جە ڕێکەوتو ٣٠ حوزەیرانو ساڵەو ٢٠٢١ی، حەمەو حەمەسەعیدی  وەزیرو ڕۆشنویری ھەرێمو کوردستان بەنوسیای ژمارە ٤٦، بە فەرمی داواش جە وەزارەتو پەروەردەو هەرمێو کوردستانی کەرد؛ تاوەکو زوانی هەورامی جە پارێزگاو هەڵەبجەیەنە بوانیۆنە و ئا داواکاریە جەلاو هەورامییەکاوە بەفراوانی پەشتیوانیش ونەکریا.
جەی چوارچێوەنە پلاتفۆرمو هۆرام-ی بەواڵاوکریایێوە پەشتیوانیش کەرد جە داواکاری حەمەو حەمەسەعیدی وەزیرو ڕۆشنویری هەرێمی و چالاکوانێ تەرێ هەورامانی کە هەمان داواکاریشان هەن و ئاشکراش کەردەن: ئا داواکاریە کەمتەرین مافوو هۆرامیەکان.

وەڵاوکریاکەو پلاتفۆرمو هەورامی:

هاموەڵاتیا و ڕۆشەنویرا. هەرپاسە کە ئاگادارێندێ چندها جارێن خەڵکوو هۆرامانی و چالاکێ دڵسۆزی هۆرامانی داواکاری وێشا بە حکوومەتوو هەرێموو باشوووروو کوردستانی جە بارەو وانای بە زوانی هۆرامی یاونان بەڵام بە بەهانێ جۆراوجۆرێ ئی داواکاریه ڕەد کریانۆ.
جە قۆناغێوەی هەرە حەساسەنه و دماو ئانەیە کە هەست بە مەتەرسیێوی فراوانتەری کریۆ جە بارەو نەمەنەو زوانوو هۆرامیۆ، چالاکێ هۆرامانی دیسانۆ دڵسۆزانه بە ئەنەیاوناو کەمپەینێوی گەرەکشانه داواکاری وێشا پێ چندمین جاری پێشکەشوو حکوومەتوو هەرێموو کوردستانی و پارلمانی کەرا.
هەرپاسە بەڕێز حەمەو حەمەسەعیدی بە فەرمی داواکاری وێش کیاستەن پێ وەزارەتوو پەروەردەی تا کار کریۆ پێ ئانەیە پەروەردە بە زوانی هۆرامیچ دریۆ و چی داواکاریەنه ئیشارەش پانەیە کەردەن کە ئینە خواستوو خەڵکوو هۆرامانیا.
ئێمە پێسەو پلاتفۆرموو هۆرامی بە تەمامی ئینایمێ چەنی ئی داواکاریا و سەرەڕاو دڵوەشی پی هەرمانا سوورێنمێ سەروو ئانەیە کە پەنەوازا ئی کەمپەینە وەرفراوانتەر بۆ و هەم چالاکێ و هەم خەڵکوو هۆرامانی بەشدارێ با چی کەمپەینەنە و خواستوو وێشا و دەنگوو وێشا بیاونا دەسەڵاتوو پانیشتوو کوردستانی.
پلاتفۆرموو هۆرامی ٠٤-٠٧-٢٠٢١