مڏرامان بەنداو تشرینینە ٢٢ ڕوێن بەردەواما. فەرماندە حاجی حەسەکە واتش: " ئاڵاو مڏرامانی گرد کاتێ شۆکیۆوە. بڕوا و مۆراڵما بەرزا. ئەرەگیرا ماڕمێنە. هەر تەکنیکێوە بەکاربارانە، جەنگاوەرێما ئاماڎێنێ پەی مڏرامانی".
دۆڵەتو ئەرەگیرو تورکی و چەتەکێش جە ٨و کانوونو یوەمینە بە شێوێوە قورس هرووژم مکەرانە سەرو بەنداو تشرینی و دەوروبەریش. جە وەراوەرو هرووژمە ئەرەگیرەکانە، جەنگاوەرا قەسەدەی، یەپەژە و ئەنجومەنو سەروازی مەنبەجی هەڵمەتەو "گەشمەرڏە عەزیز عەرەب"یشا دەسپنەکەرد و گورزەی قورسەشا جە ئەرەگیرا دا. جە چوارچێوەو هەڵمەتەو جوابدایۆینە، دەگاو قژلێ جە سەرنیشتوو بەنداو تشرینینە، خربەت توێنە و مەحشەت تەواحینیش سەر بە مەنتیقەو ئەبو قەلقەلی جە چەتەکا پاککریاوە.
یۆ جە فەرماندەکا بەرەو بەنداو تشرینی حاجی حەسەکە هورسەنگنایش پەی مڏرامانو ٢٢ ڕووەی کەرد و ئەرەیاوناش تا جەنگاوەرێ مەنەبۆ مڏرامان مکەرا. حاجی حەسەکە واتش: "وەراوەرو هرووژمە ئەرەگیرەکانە بە مۆراڵێوە بەرزۆ مڏرامانێ تاریخی کەرمێنە. هەڵوێس و مۆراڵما هرووژمو ئەرەگیرەکاش ماڕا. چەتەکێ ئەرەگیرا تورکی نمەتاوا دزە کەرا دلێ بەنداو تشرینی. گەلەکەما فرە خاس زانۆ کە ئەرەگیری تورکی جگە جە هرووژمەکا ئەرەگیری هرووژمی سایکۆلۆژیش کەرۆنە. وەرپرسا جەنگو ئەرەگیری تورکی بانگەشەی فرە کەرا گوایە جوابو ئێمە پاسە بۆنە؛ تا ئێمە مەنمێنە، واتە تا جەنگاوەرێما مەنۆنە مڏرامانما بەردەوام بۆنە. هۆشیاری و پاڵنەرما پتەوا، بی بڕوێ ئەرەگیری ماڕمێنە. ئی ئاڵاو مڏرامانییە گرڏ کاتێ شۆکیۆوە. بڕوا و مۆراڵما بەرزا، ئێمە ئەرەگیرا ماڕمێنە. گرنگ نییا چ تەکنیکێوە بەکاربارانە، جەنگاوەرێما ئامادێنێ پەی مڏرامانی. جە ڕاو مڏرامانی پاشەکشە نمەکەرمێ.
جە بەرەکا مڏرامانینە پێشوازی جە ساڵەی تازێ مکەرمێ. ساڵەی تازێ جە تەمامو گەلەکەیما و جەنگاوەراما کە بەرەکانە مڏرامان مکەرا، موبارەک مکەرمێ. تا دما نەفەس مڏرامان مکەرمێ و وڵاتەکەیما پارێزنمێ".
