هامسەرۆکو کەجەدەکە-ئەی ئەنگین سەڤەر سەبارەت بە هرووژمەکا چەتەکاو دۆڵەتو تورکی داواش جە مەجلیس و فیدراسیۆنەکا کەرد و واتش: "مشۆم گەلوو ئێمە جە هەرکۆ بۆ بە دەسوەڵێوستەی ۋێش، دەمودەس مجیارە جاڎەکا".
سووریانە جە دژو چەتەکا هەیئەو تەحریر ئەل شامی، گەلوو کوردی جە گرڎ شۆنێنە کۆتەن ئاماڎەباشی ۋێپارێزنایۆ. هامسەرۆکو کۆنگرەو گلېرگەو دیموکراتیکی کوردەسانیا جە ئۆروپا (کەجەدەکە-ئە) ئەنگین سەڤەر سەبارەت پا پرسەیە پەی ئاژانسو هەواڵو فوراتی (ANF)ی قسێش کەرڎۍ. سەڤەر ئاماژەش پانەی کەرڎ کە دۆڵەتو تورکی جە سەرنیشت و ۋەرکۆتوو سووریای، پێوەرە ژیۋای گەلا بە ئامانج مگێرۆ و ئا هرووژمۍ جە لایەنو دۆڵەتو تورکیوە پلانەش پەی مجیۆرە.
سەڤەر ئانەیچش یاڎ ئاوردۆ کە وەڵتەر چەتەکۍ داعشیشا پەی هرووژمکەردەی سەرو کوردا ڕەوانە کەردێبێنۍ، ئاماژەش پانەیچ کەرد گەلوو کوردی چنی دۆساش مڎرامانش کەرد و شۆڕشش پارێزنا. سەرنجش وست سەرو ئانەیچ کە گەلوو کوردی جوابو هرووژمەکا مڎۆوە و واتش: "جە ئۆروپاوە گرڎ کاتۍ جاڎەکانە بیمۍ. سەرو ئا بنەمایۍ خاوەنداری جە شۆڕشو ۋەرنیشتی مکەرمۍ. هرووژمەکا فاشیزمو دۆڵەتو تورکی شەرمەزار مکەرمۍ".
"مشۆم گرڎ کەسێ جە هەر کۆ با دەمودەس مجیارە جاڎەکا"
ئەنگین سەڤەر ئەرەیاۋناش هرووژمەکۍ بە حەلەبیۆ سنوودارۍ نمەبا، ئاماژەش پانەی کەرد کە وڵاتا ئۆروپای جە سەیەو مڎرامانوو کورداوە جە چەتەکا داعشی ڕزگارشا بی، واتش: "پەنەوازا ئی دۆڵەتۍ ئینەی بوینا، مشۆم مەجلیسا ئێمە و گەلەکەما هەر کۆنە با مشۆم مجیارە جاڎەکا و ناڕەزایی ۋێشا نیشانە بڎا. تا هرووژمەکۍ بەردەوامۍ با، مەجلیس و فیدراسیۆنەکۍ ئێمە مشۆم جە مێڎانەکانە با. مشۆم هەرکۆنە با مجېیارە جاڎەکا".
