گەریلاو هەپەگەی کەمال پیر جە ١١ەمین ساڵیاڎوو کۊکوشی پاریسینە پۍ ئاژانسوو هەواڵوو فورات (ANF)ی قسېش کەردۍ.جە سەرەتاو قسەکاشەنە، سارا، ڕۆژبینە و ڕوناهیەش بە ڕێزۆ یاڎکەردېوە و واتش: " هەڤاڵا سارا، ڕۆژبینە و ڕوناهیە گرڎوو ژیۋایشا دژوو ستەمی کۊشیۍ، ۋەروو ئینەی دەوڵەتوو تورکی جە ۋەران ۋەروو هامڕایامانە کۊکوشیش ئەنجامدا. هامڕا سارا جە دەسپنەکەردەو ئاخێزیوە حەتا ڕۊو گەشمەرڎەبیەیش کۊشیای گەورەش وەڕاوە بەرد. گەشمەرڎەبیەیش ئێشۍ گۊرەبۍ پۍ گەلی. ئی ئێشە فاڕیا پۍ توڕەبیەی، دەوڵەتوو تورکی مشۊم باجوو ئی کۊکوشیە بڎۆ.

گەشمەرڎەبیەو هامڕاکاما جە ویرمەکەرمۍ، هەڤاڵ سارا یووە جە سەرمەشقا پەکەکەی بۍ، یووە بۍ جە ئەرەمەرزنەرا. هەڤاڵ سارا زینڎانەنە ئەشکەنجەی فرەش وینا، بەڵام مدرامانی گەورەش نیشانەدا، حیچ وەختۍ تەسلیمە نەبیە و سەرەش نەنامنارە. هامڕا سارا بە مدرامانوو وېش ئەرمانای کلتوروو کوردی کەرۍ. جە کولتوروو کوردانە وۍ چەمنایۆ وەران وەر بە دوژمنی نیا، ئەگەر پێویس بۆ گەشمەرڎۍ بیمۍ بەڵام کڕنوش مەبەرمۍ، چونکی دوژمنی عال مشناسمۍ. ڕاسی ۋېما و دوژمنی عال مشناسمۍ. پۊکاتی مدرامانوو هامڕا سارۍ مدرامانی ئاسایی نیا.

'بە میراتوو هەڤاڵ سارێوە بەردەوامۍ بیمۍ جە کۊشیای'

کەمال پیر ، ساکینە جانسزە جە ژیۋایشەنە جەنگێوە گۊرەش کەرڎ و واتش: "هەڤاڵ سارا خوڎاو ئازاڎیی ئێمەنە.  جە کتێبەکەشەنە ماچۆ 'گرڎوو ژیۋایم هەر جەنگ بۍ' بە گرڎوو ژیۋایش جەنگش کەرڎ. هەڤاڵ سارا نەک بە تەنیا وەران وەر بە دوژمنی گژیۍ، بەڵکم وەرن وەر بە خودوو ۋېچش جە کۊشیېوە گەورەنە بۍ. پا مەعنۍ هەڤاڵ سارا سەرەتاو کۊشیایش وەران وەر بە خودوو ۋېش دەسپنەکەرڎ. هامڕا سارا گرڎ وەختۍ هامڕێوە و سەرمەشقۍ عالەبۍ. گەشمەرڎەبیەو هامڕا سارۍ پاسەش پنەکەردیمۍ خەبات و کۊشیایما بەقووەتتەر و گەورەتەر کەرمۍ.

وەختۍ یەرۍ هامڕێما گەشمەرڎۍ بیۍ، گەلوو کوردی و ئانۍ ئێمە ئشناسېنۍ ئێششا چەشت. دەوڵەتوو تورکی جە وەڵینگۆ تا ئیسەیچ  وەران وەر بە گەلوو کوردی کۊکوشی کەرۆ. دوژمن گەرەکشا گەلوو کوردی دلېنەبەرۆ، پۊکەی بە درێژایی ساڵا هجوم کەرۆ. هەڤاڵ سارا وەران وەر پی هجوما کۊشیای گەورەش ئەنجامدا، هەڤاڵ سارا بەجەستە چنیما نیەنە، بەڵام بە میراتوو ئاڎۍ مدرامان کەرمۍ، بە کۊشیای ئاڎۍ کۊشیایما بەردەوام کەرمۍ. حەتا حەقەو هامڕاکاما کەرمېوە بەردەوامۍ بیمۍ جە کۊشیای.