گەشمەرداو پاریسی یاگۍ گەشمەرڎەیشانە یاڎۍ کریێوە
ژەنە شۊڕشگێڵناو کوردی کە لاو دەوڵەتوو تورکیوە تیرۊرۍ کریێ، پاریسنە یاڎۍ کریێوە، یاڎەکەنە داوا کریا گۊشەگیری لا بریۊ و پەکەکە جە "لیستوو ڕێکوزیا تیرۊریستییەکانە" بەر کریۊ.
٣ ژەنۍ شۊڕشگێڵنۍ کوردۍ ساکینە جانسیزە و فیدان دۊگانە و لەیلا شایلەمەزە پاریسوو پایتەختوو فەڕەنساینە لاو دەوڵەتوو تورکیوە تیرۊرۍ کریێ، وەرڎەموو فەرمانگەو زانیاریی کوردستانینە یاڎۍ کریێوە. گەلوو کوردی و دۊسەکێشا فەڕەنسانە و چندین کەسۍ تەرۍ بەشدارۍ بیێ.
قسەکەروو هەرمانوکاروو بەروو جڤاکی دیموکراتیکوو کوردی فەڕەنسانە (جەدەکە-فە) بێریڤان فوراتە واتش میت ئینا پشتەو کۊکوشییەکەیۊ، وەلۍ بۊنەو پەرەدەپۊشکەرڎەی دۊسیەکێوە لاو دەوڵەتوو فەڕەنسایۊ، کۊکوشیی دووەم ڕووەش دا، ئەڤین گۊییە و عەبدولرەحمان کیزیل و میر پەروەر تیرۊرۍ کریێ، مەبۊ فەڕەنسا کوردی پەی بەرژەوەندییەکاش بەکار بارۊ.
نوێنەروو شارەوانوو هەرێموو دەهەمینوو پاریسی، ئێلی جوسیان ڕەخنەش وەنەو هەڵوێستوو دەوڵەتوو فەڕەنسای گێرت و واتش ئێمە تا دمایی کۊشیەیمۍ پەی پارێزنای کوردا. گردش خوڵکە کەردۍ پەی تەماشاکەرڎەی ئا فیلمەو وێرەگایە هەرێموو دەهەمینوو پاریسینە نیشانە مدریۊ.
واتیچش: "ئێمە بەرڎەوام داواو ئازادیی ڕابەروو گەلوو کوردی عەبدوڵا ئۊجالانی و کوردستانی سەربەوێی کەرمێ، پەی گلێرگێوی سەروو بناغەو یەکسانیی ژەنۍ و پیای کۊشیەیمێ".
بەنامی تەڤگەروو ژەناو کوردیوە ئەورووپانە و تەڤگەروو ژەناو کوردیوە فەڕەنسانە، خانۍ ئاکدۊگان دوا، ئاماژەش پانەیە کەرد، سەرەڕاو هەزاران ساڵا جە هجوومی وەلۍ گەلوو کوردی تا مۍ قەوەتتەر بۊ و واتش: "کورد بە سەرمەشقایەتیی ڕابەر ئاپۊی و فەلسەفەکەیش ڕۊ بە ڕۊ زیاتەر جە ئازادیی نزیک بۊوە".
وەرپەرسیی میاندەوڵەتیی پارتی کۊمۊنیستوو فەڕەنسای، ڤینسێنت بۊڵوت ئاماژەش پانەیە کەرد، کۊکوشییەکۍ مایۍ شەرمینۍ پەی فەڕەنسای واوەی واتش: "پەنەوازا کۊشیەیمۍ پەی ئازادیی زیندانیاو کوردی جە زیندانەکاو ئەردۊگانینە، داوا کەرمۍ پەی لابەرڎەی گۊشەگیری سەروو عەبدوڵا ئۊجالانی".
ئینجا پەشتیوانیی پارتەکەیش پەی کۊشیای دادپەروەری و مافی نەتەوەیی و چاندوو گەلوو کوردی ئەوەخوای کەردۊ.
بە نامۍ تەڤگەروو کۊشیای دژوو نەژادپەرسی و دۊسایەتیی گەلا، ڕێنۍ لۍ میگنۊت، ئاماژەش پانەیە کەرد ئەگەر پەکەکە لیستوو ڕێکوزیا تیرۊریستییەکانە بەرکریۍ ئی تاوانۍ ڕووە نەدێنێ، پەکەکە ڕێکوزیێوە تیرۊریستی نییا، پەکەکە دژوو داعشی و تیرۊریسا گژیۊ و فرە قەرزارێشانمێ.
بە نامۍ کۊمەڵەو (Franco-kurdistan)، سیلڤیا جان ئاماژەش پانەیە کەرد، ئاستەیۊ پەکەکەی دلۍ لیستوو تیرۊرینە هەوڵێوەن پەی تاوانبارکەرڎەی کوردی. پەوکای بەرکەرڎەی پەکەکەی چی لیستەنە نەوەک هەر پەی کۊشیای کوردی، بەڵکوم پێکئامای دادپەروەری و ئاشتی میاننەتەوەیی گرنگێنێ.
