هێزەکاو پەدەکەی سەر سنوورەنە دەسشا بە جموجۆڵی کەرد
هێزەکاو پەدەکەی کە جە ماوەکا وییەردەینە چێروو نامۍ پاسەوانوو سنووری عێراقینە جە مەنتیقە سنوورییەکاو شێلادزێنە بنەشا وستێبۍ، جە سەرسەعبوو ئارۆیۆ دەسشا بە جموجۆڵی کەردەن.
بە پاو هەواڵێوە رۆژ نیوزی، سەرسەعبوو ئارۊی هێزەکاو پەدەکەی جە سنووروو شیلادزێ سەر بە مەنتیقەو ئامێدىنە جە پارێزگاو دهۆکی جموجوڵى سەروازیشا دەسپنەکەردەن.
ئاماژە پانەیچ کریان هێزەکاو پەدەکەی جە یەرۍ مەنتیقۍ سنووروو شیلادزێنە نزیک بە کەشوو گارەینە بنەشا وستێنە.
ئانەیچ جە وەختێنە، جە ماوەکا وییەردەینە بەشێوە فرەو هێزەکاش چێروو نامۍ پاسەوانوو سنوورىنە جە سنووروو عێراق و تورکیاینە جە مەنتیقەو بایدانینە یاگەگیرۍ کەردۍ.
ئینەیچ هاموەختا چنی بەردەوامی ئاماڎەکارییەکا دەوڵەتوو تورکی پۍ ئەنجامدای هجومێوە تازەی ئەرەگیری پۍ سەروو هەڕێموو کوردسانی و جە هجوومەکا وەڵتەرینە پەدەکە هامکاروو دەوڵەتوو تورکی بیەن.
