دماو هرووژمەکا سەرو ۋەرنیشتی و سەرنیشتو-ۋەرکۊتوو سوریای، جە هێڵۊو حەڵەب عەفرین- شەهبایۆ بەسەڎان کۆچبەرۍ یاوۍ ئا ناوەندا جە لایەنو ئیدارەو ۋێڕاوەبەریوە ئاماڎۍ کریێنۍ.
سەرسەعبو ئارۊی بە سەڎان کۆچبەرۍ جە شارو حەڵەبی و کانتۆنو عەفرین – شەهبایۆ یاوۍ کانتۆنو رەقای.
کۆچبەرا چا ناوەندانە کە ئیدارەو ۋێڕاوەبەری ئاماڎەش کەردێبێنۍ، ئەرەنیشتۍ مکریا.
ژوورو قەیرانەکا ئیدارەو ۋێڕاوەبەری دیموکراتیکی جە کانتۆنو رەقای هێزی (٢ۍ کانوونو یووەمی) ئەرەیاۋنابێش کە ئاماڎێنۍ پەی پێشوازی جە کۆچبەراو حەڵەبی و کانتۆنو عەفرین-شەهبای.
جە چوارچێوەو ئاماڎەکارییەکانە ١٠ ۋەننگۍ ئاماڎۍ کریێنۍ و جە ساحەو بەلەدیچنە دلۍ شارو رەقاینە خێمۍ هۆرۍ دریێنۍ. چا شۆنانە پەنەوازیەکۍ ۋۍ گەرمکەردەیۆ، واردەی و تەندروسی مەیسەرۍ کریێنۍ.
یاگەگیرو هامسەرۆکو دەسەو کاروبارو کۆمەڵایەتی و هەرمان و کارو کانتۆنو رەقای منەوەر ئەلمەجید باسش چانەی کەرڎ کە ژوورو قەیرانەکا گرڎو پەنەوازیەکا ئەرەنیشتا حەڵەبی و شەهبای مەیسەر مکەرۆ و گرڎو ئەرەمەرزیایەکایچ ئینۍ ئاماڎەباشینە.
ڕۆشنیچش کەرڎۆ، ١٠ خێمۍ گۆرۍ، تەلارێوە و ١٠ وەننگۍ بە واردەی و واردەیۆ و یاگۍ و ڕای پەنەوازە ئاماڎۍ کریێنۍ.
ئەرەنیشتاو رەقەیچ ملا هاناو کۆچبەراوە و چا بارۆ منەوەر ئەلمەجی واتش، "یووەمجار نییا کە ئەرەنیشتا رەقای هامکاری پێشکەش بە کۆچبەرا مکەرا، وەڵتەریچ چڼین جارۍ لوێنۍ هاناو ئا کەساوە کە ئاوارۍ کانتۆنەکەیشا بیێنۍ".
