هەڵمەتەو 'ئازاڎیی پەی عەبدوڵا ئۆجالانی، چارەسەری پەی پەرسو کورڎی' رۆ دماو رۆی ۋەرفراوانتەر مبۆ و جە ۋەرا ۋەرو گۆشەگیرینە هەڵوێس نیشانە مڎریۆ. چا چوارچێوەدنەگوڵستان ئیبراهیم-ە ئەندامەو دەسوەڵێوستەی سوری پەی ئازاڎیی رابەر عەبدوڵا ئۆجالانی قسێش پەی ئاژانسوو هەواڵوو فوراتی (ANF)ی کەرڎۍ.

'ئامانجەکە شکسدای هێزە هەژموونیەکان'

گوڵستان ئیبراهیمە ئانەش وست ڕووە، کە ئانۍ بەشداریشا جە هەڵمەتەکێنە کەردەن داواو دماییئارڎەی بە گۆشەگیری و هرووژمەکا هێزە هەژمونگەراکا مکەرا و ئانەیچش وست ڕووە، "یۆ جە مەرامە سەرکیەکایچ بریتیا چانەی کە دیڎار چنی رابەر ئاپۆی ئەنجام بڎریۆ. گرڎ کەسێچ مزانۆ کە ئا سزۍ پەی رابەر ئاپۆی بڕیاوە، ئینۍ جبەرو بنەماکاو مافو مرۆڤینە".

'هەڵمەتەکۍ پېسە رووباری ژڵێویۆ'

گوڵستان ئیبراهیم جە درێژەو قسەکاشەنە واتش، کە جە سەرانسەرو دنیێنە جە ڕاو ئشناسای پاڕادایمو رابەرو گەلوو کورڎی عەبدوڵا ئۆجالانی بەشداربیەی جە هەڵمەتەکېنە فراوانتەر بیەن و پی جۆرە بەردەوامە بیە: "هەڵمەتەکۍ رۆ دماو رۆی پېسە رووبارێوە جە دنیانە ژڵێوەشا و ئەنجامەکێش بەرۍ گنا. ئشناسای فکرەکاو رابەر ئاپۆی چانس و دەرفەتێوەن پەی گرڎوو گەلا جیهانی. کاتێ گەلا دیشا کە دۆزو رابەر ئاپۆی دۆزێوە ئەخلاقییا و مبۆ بە دۆزێوە جیهانی، بەشداریشا جە هەڵمەتەکێنە کەرد. مڎرامانوو گەلی بە شێوەو مڎرامانی و سەرهۆردای ئەنجامدریا و ئینەیچ پاسشکەرڎ کە دژمن ۋەرا ۋەر پانەی تاسیۆنە و شۆک بۆ. هەرپاسە ئانەیچ تەرسۍ گۆرێش وستە دڵوو دۆڵەتو تورکی ئەرەگیری و گرڎوو دۆڵەتە هامکارەکاش".

'سی پی تی ئەرکو ۋێش جابەجۍ نمەکەرۆ'

گوڵستان ئیبراهیمە سەرنجش وستە سەرو بێدەنگی و بێهەڵوێسی کۆمیتەو ڕاگێرتەی جە ئەشکەنجەی (سی پی تی) و ئانەش وست ڕووە، "ئێمە فرەو وەختی نامەما پەی رێکوزیاکا کیاست، بەڵام بێ جوابۍ بێنۍ. چی دماییەیچەنە ئاژانسوو هەواڵوو فوراتی پرسیارەکێش ئاراسەو سی پی تی کەرڎۍ، بەڵام سی پی تی جوابو گرڎوو پرسیارەکاش نەڎاوە و ئا جوابێچە کە دریێبێنێوە یاگۍ ۋێشانە نەبێنۍ. سی پی تی ماچۆ ئێمە گرڎ کاتۍ چنی لایەنی تورکی ئینایمۍ پەیوەندینە، ئاژەو ئیمراڵی ڕۊشن مکەرمێوە و گۆشەگیری تن سەرو رابەر ئاپۆی بیەیش نییا. ئێمە گرڎیچما عال مزانمۍ کە ماوەو نزیکەو ٣ ساڵان، گۆشەگیری سەرو رابەر ئاپۆی دژوار و چڕا. ٤١ مانگێن مافو دیڎاری پاشێلکریان. سی پی تی ئەرکی ویژدانی ۋێش جابەجۍ نمەکەرۆ".

'ئێمە بە یەک دەنگی و یەک هەڵوێسی رابەریما ئازاڎ مکەرمۍ'

گوڵستان ئیبراهیمە داواو ئانەیش کەرڎە کە پەنەوازا چالاکییەکۍ زیاتەر قەوەتۍ بکریا و قسەکێش پی جۆرە دمایی پنە ئارڎۍ: "جیهان پەی رابەر ئاپۆی هۊرئێستەن سەرو پەیا و گرڎ ڕووۍ چالاکی جیاجیا ئەنجام مڎریۆ.

سەرەڕاو ئانەیچ ئا چالاکیۍ پەی ئازاڎیی رابەر ئاپۆی ئەنجام مڎریا، کەمێنۍ. ۋەرو ئانەی تا ئیساتۍ ئازاڎیی رابەر ئاپۆی بەدەسنامان. مشۆم زیاتەر خاوەنداری جە رابەر ئاپۆی بکریۆ. ئێمە بە یەک دەنگ و یەک هەڵوێس رابەریما ئازاڎ مکەرمۍ".