چارەسەرو ئەندامو شاندو ئیمراڵیی پارتو یەکسانی و دیموکراسیی گەلا (دەم پارتی) و یاگەگیرو سەرۆکو پەرلەمانی سری سورەیا ئۆندەر جە بەشو چەمڎاری چڕو خەسەخانەینە (Florence Nightingaley) بەردەواما. هامسەرۆکاو گرڎی دەم پارتی تونجەر باقرخان و تولای حاتەم ئۆغۆللاریە ۋەردەمو خەسەخانەینە کۆنگرەی ڕۆنامەنوویسیشا بینا. هامسەرۆکو گرڎیی دەبەپەی کەسکین بایندەر و واتەواچەو دەم پارتی ئایشەگوڵ دۆغانە ئاماڎۍ بێنۍ.

هامسەرۆکو گرڎیی دەم پارتی تونجەر باقرخان سوپاسو ئەرەیاۋناکاش کەرد و واتش: " سوپاسو ئېژا سەرۆک کۆماری و سەرۆکو پەرلەمانی و سەرۆکو پارتە سیاسییەکا و ڕێکوزیاکا گلېرگەی مەدەنی و ڕێکوزیا جەماوەرییە دیموکراتیکەکا و گرڎو لایەنەکا تورکیای مکەرو. ئی یاگۍ ٢٤ سەعاتێن چۆڵ نەبیەن. گرڎو گەلی و باوەڕیەکا تورکیای ئینۍ خەمو تەندروسی ئېژا سری سورەیا ئۆندەرینە، ئینۍ چۍ پەی پەشتگیریکەردەیش. سوپاسشا مکەرو".

'باوەڕ بە شرۆڤەی ناڕاسی نمەکەردۍ'

تونجەر باقرخان ئەرەیاۋناش قسۍ دکتۊرەکا و ڕاوەبەرا خەسەخانەکەی بەبنەما گێرا، واتش: "ڕجاتا ۋنەمکەرو گۆش جە شرۆڤە و گریمانەی غەڵەتی نمەگێردۍ کە پەی ڕای گرڎیی وەڵا مکریۆوە".

'ئەوەکۊشۆ و مڎرامان مکەرۆ'

تونجەر باقرخان ئەرەیاۋناش ئۆندەر کەسایەتیێوە قارەمانش هەن و ساڵانێوەن پەی ئاشتی و دیموکراسی ئەوەکۊشان، واتش: "فرە زەحمەتیش ۋېیەرنا. دڵنیانا ئی ئاژەیچە ۋېیەرنۆ. بە دوعا و پەشتیوانی گەلاما ئەوەکۊشای ئاڎیی و ئەوەکۊشای گەلا مېیاوۆ بە یۆی. ئاڎ ئەوەکۊشۆ و مڎرامان مکەرۆ. هیواڎارێنمۍ ئی ئەوەکۊشای و مڎرامانە بۆ بە مایۍ ئانەی بەتەندرووسیێوە عالۆ گێڵۊوە دلېما ".

باقرخان ئەرەیاۋناش ئینە ڕوێوە تاریخیا، گەلاو تورکیای یۆشا گېرت پەی پەشتیوانی جە ئۆندەری، چنی ئانەی خەمو تەندرووسی سری سورەیا ئۆندەریشا بۍ، بەڵام ئەغلەبیەتو پەشتیوانییەکەی گێڵۊوە پەی ئەوەکۊشای ئۆندەری پەی ئاشتی و دیموکراسی.

باقرخان جەختش کەردۆ، دکتۊرەکۍ تەئکیدشا کەردەنۆ مقارنە بە هېزی وەڵېکۊتەی هەن، نمەبۆ کەس گومانەش بۆ کە ئۆندەر ئینا دەسێوە سڵامەتەنە.