمۍ ".

جیهان خالدە دەربارەی ئا هجوما کە ۋەران ۋەروو گەشمەرڎە زەلالۍ کریێنۍ قسێش کەردۍ و واتش: " زەلالە دماو ئانەی ماوێوە فرە کەشەنە بۍ، دماتەر لووا پۍ ئەرمەنستانی و پۍ ماوەو شش ساڵا چا خەباتش کەرد. وەختۍ گێڵاوە پۍ ۋەرنیشتی ماوێوە جە هەرێموو جزیرەینە مەنۆ. دماتەر جە بەینوو ساڵەکا ٢٠١٧ پۍ ٢٠١٩ ینە درێژەش بە کار و خەباتی دا و چا ماوەنە ڕوبەروو حۊڵوو تیرۆرکەردەی بیۆ. ئی هجومە جە هەمانوەختەنە جە دژوو جمیەروو ژەنا ئازاڎیی ئەنجام دریا. من ماچوو جمیەروو ژەنۍ، چونکی زەلالە گرڎوو ژیۋایش پۍ خەتەو ئازاڎیی ژەنۍ مەیسەرکەردەبۍ. بۆمبێوەشا چەسپنابۍ پا ترۊمبێلۆ کە زەلالە بەکارش ئارۍ، بە ڕێکەوت چا وەختەنە زەلالە دلۍ ترۊمبێلەکەینە نەبۍ، داخەم مەشۆ دماو ئەوەتەقای بۆمبەکەی، سایەقەکە گەشمەرڎە بی".

جیهانە باسش چانەی کەرد؛ دماو ئی هجومەیە، گەشمەرڎە زەلالە بەبێ ئەرەبڕیەی درێژەش بە کار و خەباتی دا و واتش: "ئی جارە زەلالە لووا پۍ دێرەزوری و ساڵۍ چا خەباتشکەرد. زەلالە واچۍ 'جە کەشەنە زیاتەر هەست بە نزیکی جە ڕابەرایەتی کەروو ' پۊکەی هەمدیسان لوواوە پۍ کەشی".

'دما جار کە زەلالەم دیە فامم کەرد کە جارێوەتەر مەوینووشۆ'

جیهان خالدە باسش جە مەڵامەتوو گومانەکا ۋێش دەربارەو لووای گەشمەرڎە زەلالۍ پۍ پانیشتوو کوردسانی کەرد و واتش: "جە ٢٠١٣ەنە ئا وەختەی زەلالە جە ئەرمەنستانۆ گێڵاوە، جە تەرەفوو پەدەکەیۆ گیریا، بە زەحمەت ۋێش جە دەسوو پەدەکەی نەفرەتی ڕزگار کەردەبۍ. پۊکەی ئی لوواو دما جاریش پۍ پانیشتی تەرسیش وستە دڵمۆ. چونکی مزانمۍ پەدەکەی خاین، بە پاو ویستەکا دوژمنوو گەلوو کوردی جمۊوە و زەمینەسازیش پۍ چنڎین هجوما کەردەن. لاو گرڎ کەسیۆ ئاشکران، کە ئەندامەو ناوەنڎیی پەیجووری ژنۆلۆژی ناگیهان ئاکارسالە جە سلێمانی، شیلان گۆییە (تایبەت بیلەن) سەروو ڕاو مەخموریۆ جە تەرەفوو پەدەکەیۆ گەشمەرڎۍ کریۍ. ۋەروو ئی مەڵامەتیە لووای زەلالۍ تەرسی و گومانەکێمش زیاتەرۍ کەردۍ".

'زەلالە ڕاو کۊشیای سارێش گێرت'

جیهانە هەستوو ۋێش جە بارەو گەشمەرڎەبیەو زەلالێوە پی جۊرە گێڵناوە: "زەلالە هامڕۍ ڕابەر ئاپۆی بۍ. هەر چا ئاشناو سارۍ و بەسێ و دەلالا بیە. چاڎیشاوە مانایی فرێش بە ژیۋای ۋێش بەخشا. چا وەختەنە کە خجڵەو کار و خەباتی ئازاڎانەیش بۍ، هەر چا وەختەنە دیسان پەدەکە بە دەوروو خیانەت کارانەو ۋێش ورئێست و بە پیلانگێڵنیێوە خیانەتکارانە زەلالەش گةسمەرڎۍ کەردە، ۋەروو ئانەی پێسە سارۍ، وەرپرسیاری خەباتوو گەلیش وستەبۍ سەروو شاناش ".

جیهان خالدە جە دمادمایی قسەکاشەنە باسش جە کۊشیای زەلالۍ کەرد و واتش: "زەلالە جارێوەتەر باوەڕ و قەرارداریش بە ئاخێزی ویر وستیمۍ. بە دڵسۆزی و کۊشیایۆ درێژە پنەدەروو ڕاو گەشمەرڎا بیمۍ و ئا ئازاڎییەی بە دەسوو ئاڎیشا پێکئامان، بە گوڕتەرش کەرمۍ. گەشمەرڎە زەلالە سەروو بازوو وڵاتپارێزیوە بۍ، بەگرڎوو ژیۋایش بە دڵسۆزیوە خەباتش کەرد. بەبێ سنور عاشقەو ژیۋایۍ بە مانای بۍ".