جە چوارچێوەو هەڵمەتەو 'ئازاڎیی پۍ عەبدوڵا ئۆجالانی، چارەسەری پۍ پرسوو کورد'ینە شاندێوە جە پەڕلەمانتاراو ئەورپای سەردای ئەستەنبوڵیشا کەرد. پەڕلەمانتارەو پارتوو فەرەنسای نەتەوەیی سەگۆلەنە ئامۆتە کە یووە بۍ جە ئەنداماو شاندەکەی، سەروو ئی مژاریە پۍ ئاژانسوو هەواڵوو فورات (ANF)ی قسێش کەردۍ، ئامۆتە ئاماژەش پانەی دا بە پەی سەردای جە عەبدوڵا ئۆجالانی لووێنۍ پۍ وەزارەتوو داڎی بەڵام حیچ جوابێشا هۊرنەگێرتەن.

'کوردم جە کۊشیای دژ بە داعشیوە ئشناسا'

سەگۆلەنە ئامۆتە ئانەش وست ڕووە کە مەسەلۍ کوردیش جە کۊشیای کوردا جە سوریانە دژوو داعشی ئشناسان و واتش: "ۋەروو ئانەی کوردەکۍ جە دژوو داعشی گژیێنۍ، جە تەرەفوو دەوڵەتوو تورکیوە پێسە تیرۆرستی وەسف کریێنۍ. دیارا ئی واتۍ دەوڵەتوو تورکی پۍ بێدەنگ کەردەی ئۆپۆزسیۆنەکا بە کارمارۆ. نکوڵی جە زۋانوو کوردا کریۆ و قەڎەغەکریان، هەنگامەی یووەمەنە پۍ ئەسڕیەیۆ ئشناسنامەی و وەڵینگەو گەلێوە. مزانمۍ ئا سیاسەتمەدارە کوردۍ کە جە وەران وەروو ئینەینە کۊشیا، گیریا. گۆشەگیری سەروو بەڕێز عەبدوڵا ئۆجالانی یۊن جە گرنگتەرینەکا ئی بێدەنگکەردەیە."

'گۆشەگیری دمایش پنە بۍ، ناچارەسەری و فشاریچ بەکۆتایی مۍ'

سەگۆلەنە ئامۆتە، ئاماژەش پانەی دا گەر گۆشەگیری سەروو ئۆجالانی دمایش پنە بۍ، ئانە ناچارەسەری پرسوو کوردی و گێرتەی و فشاروو سەروو گیریایا سیاسیچ دمایش پنە مۍ و واتش: "پۍ ئانەی گۆشەگیری سەروو ئۆجالانی جە ئاستی میان نەتەوەینە ئاشکراکەرمۍ، پۍ ئانەی بیمۍ بە دەنگێوە پۍ لابەردەی گۆشەگیری و هەر هەرمانێوە بتاومۍ چی بارۆ کەرمێش قسۍ کەرمۍ، ئێمە ئینایمۍ چۍ. ۋەروو ئانەی بەتەمامەتی پەیوەندی بڕیان. مەبۆ ئانەما ۋیر بشۆ کە بەڕێز ئۆجالان ٧٤ساڵۍ تەمەنشا و ماوەو ٢٥ ساڵان دورگێوەنە  گۆشگیرکریان. ئاژەو تەندروستیش مەزانمۍ چنینا، مەزانیۆ خاسا یان نا. مەتاوۆ پارێزنەر و بنەیانەکەیش بوینۆ. ئینە یاگۍ نیگەرانییا. گەر تورکیا بانگەشەو وڵاتێوە دیموکراتیکی کەرۆ، مەبۆ پی جۊرە جمۊوە. چونکی جە وڵاتێوە دیموکراتیکەنە، ئۆپزسیۆنی خۆ ۋەروو قسەکەردەی مەگیریۆ، گۆشەگیریێوە ڕەها پۍ ماوەو یەرۍ ساڵا مەوزیۆ سەروو زینڎانیێوە سیاسی."

'دەزگاکۍ ئەوروپای هامکارۍ نا یاسایێنۍ'

سەگۆلەنە ئەرەیاۋناش دەزگاکاو ئەورپای هامکارۍ نایاسایۍ تورکیاینۍ و واتش: "گەر پێسە کردەوا نەبیۍ بە هامکارۍ تاوانۍ، بەڵام بێدەنگبیەیشا حەر بۊ بە هامکاروو ئی نایاساییەو تورکیای. ئاژەو ۋنەنەپەرسای و سزانەڎای تورکیای، هێز مڎۆ پا نایاساییەی کە تورکیا کەرۊش. ۋەروو ئانەی سی پی تی و نەتەوەیۊگێرتەکۍ و ڕێکوزیاکۍ تەرۍ ئی نایاساییا مەوینا، ئانە بەماناو ئانەی مۍ کە هامکارۍ ئەشکەنجەیی گۆشگیریینۍ. دادگاو مافوو مرۆڤوو ئەورپای پەیوەس بە ئۆجالانی قەراروو مافوو هیوایش دا، بەڵام ئانەی گرنگا پۍ جابەجێکەردەو ئی قەراریە مشۊم چ هەرمانۍ کەرۆ."

'بێدەنگی ئەوروپای ۋەروو سیاسەتوو کۆچبەرییا'

سەگۆلەنە ئانەش وست ڕووە بێدەنگی یۊبیەی ئەوروپای جە ڕاگێرتەی جە گۆشەگیری پەیوەندیش بە سیاسەتوو کۆچبەرییوە هەن و واتش: "تورکیا پەیوەس بە کۆچبەریی جە سوریا و ئەڤغانستانەنە دەور گێڵنۆ، پۊکەی ئەورپا ۋەران ۋەر بە تورکیای بێدەنگا. بەڕێز ئۆجالان ڕەمزا پۍ کوردا، ویستشا بێدەنگکەردەی و دمایی ئاردەین بە کوردا. گەرەکشانە هجووم و سەروو کوردا گەورەتەر کەرا و ئاژەو جەنگی بەردەوام بۆ. هەڵبەتە بە پێچەوانەو ئینەیۆ پۍ ڕەخسناو ئاژەو ئاشتی مشۊم کۊشیای فراوانتەر کریۆ. ئانەما ویر نەشۆ ڕەخسناو ئاژەو ئاشتی، جە ڕەخسناو ئاژەو جەنگی فرە زەحەمەتتەرا. سیستمێوە دیموکراتیک تەنیا بە ڕەخسنای ئاژەو ئاشتی مێنە کایۆ. هەنگامەی یووەمەیچ پۍ ڕەخسناو ئاشتی، لابەردەی گۆشەگیری ئیمراڵی و ئازاڎیی عەبدوڵا ئۆجالانی و گرڎوو زینڎانیا سیاسییا."