هامسەرۆکو یەرەئای دلیار جزیری دەسنیشانش کەرد، رۆڵەکۍ گەلوو کورڎی کە سەرو میراتو سەرمەشقەکا جمیەرو ئازاڎیی کورڎی، بە ویرۆکەو نەتەوەی دیموکراتیکی و فەلسەفەو رابەرو گەلوو کورڎی عەبدوڵا ئۆجالانی گۊرۍ بیێنۍ، سەرمەشقایەتی پەی ئەرەیاۋنای ئازاڎیی مکەرا و واتش، "چنەیچ هرووژم و فشار بکریۆ، ئاڎۍ نمەتاوا ۋێشا چا حەقەتینەیە بەدوور بگێرا کە گەلوو کورڎی رووبەڕوو قڕکەردەین".

هامسەرۆکو یۆبیەی ئەرەیاۋنای ئازاڎیی (یەرەئا)ی دڵیار جزیری سەبارەت بە هرووژمەکا دەوڵەتو تورکی ئەرەگیری پەی سەرو رۆنامەوانا کورڎی قسێش پەی ئاژانسوو هەواڵوو فوراتی (ANF)ی کەردۍ. هامسەرۆک جزیری باسش چانەیە کەرد کە ئەرەیاۋنای ئازاڎو کورڎی سیاسەتو دەوڵەتو تورکی و داردەسەکاش جە هەرێمەکەنە ئاشکرا مکەرۆ و ۋەرشا پنە مگېرۆ و واتش، "ئەگەر ئارۆنە سیاسەتو دەووڵەتو تورکی جە سوریانە ئاشکرا کریابۆ، چینەینە ئەرەیاۋنای ئازاڎ دەوری گۊرەش گێڵنان. جە ۋەرنیشت و سەرنیشت-ۋەرکۊتوو سوریاینە سیستمی ئازاڎ خوڵقیان و هەرپاسە هێزو پارێزنایش کە جە گرڎوو دنیێنە دەنگش دانۆ، چینەیچەنە ئەرەیاۋنای ئازاڎ دەورێوە گۆرەش بیەن. هەرپاسە ئانەی پەی ئەوەڵجاری عیلاقەو دەوڵەتو تورکی و داعشیش ئاشکرا کەرد، ئەرەیاۋنای ئازاڎ بۍ. هەرپۊکەی گرڎ کاتۍ ئەرەیاۋنای ئازاڎ جە لایەنو ئاڎیشاوە مکریۆ ئامانج و بێ مردای رووبەڕوو هرووژمی باوە".

٢٧ خەباتکارۍ ئەرەیاۋنای ئازاڎیی گەشمەرڎۍ بیۍ

هامسەرۆک جزیری ئانەش ویرئاوردۆ کە تا ئیساتۍ ٢٧ هەڤاڵێشا جە خەباتکارا ئەرەیاۋنای ئازاڎیی چی ئەرەکۊشاینە گەشمەرڎۍ بیێنۍ و ئانەیچش وست ڕووە کە تەرسەی گۆرۍ دەوڵەتو تورکی ئینا چانەینە کە ئەرەیاۋنای ئازاڎ سیاسەتو چەپەڵو ئەرەگیرا و گەمە ئەرەگیریەکاشا جە هەرێمەکەنە ئاشکرا مکەرۆ و هەر پا مەڵامەتەیچۆ دووۍ رۆنامەنوویسۍ جە ٢٣ۍ ئابینە سلێمانینە کریۍ ئامانج. دوژمنا  ئەرەیاۋنای ئازاڎیی پېسە لەمپەرێوە ۋەردەموو ۋێشانە موینا و پا مەڵامەتەیچۆ گەرەکشانە پاکتاوش بکەرا".

سنورە دەسکردەکا دژمنی بە ڕسمی نەشناسۍ

دلیار جزیری سەبارەت بە گوڵستان تارۍ ئاماژەش پانەیە کەرڎ، کە جە ۋەرنیشیچەنە خەباتو ئەرەیاۋنایش کەردەن و بەردەوام شۆنەو حەقیقەتی و راسیوە بۍ و سنورە دەسکردەکا دژمنی بە ڕسمی نەشناسۍ. جە هەر شۊنێنە ئەرەکۊشای بیەبۆ، رەنجش کێشتەن. دماجار جە ئاکاموو هامکاری دەوڵەتو تورکی و پەدەکەینە گەشمەرڎۍ بیە.

ئا ئەرەکۊشایە بەردەوام مبۆ

هامسەرۆکو یەرەئای دڵیار جزیری دەسنیشانش کەرد کە رۆڵەکۍ گەلوو کورڎی کە سەرو میراتو سەرمەشقەکا جمیەرو ئازاڎیی کورڎی، بە ویرۆکەو نەتەوەی دیموکراتیکی و فەلسەفەو رابەرو گەلوو کورڎی عەبدوڵا ئۆجالانی گۊرۍ بیێنۍ، جە ئەرەیاۋنای ئازاڎیچەنە سەرمەشقایەتی مکەرا و واتش، " چنەیچ هرووژم و فشار بکریۆ، ئاڎۍ نمەتاوا ۋێشا چا حەقەتینەیە بەدوور بگێرا کە گەلوو کورڎی رووبەڕوو قڕکەردەین. ئی گەلە پەنەوازش بە ئازاڎییا، سەرو ئا بنەمایۍ ئەرەکۆشای مکەرۆ. ئا ئەرەکۆشایە جە دژوو دەوڵەتو تورکی و گرڎوو ئەرەگیرا تەری بە ویستێوە گۆرۆ بەردەواما".