چالاکوانە و تەژەئای گوڵسەر یەڵدرمە جەبارەو یۆبییەی و کۊشش و ڕېکوزتە و ژەنا کورڎی قسېش کەرڎې و واتش: "هیواما هەن، بەڵام تەنیا هیوا وەسې نییا. مشۊم ڕېکوزتەی، کۊشش و یۆبییەی فراوان کریۆنە."
دماو بانگەوازو "ئاشتی و گلێرگە و دیموکراتیک"و ڕابەر ئاپۆی چنین مێڏانێ خەباتینە دەسش پنە کەرد. جە سەرنیشتوو کوردەسانینە جموجوڵو ژەنا پەی گلێرۆبییە و گەلی سەرنج ڕاکێشا. ژەنی بە ئامانجو 'ڕێنسانسو ژەنا' دەسشا بە خەباتی کەردەن و سەرمەشقایەتی پرۆسەو ئاشتی مکەرا، جە چوار بەشوو کوردەسانینە ئەوەکۆشای هامبەش ئەنجام مرەیمێ. چن ڕوێ چێوەڵتەر کۆنفرانسو پەرلەمانتارا ژەنا کوردی پەی یۆبییەی نەتەوەیی ئەنجام دریا. ژەنێ پەرلەمانتارێ جە چن شارێ کوردەسانیۆ بەشداریشا جە کۆنفرانسەکەی کەرد، پەرسەکا ژەنا، بانگەوازو ئاشتی و دەور و ژەنا جە پرۆسەکەنە تاوتوێ کریا. جە کۆنفرانسەکەنە ئەنجامی گرنگ بەرکەوت، پەی مسۆگەر کەردە و یۆبییەی سەر و زەمینەو ڕێکوزتەی هامبەشی گلێرێ بیێوە.
بەشداربییەکێ کۆنفرانسەکەی چالاکوانێ تەڤگەرو ژەنا ئازادی (تەژەئا) و پەرلەمانتارە و هەدەپەی گولسەر یەڵدرمە جەختش جە گرنگی یۆبییە و ژەنا کوردی و ئەوەکۆشای هامبەشی کەردۆ. گولسەر یڵدرمە واتیشش، "ئی هەنگامێ دما کەوتێنە، بەڵام هەنگامێوە فرە ئێژانە. مشۆم ئێش و چوار بەشو کوردەسانی بە وەرپرسیارێتیێ هامبەش و هەڵوێسێوە هامبەش هورسەنگیۆ".
هەنگامێ کە ئەشیێ گیریێنە وەر
گوڵسەر یەڵدرمە جە سەرەتاو قسەکاشەنە ئاماژەش بە ئەرەیاوناکە و ڕابەر ئاپۆی کەرد و هەرپاسە سەرنجیش وست سەر و ئانەی کە ئیتر یۆبییە و بەینو کوردا پەنەوازیێوەن مشۆم دما نەوسیۆنە و واتش: "ئی فکرە هەنگامێوە دما کەوتەن، بەڵام ئەشیێ گیریێنە وەر. حەر یۆ جە ئێمە زوڵم سەر و گەلوو کوردی، فشار سەر و ژەنێما هورسەنگان و هەڵوێسێوە هامبەشما جە وەراوەر و ئا زوڵما تاوتوێ کەرد."
وەراوەر و پەرسەکا ژەنا پەنەوازیش بە ناڕەزایەتیێ هامبەش هەن
گوڵسەر یەڵدرمە ئاماژەش بە جە قەنارەدای ژەنا کوردی جە ئێرانەنە کەرد و واتش: "پێسە و پەرلەمانتارا ژەنێ کوردی، سەر و ئانەی قسێما کەردێ جە وەراوەر و ئینەینە خاوەن هەڵوێسێوە چنینێ بیمێ. ئینە تەنیا پەرسە و ئێرانی نییا، پەرسە و تەمامو گەلوو کوردین."
سەر و نەریتو کوردا خەبات مکەرمێ
جە بەردەوامی قسەکاشەنە گوڵسەر یەڵدرمە ئاماژەش پانەی دا جە کۆنفرانسەکەنە جە دێرسیم تاوەکو ئەنفال، جە وەرنیشتۆ تاوەکو لەیلا قاسم و ئارین میرکان بە شێوێ هامبەش یاڏش وستیمێ و جەختش چانەی کەردۆ کە ئا هامبەشییێ زەمینەو ئەوەکۆشای هامبەشا بە هێز کەردەن و واتش: "پێسە و هەنگامێوە سەرەتای مشۆم پێسە و چێوێ بەرهەمدار و هیوابەخش تەماشە کریۆنە. ئانە و وێما منییەیمێرە ئانەن کە خەبات سەر و نەریتێوە کوردەسانی مکەرمێ. واتە گەرەکمانە ژیوای، ژیوگە و زەمینێ پەی گرڏ و ئایین، گەل، شوناس و ڕەنگەکا بنیاد بنییەیمێ. مشۆم پەی ئینەیچ ئینسان بە هیوا بۆنە. مەبۆنە ئی هەنگامێ کولانێ تەماشە کریۆنە، بەپێچەوانە مشۆم فراوان و بە گلێرگەی کریۆنە."
هیوا وەسێ نییا، پەنەوازیش بە ڕێکوزتەی هەن
جە دماین و قسەکاشەنە گوڵسەر یەڵدرمە ئاماژەش پانەی دا پەی نەریتێوە هامبەش، ژیوایێ هامبەش و زەمینەو ئازادی کوردا ئەوەکۆشای پەنەوازییا و واتش: "هیواما هەن، بەڵام هیوا وەسێ نییا. مشۆم ڕێکوزتەی، خەبات و یۆبییەی فراون کریۆنە. ژەنێ سەرمەشقێ ئی پڕۆسەینێ."
