دلێ ڕاینە چێوێ بەڵاجەویێ گنێنێ وەراچەمما. پەی من تازەگیشا نەبێ بەڵام مەژگوو زاڕۆڵا نەڪێشێ و یاگێ پەرسێ بێ پەیشا. پەرسێنێ و ئێمەیچ بە پاو زاناییما جوابشا دێنمێوە.
زیارەتەڵانما ڕەدٚ ڪەرد و یاوایمێ مەڵاحەمەدٚان. دارە وەزێوی کزۆڵە سەروو ڕاڪێماوە بە لاشەی نیمەگیانش سەرەنجما ڪێشاش لاو وێش. وەختێو تەماشاو لاشەی قرۆڵیش ڪەرێنی یۆ گنێوە ویروو داستانەو (شەنگول و مەنگوولی) کە دلێ لەموو وەرگەڪەیشا پەڕ ڪەردەبێ تەوەنی تا دەرسش بدٚا. بەڵام ئاسمان تا زەمین ئی پەڕوە ڪەردایە چەنی پەڕوەڪەردەو قرۆڵوو وەزەڪێ جیاوازیش بێ. بە تەوەنی سافێ دلێ زامە قووڵەڪەیش چنیەبێشاوە تا وەرگەو بێ‌ ڕحمیاو ڕۆزگاری گێرۆ. چن ساڵێ چیوەڵ وێم بە چەماو وێم دیەم بێ پا قرۆڵیشوە جە سێوەروو چەترێش بێبەشش نەڪەردێبێنمێ و  جە پاییزیچەنە نە سمۆرە و باخەوان و نە ڕاویاری جە بەهرەیش بێ‌نەسیب نەڪەرێ. گێرە پا زامە قووڵەشوە چن دانە باخەوانێ ئاویشا دایبۆ و ساڵ بە ساڵ حەر ڪامشا دانێو تەوەنیش چنیێ بۆ دلێ دڵە زامدٚارەڪەیش. زانێنا حەتا ئەگەر وای ناحەزیچ ڕەحمش پەنە نەڪەرۆ، ڕێخێش هێقمێنێ و بە ئاوەزەنی تازه دڵوو ڕاویاری و باخەوانی گەش ڪەرۆوە و سمورەێ وەش سیمای وزۆە سەما.
ئەلحەق ئەگەر یۆ سەرەنجوو ئی چێوا بدٚوو و بە ساڪاری لاشانە نەویەرۆ، فرەتەر ڕۆحش چەنی ڪارەڪەو گەردوونی تێڪەڵ بۆ و سۆجدەو شوڪری بە یاگێ مارۆ.
بە خیاڵوو وێما جە پەرساو زاڕۆڵا ڕزگارێ بیێبێنمێ. ڕاما بڕیە و مەڵاحەمەدٚانما جیا ئاست و جادٚەی قەمچ و پێچما دا سەر تا یاوەیمێ داخان. ئا مەحەلێ نزیڪ بە دە هەوارا بۆ. هامسای پێوەرە و مڵڪێشا هام‌ بڕێ. حەتا زاڕۆڵەی دوە ساڵشا مزانۆ حەریموو یانە هامسای چێشا و پەی یۆوی حورمەت منیارە. هیچ‌ڪام خەسار نمەدٚا باخ و باخاتی و ماڵوو هەنترینی بە دڵ پارێزنا. 
چن میترێ لوایمێ. نەختێو سەر و وارش بێ. هانێوە وەش، ئاوی چیایش چەنە ئێرە دلێ ڕۆخانەی. چن زاڕۆڵێ بە دەبەئاوێ سەروو هانەیشا گێرتەبێ.  چەمشا ڪەوت بە ئێمە واچێنی ڪەسێوی عەزیزشا جە سەفەر ئامەنوە. وەشنیم چەنی ڪەردێ و بە دڵە پاڪە بێگەردەڪەشاوە پێسەو ژەرەژەو لا شەتاوی ڪەوتێ وەنای و دەسێشا بە نیەتوو خێرئامای ئێمە، پێسەو باڵوو فریشتەی وازێ ڪەردێ و بە خوەی شیرینشاوە ڕوانەشا ڪەردێمێ. 
یاوەیمێ دەرەقووڵ ڪە هەواروو تایفێویەن. چاگەنە واڵە و برا و مامۆ‌ مامۆژەن گردی نزیڪ بە یۆی پێوەرە ژیوایشا مدٚا سەر و چەنی خەم و خەفەتوو ڕۆزگاری  ساچا و خەمشا خەموو یۆین و وەشیەڪاشانە شەریڪێنێ. گرد وەختێو پێسەو پەنجەو دەسی پاڵپەشتی هەنترینی ڪەرا و مازی خەفەتاشا ماڕا...
شاڪەڵەڪێوە گەورەشا ڪەراخوو ڕۆخانەیەنە چنیەبێ. زانێنا هینوو چن ساڵێ چیوەڵین و ئا ڪەسە بنەڕەتەش نیان دەسش جە دنیای کوڵ بیەن بەڵام ئا هەرمانێشە بیێنە وەشتەرین خەڵاتی و پەڕچین، هەم پەی لافاوێ و هەم سەنگەرێوی گەورە پەی ئا دار نەماما ڪە وەڵتەر نریێنێ دلێ خاڪی و ئیسە بیێنێ بە ڪۆنەدار و یار و یاوەروو پەلەوەری و پەڕچین و حەسار پەی باخەوانی تازەی ڪە بە میراس یاوان دەسش. 
بەڵام گجاریو دڵوو وێمەنە واچێنا، داخۆم ئەگەر ئی باخەوانە تازە پەنە یاوا، بێ‌ڕحمێوە ڪەرۆ بە دار و چڵیش، ڕۆحوو ئا ڪەسیە ڪە ئاودٚانش ڪەردەن و ئیسە دەسش دنیای بڕیان نەچڵەڪیۆرە؟!

درێژەش هەن...

نویستەی/ خانم شەریفی
سەرچەمە/ کاناڵەو ئەنجۆمەنو ڕۆجیاری