بۆنەو نزیکبیەیۆ ٢٦ ەمین ساڵیاڎو پیلانگێڵنیی مېیاننەتەوەیی دژو ڕابەرو گەلوو کوردی عەبدوڵا ئۆجالانی کە ٩ و تشرینو یووەمو ١٩٩٨ دەسش پنە کەرد، حەلەبەنە ڕاپیمایۍ جەماوەری ئەنجامدریا.

هەزاران ئەرەنیشتۍ گەڕەکەکاو ئەشرەفیەی و شێخ مەقسوودی حەلەبەنە دوکانەکێشا وستێرە و بەشداری ڕاپیماکەیشا کەرڎ ، کە پەی شەرمەزارکەردەو پیلانگێڵنیی مېیاننەتەوەیی و سیستەمو ئەشکەنجەی و قڕکەردەی ئیمراڵی لوواڕاوە.

بەشدارا ڕاپیماکەی لافیتۍ "ئازادی پەی ڕابەر ئاپۆی، چارەسەری سیاسی پەی پەرسو کوردی" و "پیلانگێڵنیی ماڕمۍ" و "یەکسانی و برایەتی گەلا سەرگنۆ" و وێنۍ ڕابەرو گەلوو کوردی عەبدوڵا ئۆجالانیشا بەرزۍ کەردێوە و ۋەردەمو هۆڵو ٨ و ئادارینە دەسشا بە ڕاپیمەی کەرد.

ۋەردەمو ناوەندو چاند و هونەری جەمیل هۆرۆینە جە گەڕەکەو ئەشرەفیەی، ڕاپیمای فاڕیا پەی گلېرۆبیەی، دماو دەیەقێوە ڕێزگېرتەی پەی یاڎو گەشمەرڎا، هامسەرۆکۊو مەجلیسو گرڎی شێخ مەقسوودی و ئەشرەفیەی هێڤین سلێمانە و ڕاوەبەرو نووسینگەو ڕێکوستەی پەیەدەی وڵات مەمۆ قسېشا کەرڎۍ.

هێڤین سلێمانە ئەرەیاۋناش ئیراڎەو گەلا بیەن بە قەڵغان ۋەرا ۋەر بە هەوڵو فاشیستەکا پەی دلېنەبەردەو ڕامانەکا ڕابەرو گەلوو کوردی عەبدوڵا ئۆجالانی.

هێڤینە جەختش کەرڎۆ کە دۆڵەتا سەرمایەداری بە هامکاری پەدەکەی جە راو باڵبەس کەردەی ڕابەر عەبدوڵا ئۆجالانیۆ گەرەکشا بۍ دمایی بە ئەرەکۊشای بارا، بەڵام دماو ٢٦ ساڵا مەرامو پیلانگێڵنا ناما دی.

هێڤینە ئاماژەش پانەی کەرڎ کە، دەسکۆتەکا گەلا سەرنیشتوو ۋەرکۊتوو سوریای بەرهەمو ڕامانەکا ڕابەرو گەلوو کوردی عەبدوڵا ئۆجالانینۍ.

لاو ۋێشۆ، وڵات مەمۆ ئەرەیاۋناش چارەسەری پەرسو کوردی ئینا ئیمراڵی، بە ئازادی جەسەیی ڕابەرو گەلوو کوردی عەبدوڵا ئۆجالانی پەرسو کوردی و تەمامو کێشەکاو ۋەرکۆتوو مېیامینی چارەسەرۍ مەبانۍ.