کۊمیتەو ڕاوەبەریی جمیەری شۊڕشگێڵنی یۊگێرتەو گەلا (هەبەدەهە) بە بۊنەو ٤٥ ساڵوەگێڵوو کۊکوشیی مەرەشیوە ئەرەیاوناێوەش وەڵا کەرڎۊ، دلێشنە ئامان:

"حەرچندە ٤٥ ساڵۍ سەروو کۊکوشیی مەرەشیرە ویەرسەن، وەلۍ هۊش نەشییەنۊ، چا کۊکوشییەنە کە ١٩ کانوونوو یوەمیوە تا ٢٦ کانوونوو یوەموو ساڵەو ١٩٧٨ دەسش پەنە کەرد، دەیان شۊڕشگێڵنۍ، کورڎۍ و عەلەویۍ تیرۊرۍ کریۍ.

کۊکوشیی مەرەشی، کۊکوشییێوە بۍ پەی سەرکوتکەرڎەی تووڕەیی گەلی،  پەی خنیکنای دەنگوو چینوو کرێکاری دژوو ستەمی، پەی ماڕای کۊشیای پەی مافەکاو کوردی و عەلەوی و گەلە بندەسا بۍ. دەسەڵاتدارۍ هەستشا پانەیە کەرد، کە ئینە بۊ بایسوو سەرەورڎاێوە گەورەی. چونکوم سیستموو سانسۊری، دلێنەبەرڎەی، ئینکاری و سیاسەتەکاو سەرکوتی نەتاواشا دمایی بە تووڕەیی گەلی بارا، پەوکای دەسەڵاتداراو تورکی جە ساڵەو ١٩٧٧ نەخشەو کۊکوشییشا متەرە.  

بۊنەو نایەکسانی جە هامسەنگیی هێزەکانە، زەرەرێوە فرەش چەنە کەوتۊ. فرسەتوو وەرگێری بە خەڵکی نەدریا، جە ئەنجاموو هجوومەکەینە سەدان کەسۍ کوشیێ؛ یانە، هەرمانگە، ئەرەمەرزیۍ و کۊمەڵە دیموکراسییەکۍ وێرانۍ بیۍ و سۊچیۍ. سەدان کەسۍ بریندارۍ بیۍ، خەڵک ناچارۍ بیۍ یاگەکاشا جیا بازا.

تارێخوو کۊماروو تورکیای تارێخوو کۊکوشییەکان. کۊکوشیی مەرەشی تەنیا یۊن چا پڕۊسە تاریکا، وەلۍ دەوڵەتی فاشیستوو تورکی نەتاواش بە کۊکوشیی مەرەشی جمیەری شۊڕشگێڵنیی کوردی سەرکوت کەرۊ. چا ڕووەوە دەیان کۊکوشیۍ، ئەشکەنجۍ و فشارۍ بەرڎەوامییشا هەن. سەرەڕاو گردوو ئینیشا نەریتوو سەرەورڎای و کۊشیای شۊڕشگێڵنانەو گەلی بە ئیرادەوە بەرڎەواما.

ئێمە بە کۊشیای شۊڕشگێڵنانەی یۊگێرتانەمانەوە وەنەپەرسایوە چی کۊکوشییە کەرمۍ. داوا وەنەو گەلەکەیما کەرمۍ، کە کۊشیای شۊڕشگێڵنانەی یۊگێرتانەما  قەوەتتەر کەرا و وەنەپەرسایوە جە دەوڵەتی فاشیشتوو تورکی کەرا.