شېوەکاروو پەیکەرسازېوە مەنتیقەو هۊرامانی پۍ زینڎە ئاستەیۆ شکڵوو شېوەو یانا هۊرامانی، پۍ ئشناسای ئی میعماریە زەریفە، تاریخیەو دۊسوو سروشتی، شکڵېوەش جە هەرمانۍ هونەریۍ جە دەروازەو هۊرامانینە وەش کەرڎەن و بیەن بە یاگۍ سەرنج کێشتەو گەشتیارا.
هەرېموو هۊرامانی کە بە تایبەتمەندیە زەریفەکا وېش جە کوردسان و مەنتیقەکەنە مشناسیۆوە، بەردەوام سەرنجوو ئا گەشتیارا کېشۊ کە سەردایش کەرە. پۍ عالتەر نیشاندای هۊرامانی، ئی گەنجینە ڕەنگاو ڕەنگەو کوردسانی و مەنتیقەکەی کە هەڵای جە ۋەران ۋەروو هجوومەکا سیستموو سەرمایەدارینە وېڕاگری کەرۆ، خەلیل ڕۊستەمی، یۆن جە هاموڵاتیا دەگاو دزڵیۍ بە دەرفەتېوە کەم بەرهەمېوە زەریف پۍ پېکای ئامانجەکەیش وەش کەردةن.
خەلیلی ڕۆستەمی، خەڵکوو دەگاو دزڵیێ، جە هۊرامانوو ۋەرکەوتی، نۆزدە ساڵێن ئۆسان، سەبارەت بە هۊرچنیەو ئا یاگېوە کە هەرمانەکېش چنەکەرڎەن ماچۆ، "فرەو یاگا گێڵانا پۍ ئانەی یاگێوە ورەچنوو پەی ئی هەرمانێ، ئاخرۆ "دەربەن دزڵی"م هورچنی. چونکم گەشتیارێ و هاموشۆکەرێ هەورامانی فرێنێ چێوە گوزەر کەرا و ملا پەی هەوراماناتی وەششا مێ هەرمانەکێ و وېنەش پاڵنە گێرا ".
ئۊسا خەلیلی ڕۊستەمی ئاماژەش پانەی کەرڎ کە هەرمانە سەروو یانا کەرۆ بە دەسووری قەڎیمی بەڵام بە شکڵۍ گولانە و وە پی هەرمانېچشە سەرنجوو گەشتیاراش لاو ۋېشەرە کېشتەن. ڕۊستەمی جە درېژەو قسەکاشەنە واتش،" دەربەن دزڵی کە بە دەروازەو هۊرامانی ئشناسیان چونکوم جاڎە و مەریوان-پاوەیش سەرا شلۆقا و دایمە ئاوەڎانا، وە سروشتېوە زەریفیچش هەن ".
ئی ئۊسا هونەرمەنڎە بەینوو قسەکاشەنە ئی زانیاریېشە دەرباروو هەرمانەکېش وستۍ ڕووە،"کە ئینە دووەمین هەرمانەنە دەربەننە کەرۊش ئەوەڵینشا ئینا ئەوەڵوو دەربەنینە جە تەرەفوو دزڵیێوە کە سەروو سەختیوە کەردەنش و داربەسش پەی بەستەن گردوو هەرمانەکاش وېش کەردێنێ، ڕۊستەمی ئاماژە پانەی کەرۆ کە بۆنەو خێرامای خەڵکیوە پەی ئەوەڵ هەرمانێش، دووەم هەرمانەیچش بۊنەو وەشەسیای خەڵکوو دەگاو دزڵیېوە پۍ هەرمانەکېش و زەریفی مەنتیقەکەی هەمان یاگېش هۊرچنیێنۆ.
ئۊسا خەلیلی ڕۊستەمی جە درېژەو قسەکاشەنە پېسە باس جە هەرمانەو میعماری هۊرامانی کەرۆ ،"شکڵوو هەرمانەکێ منیچ ئیسفاڎەم جە دەسووروو ئەوسای کەردەن، هەورامان ئۆسێ خاسێش بیێنێ و هەنێش و دیوارشا بە وشکەکەڵەک کەردەن و منیچ هەمان دەسوور هەرمانەکێم کەردێنە، منیچ بۆنەو ئانەیوە کە بیناسازیی هەورامانی جیان جە یاگەکای تەری ئینەمە کەرد، حەزم کەرد گۆشێوە جە بیناسازی و سەلێقەو هەورامییا نیشانەو خەڵکی بڎەو".
جە دمادمایی قسەکاشەنە ڕۊستەمی واتش، سپاسوو دەگاو دزڵیێ کەروو کە هامکارێ خاسۍ بیېنۍ پێم.
