گەریلاکاو یەژا ستاری سۆزدار ئامارا و زیلان کۆبانێ بۆنەو ساڵوەگەڕو شەهادەتو یۆ جە فەرماندە سەرمەشقەکا پەکەکەی، بێریتان (گوڵناز کاراتاش)ێوە پەی ئاژانسەکەیما ئاژانسوو فوراتی قسێشا کەرڎۍ.

گەریلۍ یەژا ستاری سۆزدار ئامارا جە کەسایەتی گەشمەرڎە بێریتانێنە گرڎو گەشمەرڎا ئەرەکۆشای ئازادیش یاڎۍ کەردێوە و واتش: "گەشمەرڎە بێریتانە جە دژو خیانەتکارا و عەقڵیەتو دەسەڵاتداری ئەرەکۆشای بێهامتاش ڕاوەبەرکەرڎ. بۆنەو دۆزەکەیشۆ گیانش بەخشا. بە هەزاران گەریلۍ کە سەرو هێڵۆو ئەرەکۆشای ئاڎیی هەنگامەشا هۆرگێرتێنە، پەی کورڎەسانێوە ئازادی جەنگشا کەرڎ و گەشمەرڎۍ بیۍ، ئارۆیچەنە بە هەمان ڕۆحیەتۆ پېسە گەریلاکاو ئازادی کورڎەسانی جە گرڎو سەنگەرەکانە جەنگ مکەرمۍ.

دۆڵەت بە هرووژمەکاش گەرەکشا ئیرادەما بماڕۆ. هەڵوێسمان، ئەرەکۆشایما و مڎرامانما گرڎو هرووژمەکا ماڕۆنە.، گەریلایا ژەنۍ پەی ئازادی گەلەکەیشا، پەی ژیۋایۍ بەحورمەتی ۋێشا فیدا مکەرا. گرڎو ئینیشایچ دەرەنجامو ڕەنج و ئەرەکۆشای گەشمەرڎە بێریتانێن. جە ئیساتێنە جە هەرێمەکاو پارێزنای مەدیاینە مڎرامانۍ گۆرە هەن. گەریلا جە دژو دژمنی بە مۆراڵ و ئیراڎێوە گۆرۆ جەنگ مکەرا. پەی ئازادی جەسەیی ڕابەر ئاپۆی ئەرەکۆشایما بەردەوام مکەرمۍ.

چی کاتەنە ئەرک و دەورۍ گرنگ ئینا ئەستۆمانە. هەرپۆکەی پەی بەدەسئاوردەی ئامانجەکاما ئینایمۍ دلۍ ژیۋای و جەنگینە. جە مەڕەکا جەنگینە جە دژو گرڎ جۆرە تەکنیک و چەکێوە کیمیاوی قەڎەغەکریای مڎرامانێوە بێهامتا هەن. تەنگەتاو بیەی دۆڵەتو تورکی چی جەنگەنە بەماناو مەڕیایشا جە ۋەرا ۋەرو مڎرامانەکا گەریلاینە."

'ئینایمۍ سەرو هێڵۆو بێریتانێوە'

گەریلۍ یەژا ستاری زیلان کۆبانێ ئاماژەش پانەی دا کە گەشمەرڎە بێریتانە دژ بە خاینی نۆکەری ئەرەکۆشا و واتش: "ئا هێڵۆو مڎرامانیە کە گەشمەرڎە بێریتانۍ خوڵقنا سەرهۆرداین جە دژو خیانەتکارا. پېسە گەریلاکاو یەژا ستاری پا هێز و مۆراڵۆ جە سەنگەرەکانە جە دژو دژمنی جەنگ مکەرمۍ. پېسە ژەنێوە سەربەرزێنمۍ کە هەمڕا بێریتانۍ بە بنەماو ۋێما هۆرگێرمۍ و سەرو هێڵۆو ئاڎۍ هەنگامە منیەیمۍ. جەمۍ جە هەڤاڵا سەرو ڕاو هەڤاڵ بێریتانۍ چالاکی فیدایشا کەرد. گرنگا هێڵۆو بێریتانۍ بکەرمۍ بە بنەماو ئەرەکۆشایما و خاوەنداریش ۋنە بکەرمۍ. ئارۆنە ژەنی جە گرڎ مېڎانێنە ئینۍ ئەرەکۆشاینە، ئینەیچ فرە گرنگا و ئامانجما مسۆگەرکەردەی ئازادی جەسەی ڕابەر ئاپۆین."