پلاتفۆرمو هۆرام-ی، بەبۆنەو ٧٥مین ساڵیادو جەئەڎابییەی ڕابەر ئۆجالان-ی و ساڵیادەکۍ ئەڕەمەرزنایرەو پژاک-ی و یەپەژە-ی جە بەیاننامێوەنە سەرەڕاو پیرۆزبایی، ئاشکراش کەردەن: ئاخێزو (ژەنی ژیوای ئازادی) فەلسەفەو ڕابەر ئۆجەلان-یەن.
راوەبەریی پلاتفۆرمو هۆرام-ی بەبۆنەو ٧٥مین ساڵیادو جەئەڎابییەی ڕابەر ئۆجالانی و ١٩ مین ساڵیادو ئەڕەمەرزنایرەو پژاک-ی و ١٠ مین ساڵیادو ئەڕەمەڕزنایرەو یەپەژە-ی بەیاننامێوەش وەڵاکردەوە. هۆرام سەرەڕاو پیرۆزبایی، ئاشکراش کەردەن: ئاخێزو (ژەنی ژیوای ئازادی) فەڵسەفەو ڕابەر ئۆجەلان-یەن. هۆرام دەسنیشانش کەردەن: ئامانجما ئانەن کە ئێساڵ ئازادی ڕێبەر ئاپۆی و سەرکەوتەی ئاخێزو ژەنی ژیوای ئازدی فەراهەمۍ ببانۍ و بە ئیلهام گێرتەی جە مدرامانو ڕابەر ئۆجالانی جە ئیمراڵی و هێز گێرتەی جە رۆحو ژیناکا، میرکانەکا و بریتانەکا و بە یۆگێرتەی پەیمان لۆزانی پەی هەمیشە هۆربشانمێوە
تەمامی بەیاننامەکەو هۆرام-ی
جە وەختێنە ٧٥ مین ساڵڕۊو جە ئەڎابیەو ڕابەرئۆجەلانی یاد مکەرمێوە کە نزیکەو ٢٤ ساڵان پەی یاوای بە ئازادی گەلەکەیما جە زیندانو تاکە کەسی ئیمڕاڵینە جە وەرانوەرو سیستمە قیزەونەکاو سەرمایەداریوە مدرامان مکەرۆ . ڕۊو ٤-٤و گرد ساڵێ جە تاریخو میللەتەکەیمانە ڕوێ پرشنگدارا . ڕۊ جە ئەڎابیەو ڕابەر ئۆجالانی ، هاموەختا چەنی ئەڕەمەڕزنایرەو پارتو ژیواو ئازادو کوردستانی (پژاک) جە ٤-٤-٢٠٠٤ی و هەرپاسە ٤-٤-٢٠١٣ی یەکینەکۍ پاڕێزنای ژەنا جە وەراسان و وەرنیشتو کوردستانینە و ئەرەمەرزنارەیشا بی بە وەرەتاوێ پەی دما ئامای ڕوە تاریکەکاو وەڵاتی .
ئارۊ جە وەختێوەنە ١٩مین ساڵیادو ئەڕەمەڕزنایرەو پژاکی و ١٠ مین ساڵیادو ئەرەمەڕزنایرەو یەپەژەی جە ئەنداما و لایەنگەراشا و هەر پاسە گرد وەڵاتپارێزێ مۆبارەکبایی مکەرمێ کە جە وەرسانو کوردستانینە چێرو سێبەرەو کۆشیاو پژاکیوە ئاخێزو ژەنی ژیوای ئازادی گردو وەرسانو کوردستانی و هەرپاسە ئێرانیش گێرتەنەوە و تا ئاڕۊیچ درێژەش هەن . ئاخێزێ کە بە شەهادەتو شێرین عەڵەم هولیۍ و سەدان جوانێ وەڵاتی و مدرامانوو ١٥ ساڵەو زەینەب جەڵالیانۍ و سەدان زیندانییەتەرێ بنەڕەتش نریانەرە. جە لایە تەروە جە وەرنیشتو کوردستانیوە جە سێبەرەو کۆشیای و مدرامان و هەزاران شەهیدۍ و کەمئەندامۍ بە تایبەت هێزو ژەنا (یەپەژە)یەوە، گەلەکەما جە دماو سەدان ساڵا چێردەسەیی ڕۊ بەڕۊ زیاتەر جە جارانی جە ئازادی یەکجاری نزیک بۆوە .
پلاتفۆرمو هۆرام-ی جە ئف ڕوە پیرۆزەنە، ٧٥ مین ساڵرۊو جەئەڎابییەو ڕابەر ئۆجەلانی و ١٩مین ساڵڕۊو ئەرەمەڕزنایرەو پژاک-ی و ١٠مین ساڵڕۊو ئەرەمەڕزنایرەو یەپەژە-ی جە ڕابەر ئۆجەلانی، کەسوکارو شەهیدا، خانەوادەو زیندانیە سیاسیەکا و هەر پاسە گەریلا و شەرواناو ڕاو ئازادی و سەرجەم ئازادیوازا پیرۆزبایی مکەڕۆنە و هەرپاسە ئاواتما ئانەن کە ئێساڵ بۆ بە ساڵەو ئازادی فیزیکی ڕابەر ئۆجەلانی و سەرکەوتەو ئاخێزو ژەنی ژیوای ئازادی هەم جە وەراسانو کوردستانی هەم جە وەرنیشتو کوردستانی و هەم جە ئێرانەنە . ئامانجما ئانەن کە ئێساڵ بە ئیلهام گێرتەی جە مدرامانو ڕابەر ئۆجەلانی جە ئیمراڵی و هێز گێرتەی جە رۆحو ژیناکا، میرکانەکا و بریتانەکا و بە یۆگێرتەی پەیمان لۆزانی پەی هەمیشە هۆربشانمێوە .
ڕاوەبەریی پلاتفۆرمو هۆرام-ی
