بە بۆنەو ٤٣مین ساڵیادو ئەرەمەرزنای پارتو کارگەرانو کوردستانی (پ.ک.ک)ی جە ڕێککەوتو ٢٧-١١-١٩٧٨یەنە، پلاتفۆرموو هۆرام-ی بەیاننامێوە مۆبارەکبائیش وەڵاوکەردەوە کە دەقەکەش بەئی جۆرەنە:

جە وەختێنە پ.ک.ک ٤٣ مین ساڵڕۆو ئەرەمەرزنایرەو وێش جەژنە مەگێرۆ، کە خەبات و مدرامانش بە ڕابەری بەرێز ئۆجالانی مەرزەکاو کوردستانی و وەرکەوتوو دڵێراسەیش بڕیەنێ. هەرپاسە جە فرەو وەڵاتەکاو تەری بە بۆنەو جیاوازی فەڵسەفەو کۆشیای پەکەکە-ی پەی یاوای بە ئازادی ، یەکسانی ژەن و پیای و پێوەرەژیوای گەلا، فرەو ئازادیوازا، بە تایبەت چالاکێ بەشو ژەنا ڕووەشا کەردێنە ئا پارتەیە . پەکەکە جا ئاژەو ئاڕۆ وەرکەوتوو دڵێراسەینە سەرەڕاو گەلوو کوردی ، بییەیش بییەن بە ڕاسینەو کۆشیای نەتەوەکا و چینە جیاوازەکێ تەرێ . ئانە کە پەکەکە جە ماوەو ٤٣ ساڵی ویەردێنە تا بە ئارۆ پێش کۆشیان ، ژیوایە ئازاد ، گەلمیر ، ئێکۆڵۆژی و یەکسان بییەن .

جە سێبەرەو خەباتوو پەکەکە-یەنە بە مدرامان و ڕابەر ئۆجالانی و گەریلا سەربەرزەکاو کوردستانی، نەتەوەو کوردی بی بە ساحێب و فەلسەفە ، مانیفستۆ و سیستمو وێریکوزتەو وێش . بە پێچەوانەو حزبێ و لایانەکا تەرو وەڵێ پەکەکە-ی، کە مەسەڵێ کوردی گیرش واردەبێ دەسو خانەوادە ، عەشیرەت و لایەنەکاوە، بەرکەوتەو پەکەکەی پەرسەو کوردی بی بە خواست و گردو چینە جیاوازەکاو کوردستانی و ئا گیرواردەیە دماییش ئاما. بەشداری شناسە جیاوازەکاو کۆمەڵگاو کوردستانی جە خەباتی نەتەوەیینە، بەروستەو ئی ڕاسییەیەنە. جە گردی گرنگتەر پەرسەو کوردی جە مەسەڵێوە هەرێمی بی بە پەرسێوە جیهانییە . سەرو ئا ئەساسەیە گرد کوردێ وەڵاتپارێز و ئازادیواز نمەتاوۆ کۆشیای و مدرامان و ڕابەر ئۆالانی و پەکەکە-ی پەی پارێزناو شناس و مافەکاو کوردی نەوینۆنە .

پسۆ پلاتفۆرموو هۆرام-ی، سەرەڕاو مۆبارەکبایی کەردەی جە ئی ڕوە پیرۆزەیە جە کەسوکارو شەهیدا ، ڕابەر ئاپۆی ، گەریلاکاو کوردستانی ، گەلەکەیما و بە تایبەت ژەنا ، هیواو ئازادی فیزیکی پەی ڕابەر ئۆجالانی جە زیندانو تاکەکەسی ئیمڕاڵی و یاوای نەتەوەکەیما بە مافەکا وێش جە هەر چوار پارچەو کوردستانی موازمێ . جارێ تەر ڕۆو ئەرەمەرزنایڕەو پەکەکە-ی ، پسۆ ڕۆو ژیوایۆ نەتەوەو کوردی و گێڵایۆ کەرامەتی ئینسانی پەی گەلەکەیما و بە تایبەت ژەنا موینمێ . داواما ئانێنە کە جە ٤٤مین ساڵەو کۆشایەنە ، چالاکێ ژەنا ، ژیوگەی ، گلێرگەی مەدەنی و سیاسیی و رووناکویرا بە درێژەدای بە ڕاو شەهیدا ، پەی یاوای بە ژیوایە ئازاد و یەکسان و ئێکۆڵۆژی ئەرکی نەتەوەیی و ئینسانی وێشا جە وەرانوەرو فاشیزمی نەتەوەیی و دیکتاتورە داگیرکەرەکاو کوردستانی بەجا باوەرانێ..

ڕاوەبەری پلاتفۆرموو هۆرام-ی

٢٥-١١-٢٠٢١