سەرۆکو سەندیکاو پارێزنەرا ئامەدی عەبدولقادر گولەچ باسش چانەیەکەرد کە دۆخو مافەکا مرۆڤی تورکیانە فرە خراپا و ئانەش وست ڕووە کە پاشێلکەردەی مافەکا پەیوەندیش بە پرسو کوردیۆ هەن.
سەرۆکو نوسینگەو پارێزنەرا ئامەدی عەبدولقادر گولەچی ئەرەیاوناش، کە پرسو کوردی سەرچەمەو پاشێلکەردەو مافەکان و ئەرەیاوناش، کە مشۆم پرسو کوردی بە رێبازی دیموکراتیکی و ئاشتیانە چارەسەر بکریۆ. گولەچ ویرش وستیمێ کە جاڕنامەو گەردوونی مافەکا مرۆڤی جە لایەن و کۆمەڵەو گردی نەتەوەیۆگێرتەکا پەسەن کەیان، نەخشەڕێوەن کە مافەکا ژیانی مسۆگەر مکەرۆ. گولەچ سەرنجش پەی سەرو پاشێلکارییەکا مافەکا مرۆڤی جە مەنتیقەکا جەنگینە کێشت و ئانەش وسڕوور کە مشۆم گلێرگەو مییانەتەوەیی زیاتەر سەرو ئا پرسە هەستیارەیە بۆ. گولەچ سەرنجش پەی سەرو کردەوەکا وەڵینو ئا گروپا کێشا کە دماو وڕناو رژێمو سوریای ئاما سەرو حوکمی و واتش، " هرووژم مکەرا سەرو یانە و گیانو گەلی. هیوادارێنمێ گلێرگەو مییانەتەوەیی و هێزە رۆژئاواییەکێ بە شێوێوە جدی مامەڵە چنی ئا دۆخەیە کەرا و پەی ئانەی زەرەر وەرو کەسا مەدەنی نەکنۆ هەنگامێ پەنەوازێ هۆرگێرا".
'مافەکۍ مرۆڤی پاشێلۍ مکریا'
گولەچ ئانەش وست ڕووە، کە دۆڵەتێ پێسەو تورکیای ئەندامو ئەنجومەنو ئەوروپاین و پەیماننامەو مافەکا مرۆڤیش ئەوروپانە ئیمزا کەردەن و دانش بە دادگاو مافەکا مرۆڤی ئەوروپانە نیان، بەڵام جە گرتووخانەکانە کێشێ گۆرێ زەقێ هەنێ و واتش، "٦٥٠ زینانیێ نەوەشێ تائیسە جە زینانەنە راگیریێنێ. چیای ئانەی دەمودەس ئازادێ کریا، مافو دەس یاونایی بە خزمەتگوزارییەکا تەندروستی ئاستەنگ کریۆ پەیشا. ئەر مافو دەسیاونای بە خزمەتگوزاری تەندروستیشا نەبۆ، هرووژم کریۆنە سەرو مافو ژیوایشا. بە تایبەتی فشارەکێ سەرو پاڕێزنەرەکا چڕبییەنۆ و گێرتەی و دادگاییکەردەی بەردەواما. جەلێوەتەرۆ جە رووەو ئازادی ئەرەیاوییای کێشێ گۆرێشا هەنێ. جە دژو رۆنامەوانا گوشار و ئۆپراسیۆن ئینا ئارانە. ژمارێوە فرە دەستبەسەرکریێنێ. ئا مامەڵەکەردەیە بێزارما مکەرۆ. بەڵام داخەم مەشۆ دادگا سەربەخۆ نییا، دەسەڵاتو دادوەری سەربەخۆ نییا".
'تورکیا جە رووەو مافەکا مرۆڤیۆ شکسش ئاردەن'
گولەچ دەسنیشانش کەر کە تورکیا جە بوارو پاشێلکەردەو مافەکانە شکسشواردەن و پی جۆرە بەردەوام بێ: "تورکیا بە پاو قەرارەکا دادگاو مافەکا مافو مرۆڤو ئەوروپای مەجوڵیۆوە. ئانەیچ بەرش وسۆ کە تورکیا شکستش ئاردەن. گەرەکم نییا تورکیا جە بوارو مافە گەردوونییەکانە سزاش سەرەرە سەپیۆ، بەڵام مشۆم داواکارییەکاشا جابەجێ کریا. هەر چێکۆ گەرەکمانە بانگەوازێوە ئاراستەو ئەنجومەنو ئەوروپا کەرمێ؛ جەبارەو ئا پاشێلکارییا مشۆم هەستیارانە مامەڵە کەرا. مشۆم جە وەراوەرو ئا دۆڵەتاوە کەقەرارەکاو دادگای جابەجێ مەکەرا، پەی جابەجکەردەو پەیماننامەو مافەکا مرۆڤی ئەوروپانە ڕای پەنەوازە گێرانەوەر. داخەمەکێم دۆخو مافەکا مرۆڤی جە تورکیانە ئینا دۆخێوە فرە خراپەنە".
پرسو کوردی
گولەچ هێماش بە پاشێلکارییەکا مافەکا مرۆڤی جە تورکیانە کەرد و ئانەش وست ڕووە، کە راسەوخۆ ئا پاشێلکارییا پەیوەندیشا بە پرسو کوردیۆ هەن و پی جۆرە دمایش بە قسەکاش ئارد: "تاومێنە بە ئاسانی واچمێ کە چارەسەرنەکەردەو پرسو کوردی بۆنە مایۍ پاشێلکاری زەمینەو مافەکا مرۆڤی. ئەر رۆنامەوانی ئینێ زینانە، ئانە لێکەوتەو ئانەین. ئانە راستەوخۆ جە ڕاو سەپناو سیاسەتو گۆشەگیری جە زینانەکا ملۆڕاوە و بە چارەسەرنەکەردەو پرسو کوردی بەسییان. پەی ئانەی پاشێلکارییەکۍ مافی جەئارانە نەمەنۆ مشۆم سەرەتا پرسو کوردی بە ڕاو دیموکراتیکی و ئاشتیانە چارەسەر بکریۆنە. ڕاو و رێبازو ئانەیچ دیارا"
