ئاهەنگو نەورۆزی ڕحانە بە درووشمو "ئەرەپڕە وەختو ئازادی و سەرکەوتەین" ساحەو ١١ نیسانینە کریا، هەزاران کەسێ بەشدارێ بێنێ. هاموەڵاتێ بە جلوبەرگی کوردی و عەلەمەی سەوزە و سوورە و زەردەوە یاوێ مەیدانو نەورۆزی.

هاموەڵاتێ گۆرانیێشا واتێ، درووشمو "بژیوۆ مدرامانو زیندانی" و "ژەنی، ژیوای ، ئازادی" و "بژیوۆ نەورۆز" و "بژیوۆ سەرۆک ئاپۆ"یشا بەرزێ کەردێوە. حەرپاسە پانکارتو "ئەرەپڕە، وەختو ئازادی و سەرکەوتەین" و "نەورۆز مەبارەک بۆ"یشا ورێواستێ.  

براو ڕابەرو گەلو کوردی عەبدوڵا ئۆجالانی، محەمەد ئۆجالان و ئەنداماو مەجلیسو ئەدایاو ئاشتیی ڕحانە، عایشە چیچەکە، واڵێ یوە جە سیمبولەکاو مدرامانو ڕۆچی گەورێ مەردەی ١٤ تەمووزی عەلی چیچەک، بەشدارێ ئاهەنگەکەی بێنێ.

بە نامێ تەڤگەرو ژەنە ئازادا (تەژەئا)یوە ساڵیحە ئایاتا واتش ژەناو کوردی بە ئایدۆلۆژیاو وێشا بیێ بە سەرمەشقێ و نموونێ، واتش: "ئی ئایدۆلۆژیا گۆشەگیریی ئیمراڵی ماڕۆ، بەتایبەت نەورۆزو ژەناو کوردی  زینداننە مەبارەک بۆ. ئی قەیوما مکیانمێوە و بە سیستمو هامسەرۆکایەتی شارکاما بەرمێ ڕاوە.  ئی سەدە بۆ بە سەدەو ژەنە مدرامانکەرا".

دمایی پەرلەمانتارو دەم پارتیی ڕحای، عومەر ئۆجالان واتش: "نەورۆزو ڕێزدار ئۆجالانی مەبارەک بۆ. گەلو ڕحای ئینا چێگە. سەرو ڕای ڕاسێوە ملمێ. ڕۆحو سەید ڕەزای و شێخ سەعیدی و قازی محەمەدی شاد بۆ. چوارپارچەو کوردستانینە جەنگ هەنە. ڕاو ئیمراڵی بکەردێوە و با ڕێزدار ئۆجالان قسێ بکەرۆ و چارەسەر بێ دی. گەل گەرەکشا ڕاو ئاشتی بکەرۆوە.  سەرو خاکو کوردستانیوە بە شێوێوە ئازاد و واڵە و برای بژیومێ. پەی ئانەیچە موخاتەب ئیمراڵیین، موخاتەب بەڕێز ئۆجالانا".

پەرلەمانتارو دەم پارتی ئیستەنبوڵنە، سیری سورەیا ئۆندەر بۆنەو دۆخیی تەندروسییوە بەشدارییش نەکەرد و بە پەیامێوە ڤیدیۆیی  نەورۆزش مەبارەک کەرد.

ئینجا سیاسەتمەدارو کوردی، عوسمان بایدەمیر پەیامێوە ڤیدیۆییش کیانا و نەورۆزش وەنەو گرد لایێوە مەبارەک کەرد.

ئاهەنگەکە بە گۆرانیێ و ورپڕای بەردەواما.