جمیەروو یۊگیڕتەو ئاخێزوو گەلا (هەبەدەهە)و ئەوروپای پەیوەس بە نەورۆزی پەیامێوەش وەڵاکەردۆ، نەورۆزش جە گەلا چێردەسەی و کرێکارا و ژەنا و هێزە یۊگێرتە شۆڕشگێڵنەکا و بەتایبەت جە گەلوو کوردی پیرۆز کەرد و واتش: "بە باوەڕ و مدرامانۆ پێشوازی جە نەورۆزوو ٢٠٢٤ کەرمۍ، پۍ ئێمەی کۊششکارا ئازاڎیی ئی ڕووە گرنگیێوە تاریخیش هەن".

هەبەدەهە ئەرەیاۋنۆش نەورۆز پۍ گەلوو کوردی فاڕیان پۍ ئێروو مدرامانی سەڎان ساڵەی، ئاماژە پانەی کەرۆ مەزڵوم دۆغان جە زینڎانوو ئامەڎینە درێژەش بە کۊشیای کاوەی دا دژوو زوحاک و سەردەمی.

حەرپاسە هەبەدەهە ماچۆ: "پێویسا نەورۆزوو ٢٠٢٤ بۆ بە ڕۊو کۊشیای دژوو دەسەڵاتی فاشیستی ئاکەپە-مەهەپەی یەکپارێزی و ئەوەمەنڎەی نەژاڎپەرسی و ڕەگەزپەرسی".

هەبەدەهە ئاماژە پانەی کەرۆ، دەسەڵاتوو فاشیستی ئاکەپە-مەهەپەی جە ڕاو سیاسەتوو جەنگیوە جە کوردسانەنە هجووم کەرۆ سەروو گرڎوو دەسکۊتە دیموکراتیکەکا گەلوو کوردی، کەش و دەرە و دارستانەکا تورکیای ڕادەسوو کۆمپانیا ئیمپریالیستەکا کەرۆ.

جە ئەرەیاۋناکەینە سەرنج وزیان سەروو گۆشەگیری ڕابەروو گەلوو کوردی عەبدوڵا ئۆجالانی کە ٢٥ ساڵێن بەردەواما، ٣ ساڵێن حیچ زانیاریێوە جە بارەشۆ نییا، ڕا مەڎریۆ چەمش بە بنەیانەی و پارێزنەراش گنۆ.

ئاماژە پانەی کریان، دەسەڵاتوو فاشیستی ئاکەپە و مەهەپەی گەرەکشا بە سیاسەتوو ئەرەگیری جە پانیشت و ۋەرنیشتوو کوردسانی، سیاسەتوو چەوەسنایۆ دژوو کرێکارا و ڕەنجدەرا تورکیای، تەمەنوو ۋێش درێژ کەرۆوە.

جە دمادماینە ماچۆ: "جەژنەو نەورۆزی جە گەلا بندەسی، کرێکارا، ژەنا، هێزوو یۊگێرتەو شۆڕشگێڵنا، بەتایبەت گەلوو کوردی پیرۆز بۆ.

بژیۋۆ نەورۆز!

دژوو گۆشەگیری ئیمراڵی، سەرهۆردەیدۍ"