دماو ئانەیە سەیەو مدرامانو گەلیوە واوەی مافو شارەوانیی وانی گێڵیاوە پەی هامسەرۆکاو شارەوانیی وانی، هامسەرۆکاو شارەوانیی وانی تا مەرسومو دەسبەکاربییەیشا وربگێرا سەرێ دەسەو باڵاو ورچنیەیشا دا. هامسەرۆکاو شارەوانی دماو ورگێرتەی مەرسوومو دەسبەکاربییەیشا، وەڵێ ئانەینە بلا بیناو شارەوانی چنی خەڵکی قسێشا کەردێ و سپاسو مدرامانو گەلیشا کەرد.

'سپاسو مدرامانکەرا مکەرمێ '

هامسەرۆکەو شارەوانیی وانی نەزلیهان شەدالە قسێش کەردێ و واتش: "تا یەکسانی و دادپەروەری دلێ گلێرگەینە وەرقەرار بۆ، ساڵانێوەن کۆشیەیمێ. شارەوانییچنە بە هەمان نەفەس کۆشیەیمێ. سپاسو مدرامانو گەلی مکەرمێ، کە پەی بەدەسئاردەی مەرسوومو دەسبەکاربییەی کۆشیێ. ئی مدرامانە ئا ڕاسییەشە بەر وست کە کۆشیای ئازادی سەرگنۆ. بەردەوامیما پەی ماف و ئازادیی، واننە تازە بیۆ و ئی سەرکەوتەیە مەبارەک مکەرمێ."

'خاوەنداری وەنەو ئیرادەو گەلی کریا'

دماتەر عەبدوڵا زەیدان قسێش کەردێ و واتش: "پەی وەختێوە کوڵیچ بۆ یاسا و دادپەروەری پاشێلێ کریێ. سپاسو خەڵکو وانی و گرد لایێوە مکەرمێ، کە خاوەندارییشا وەنەو ئیرادەو گەلی کەرد. ڕاو لوجنەو باڵاو ورچنیەیەکاوە ئایدیای ژیواێوی بەحورمەتی، بە هومێدی، ئاشتیی کۆمەڵایەتی قەوەتتەر بییۆ. پێویسما بە جەنگ و ناحەقی نییا. وەرپەرسیی گرد لاێوا خزمەتو شارەکەیما بکەرمێ. سپاسو گەلەکەیما مکەرمێ.