حوسێن کوچوکبالابان هامسەرۆکو ئیهەدەی یاڎش ئارڎۆ کە ڕابەر ئۆجالان کاراکتەرێوە گرنگا جە چارەسەرکەرڎەی پەرسوو کورڎینە، بەڵام زیاڎ جە چوار ساڵان نەتاوانش بنەیانە و پارێزنەرەکاش بۋینۆ و ئەرەیاۋناش، ئەنجامدای دیڎارەکا متاوۆ بۆ بە سەرەتاو گێڵایۆ پەی ئا سیاسەتا کە خزمەت بە ئاشتی کۆمەڵایەتی مکەرا.

دادگاو مافو مرۆڤوو ئەوروپای، سزای زیڼانی هەتاهەتایی سەرو عەبدوڵا ئۆجالانیرە بەبێ مافوو ئازاڎکەردەی مەرجداری، بە پێچەوانەو ڕێککەوتننامەو ئەوروپای پەی مافەکا مرۆڤی زانان. سەرەڕاو ئانەی ١٠ ساڵۍ ۋییەرڎەن سەرو بەرکەردەی ئا قەراریرە، بەڵام هیچ ڕاوجایۍ چا بارۆ نەگیریان ۋەر. کۆمیتەو ئەنجومەنو ئەوروپای جە ئەرەنیشتەکا بەینوو ١٧-٢٩و ئەیلولینە لوایۆ پۆرە بە قەرارو پاشێلکاری دادگاو مافو مرۆڤوو ئەوروپایرە مکەرۆ. ماوەو ٤٢ مانگان هیچ زانیاریێوە جە عەبدوڵا ئۆجالانی و یەرۍ زیڼانیا تەرو ئیمرالیۆ وەردەس نییا و ڕا نمەڎریۆ هیچ زانیاریێوە بۍ جبەرو زیڼانی. هامسەرۆکوو جەمەو مافو مرۆڤو (ئیهەدە)ی حوسێن کوچوکبالابان سەبارەت پا پەرسەیە قسێش چنی ئاژانسوو  هەواڵوو فوراتی کەردۍ.

حکومەتو تورکی هیچ زانیاریێوەش وەڵا نەکەردۆ

کوچوکبالابان یاڎش ئاوردۆ کە ١٠ساڵۍ چێوەڵی 'قەرارو گوربان'یش بەرکەرد و ماوەو ١٠ساڵان ئینا ۋەردەم و لوجنەو شالیارانە، دمایین جار جە مانگەو کانوونی دووەمو ٢٠٢١ینە دۆسیەکە لوایۆ پۊرەیش پەی کریان و واتش: "لوجنەکە یاوا پا ئەنجامەی کە پەنەوازا تورکیا مافو ئانەیش بۆ پەی هۊرسەنگنای و لوایۆپۆرەی سەبارەت بە زیڼانی هەتاهەتایی و ئازاڎکەردەی ئا کەسا کە بە بەهانۍ سزادای سزای زیڼانی هەتاهەتاییشا سەرەرە سەپیان بەڵام تورکیا هیچ هەنگامێوەش چا بارۆ نەنیان.

حکومەتو تورکی لۆبی قەوەتش هەن

کوچوکبالابان واتش: "چانەینە جە ئەرەنیشتەو مانگەو ئەیلولینە حکومەتو تورکی قەراری هامشێوە بڎۆ، چونکی هیچ کام جە قەرارەکا وەڵتەریش جابەجێ نەکەردێنۍ. جە چوارچێوەو دۆسیەو کاڤالای و دەمیرتاشینە، لوجنەکە فشار مووزۆ سەرو تورکیای پەی جابەجێکەردەی ئی قەراریە دۆسیەکە پېسە ۋێش مەنەن. حکومەتو تورکی پێشنیارە وەڵینەکاش جە فایلە گرنگەکا پېسە (گوربان)ینە واوەی مکەرۆوە، تورکیا جە دادگاکەنە لۆبییش هەن پەی نموونەی سی پی تی جە سەرداکەیشەنە پەی تورکیای، ئێساڵ سەردای زیڼانو ئیمرالیش نەکەردەن.

عەبدوڵا ئۆجالان جە پەرسوو چارەسەرینە کاراکتەرێوە قەوەتا جە تورکیانە

کوچوکبالابان ئاماژەش پانەی کەرد کە ڕابەرو گەلوو کورڎی عەبدوڵا ئۆجالان جە پەرسوو چارەسەرکەردەی کێشەو کوردینە کاراکتەرێوە قەوەتا و واتش: "حکومەت ۋێش گرنگی ئی کارەکتەرە قەوەتەیە مزانۆ، ئێمە پېسە ئیهەدەی چا ڕوۆ دەسما بە هەرمانۍ کەردەن ۋەرگیری جە مافو ئاشتی و ئازاڎیی مکەرمۍ. پۊکەی ئێمە ماچمۍ مشۆم پەرسوو کورڎی بە رێبازی ئاشتیانە چارەسەر بکریۆ. عەبدوڵا ئۆجالان کە جە چارەسەری پەرسوو کوردینە دەرێوە کاریگەر مگێڵنۆ، ئانە ٤ ساڵێن ڕاش پنە مەڎریۆ بنەیانەی و پارێزنەرەکاش بوینۆ، ئێمە ئی مژاریە بە پەرسێوە مافو مرۆڤی و دوور کۊتەیۆ جە سیاسەتو ئاشتی مزانمۍ، پېسە ئەرەمەرزیاکەیما فرەو وەختی داواو سەردای ئیمرالیما جە وەزارەتوو دادی کەردەن، بەڵام جوابشا نەڎینمۍ. داوا جە دەوڵەتی و حکومەتی مکەرمۍ دەموودەس دەسبەردارۍ ئا سیاسەتا با و گێڵاوە پەی ئا سیاسەتا کە خزمەت بە ئاشتی کۆمەڵایەتی مکەرا، پېسە هەنگامەی یوەمۍ داوا جە دەوڵەتی و شالیارو دادی مکەرمۍ ڕا بڎریۆ عەبدوڵا ئۆجالان بنەیانە و پارێزنەرەکاش بوینۆ."