شارو بێرنو سویسراینە مەراسیمێو پەی گەشمەرڎا ڕێک وزیا. جە کەسێتیی گەشمەرڎا ئەجە یەڵماز (ئەدەسا جەژنا)نە، کە ١٤ تشرینو یوەمو ٢٠٢٣ دێرسیمنە گەشمەرڎێ بییە، دلارا ئۆڵمەز (ئەکین ڕۆدی) و کەمال مەروان عوسۆ (جانشێر شێراوا)، کە ١٩و ئادارو ٢٠٢٤ زاپنە گەشمەرڎێ بیێ، تەمامو گەشمەرڎا یاڎێ کریێوە. ئەندامو کۆنسەو ڕاوەبەریی کەجەکەی زوبەیر ئایدار و قەومو گەشمەرڎا و سەدان کەسێ بەشدارێ بێنێ.

یاڎەکە ناوەندو جڤاکو کوردی دیموکراتیکینە کریا، دماو دەیەقێو ڕێزگێرتەی باس جە کۆشیای گەشمەرڎا کریا.

هونەرمەند کاوە ئورمیە ئەرەیاوناش، گەریلێکێ چوارپارچەو کوردستانینە فرسەت بە دوژمنی نمەدانێ و پەی ئازادی جەسەیی ڕابەرو گەلو کوردی عەبدوڵا ئۆجالانی و ستاتۆی پەی کوردستانی کۆشیا، واتش: "کۆشیای گەریلاکاما ڕاما ڕۆشنە مکەرۆوە، ئێمە وەرمو گەشمەرڎا بەدی مارمێ، باوڕما پینەیە هەن و وەعد مدەیمێ".

بە نامێ کۆماو، سەعادەت کورانیوە واتش ئێمە تەنیا نمەواچمێ گەشمەرڎێ نمەمرا، بەڵکوم درێژە بە ڕێشا مدەیمێ.

بە نامێ بنەیانەو گەشمەرڎە ئەدەسا جەژنایۆ، مامۆسا گەرناس کۆچەر گەشمەرڎێش یاڎێ کەرڎێوە و واتش: "ئێمە حەرچەند فەلسەفە و کۆشیای گەشمەرڎاما موینمێ، ئاندە وێما بە قەرزارێ گەلو کوردستانی و گەریلای و ڕابەر ئاپۆی مزانمێ".

دمایی وەختو بەخاکسپارای گەشمەرڎە ئەدەسایش ویر ئاردۆ وەختێو هەزاران ئینسانێ کورڎێ ئێلحنە خاوەندارییشا وەنەو گەشمەرڎەکەیشا کەرد و واتش: "دوژمن ڕاش نەدا ژوورێو پەی مەراسیمەکەی دابین بکریۆ، بەڵام گەلو کوردی پێسەو هەمیشەی پارێزگاری وەنەو گەشمەرڎەکەیش کەرد و ڕۆحو مدرامانی و سەرکەوتەی نیشانە دا. پەوکای دوژمن تەرساێنە نەتاواش دەس وزۆ دلێش. ئینەیچ جۆشێوی گەورە جە چوار پارچەو کوردستانینە وەش کەرد و بە ڕۆحو گەشمەرڎە ئەدەسا دوژمنێوە تەرسنیا".

بە نامێ بنەیانەو ئەکین ڕۆدی، زوڵفو بینبر واتش کۆشیای هامڕایەکاما تەرسی گەورێش وستە دڵو دوژمنیوە، واتش: "تەکنۆلۆژیاو جەنگی تایبەتو دەوڵەتو تورکیایشا پووچەڵ کەردۆ. وەرمو گەشمەرڎا مارمێ دی، تا گردو کوردستانی و گەلو کوردی و ڕابەر ئاپۆی ئازاد نەبۆ، دەس جە دۆزەکەیما ورنمەگێرمێ".

دمایی سینڤزیۆنێو پەی یاڎو گەشمەرڎا نیشانە دریا، بانگەواز کریا پەی بەشداربییەی جە کۆبییەیۆکەو سەبای ستراسبۆرگی.

یاڎەکە بە درووشمو "گەشمەرڎێ نمەمرا"ی دماییش ئاما.