جە بارەو هرووژمەکا حکومەتو دیمەشقی و چەتەکاشۆ پەی سەرو ئیدارەو ۋێڕاوەبەری، یاردیدەرو هامسەرۆکایەتی ئەنجومەنو ۋێڕاوەبەری حەسەن کۆچەر پەی ئاژانسیما قسێش کەردۍ.

یاردیدەرو هامسەرۆکایەتی ئەنجومەنو ۋێڕاوەبەری حەسەن کۆچەر جە قسەکاشەنە ئاماژەش پانەی کەرد کە دەوڵەتو تورکی هاندەر و پەشتیوانو هرووژمە چەکڎارییەکاو چەتەکان پەی سەرو دێرەزوری، کە جە ئاکامەنە چنڎین مەدەنیۍ گیانشا جە دەسدا.

درێژەو چەمپنەکۊتەکەو کۆچەری پی جۆرەنە؛

'ویستشا وەشکەردەی جەنگو بەینو کوردی و عەرەبیا'

کۆچەر جە سەرەتاو قسەکاشەنە باسی لەوەکرد ئا ڕێککۊتەیۍ کە دەوڵەتو تورکی چنی بڕۍ جە دەوڵەتا عەرەبی کەردێنێش، هرووژمکەردەیا پەی سەرو یۆبیەی بەینو کوردی و عەرەبی و پۊکەی پەنەوازا دژوو هرووژمەکا مردمېوە و واتش: "پەنەوازا شۆڕشو گەلوو ۋێما و سیستەمو دیموکراتیکی پارێزنمۍ. جە ئاکاموو ئا هرووژمانە چنین مەدەنیۍ گەشمەرڎۍ بیۍ، پېسە ئیدارەو ۋێڕاوەبەری سەرەوەشی ۋێما ئاراسەو بنەیانەو گەشمەرڎا مکەرمۍ و هیواو خاسبیەیۆی پەی زامڎارەکا موازمۍ. هرووژمەکۍ سەرو دێرەزوری جە ساڵەو پاریۆ دەسشا پنەکەردەن و جە ئێساڵیچەنە بەردەوامۍ بێنۍ. ئامانجوو ئی هرووژما وەشکەردەی پشێوییا جە بەینو پێکئاماو کورد و عەرەبینە جە هەرێمەکەنە ئینەیچ مەرامش وەشکەردەی ناسەقامگیرییا جە گرڎو بەش و پێگەکاو گلېرگەو هەرێمەکەینە. چی ڕوۆ هێزەکاو سوریای دیموکراتیکی (قەسەدە) پەی پارێزگاری جە گەلاو هەرێمەکەی جوابی پەنەوازش بۍ."

'هرووژمەکۍ ملانە خزمەتو دەوڵەتو تورکیوە'

جە بەردەوامی قسەکاشەنە کۆچەر ئاماژەس بە هرووژمەکا حکومەتو دیمەشقی کەرد و واتش: "بێگومان ئی هرووژمۍ بە هیچ جۊرۍ خزمەت بە حکومەتو شامی نمەکەرا، گرڎ ملانە خزمەتو دەوڵەتو تورکیوە. ئا کۆمکوژییەو سەرو دێرەزوری ئانەی بەروزۆ کە حکومەتو دیمەشقی نیا خزمەتو گەلوو سوریاینە. پۊکەی چی ڕووانگۆ حکومەتو دیمەشقی بیەن بە خزمەتکارو ئامانجەکاش دەوڵەتا جبەری بە تایبەت دەوڵەتو تورکی کە مەرامش وەشکەردەی پشێویۍ ۋەرفراوانە جە سوریانە. حەرپاسە ئا ڕێککۊتەیۍ چنی سوریا و عێراقی کەردێنێش گرڎ پەی دماییئارڎەین بەدەسکۊتەکا گەلوو کورڎی."

'زیڼنەکەردەیۆ نیم-عوسمانی ئامانجو دەوڵەتو تورکین'

جە بەردەوامی قسەکاشەنە کۆچەر باسش جە مەرامە ئەرەگیریەکا دەوڵەتوو تورکی کەرد پانەی پەی پێکئاورڎەی نیم-عوسمانییا و پی جۆرە بەردەوام بی جە قسکاش: "لەشکرکێشی دەوڵەتو تورکی پەی دلۍ خاکو سوریای، تەنیا مەبەس پەی دلێنەبەردەو کورڎی نیا بەڵکم پەی دلێنەبەردەی گرڎوو گەلا هەرێمەکەیا. جە سەردەمو عوسمانیەکانە ٢١ عەرەبۍ جە ٦و ئازارینە جە قەنارە دریۍ، پۊکەی ئا ڕووە پېسە ڕۊو گەشمەرڎا عەرەبی نامۍ بریۆ. گرڎو ئی کۊمکوژیایچە پەی یەک مەرامیا، ئاڎیچ زیڼەکەردەیۆ عوسمانی تازەین. جە عێراق و سوریانە ئەرەگیریەکێش دەسپنەکەردێنۍ. جیای ئانەی ئا دەوڵەتۍ دژو ئی ئەرەگیریە مرداوە، بەداخەوە موینمۍ ملا دلۍ ڕێککۆتەیۆ چنی دەوڵەتو تورکی. ئی پەیماننامۍ بە کوشتدای گەلین بەدەسو دەوڵەتی.

هرووژمەکۍ سەرو دێرەزوریچ جە چوارچێوەو ئا ڕێککۊتنامانە بیێنۍ، ڕەنگە بەنامۍ چەتەکاوە ئی هرووژمۍ کریێبا، بەڵام جە بنەمانە مەرامو ڕێککەوتننامەکان. پی هرووژمایچە مەرامش وەشکەردەی پشوێییا جە بەینو گەلوو کورڎی و عەرەبینە جە هەرێمەکەنە. پۊکەی هەڵوێسو گەلەکەیما، بە تایبەت گەلوو عەرەبی هەڵوێسشا ۋەرا ۋەر بە هرووژمەکا بەربڕی. کە جە حەقەتینەنە هەڵوێسێوە پێرۆزا. ئینەیچ یۆگێرتەی بەینو گەلا سەرنیشت و ۋەرکۊتوو سوریای بەروزۆ."

'کەس نمەتاوۆ دەسکۊتەکاما جە بەین بەرۆ'

جە دمادمایی قسەکاشەنە کۆچەر جەختش چانەی کەردۆ گرڎو مەرامو ڕاوەبەری خۆسەری پەی پارێزنای دەسکۊتەکان و واتش: "جە ئەرەکۊشایما بەردەوامۍ بیمۍ، زیاتەر یۆگێرتەیی بەینوو کوردی و عەرەبی پەرەپنەمڎەیمۍ. گرڎوو ڕێککۊتەیەکا دەوڵەتو تورکی پەی تێکدای بەینو گەلوو کورڎی و عەرەبیا پۊکەی پەنەوازا فرە عال سەرش مردمۍ. پېسە ئانەی وەڵتەرۍ کریان، گەرەکما بیەن چنی حکومەتو شامی، دەوڵەتو سوریای جە گفتوگۆنە بیمۍ، چونکی جەنگو ئێمە جەنگو حکومەتو شامی نیا. بەڵام گەر بەردەوامی بە هرووژمەکاشا بڎا ئانە جوابی تنتەرما مبۆ. ئانەی دێرەزورەنە کەردما پارېزنای ڕەوا بۍ. پېسە سیستەمو ۋێڕاوەبەری پارێزگاری جە ۋێما مکەرمۍ. هیچ کەسێ نمەتاوۆ دەسکۊتەکاما جە بەین بەرۆ."