دماو رێککۆتەیەکەو ئەنقەرەی یوەم هرووژمی خائینانەی ڕسمی بە تیرۆرکەردەیی دووۍ رۆنامەوانا ژەنۍ ئەنجامدریا. دۆڵەتو تورکی و پەدەکە نمەتاوا ئانەی پەرڎەپۆش بکەرا. نمەتاوا ئەرەیاۋنای ئازاڎی کپ بکەرا، گەلوو کورڎی ۋنەپەرسایۆ چانەی مکەرۆ.
کورڎەسانە جەنگێوە پا جۆرە ملۆڕاوە کە ئەخلاق، یاسا، پەیماننامە و رێسا گەرڎوونییەکۍ چنەشەنە پاشێلۍ مکریا. چڼین ساڵێن جە زیڼانو ئیمراڵینە رابەرو گەلوو کورڎی عەبدوڵا ئۆجالان دلۍ سیستەموو گۆشەگیری و ئەشکەنجەی گۆرەینە راگیریان. جە دژوو پەکەکەی و ئا جەنگاوەرا رابەر ئاپۆی بە قوربانیدایۍ گۆرە خوڵقنێنێش، بە گرڎ ڕا و رێبازێوە، تەکنیکی جەنگی تایبەت هرووژم ئەنجام مڎریۆ. هامکات بە شێوەی کۆلۆنیالیستی، ئەشکەنجە و کۆمکوژی جە دژوو گەلوو کورڎی جەبگێوە هەمەلایەنە ئەنجام مڎریۆ. پەدەکە و حکومەتو بارزانیچ کۆتێنۍ خزمەتو ئا دۆڵەتیە.
ئۆباڵو گرڎوو تاوانەکا ئینۍ ملو پەدەکەینە
دۆڵەتو تورکی کۆلۆنیالیستی کە مزانۆ گەلوو کورڎی گەلێوە پا جۆرە نییا کە سەرە بنامنۆرە و جە ماوۍ کەمەنە بە هرووژمەکا شکسش پنەبۍ، پەی ماڕای ئیراڎەو گەلوو کورڎی پەدەکە و حکومەتو بارزانیش پېسە 'ئەسپی ترۆڤی' گرڎ کاتۍ وستەن وەڵۍ وێش. ئانەی گرڎ جارۍ بەشداریش جە سیاسەتو کوشتەی کوردانە بە دەسوو کوردا کەردەن پەدەکە بیەن. تەنیا پەدەکە و حکومەتو بارزانی متاوا پېسە مارێوە ژەعراوی پەلامارەو ۋنۍ، قەوم، زۋان، شناسنامە، نەتەوەی و خاکو ۋێش بڎۆ. ئارۆ فرە بە زەقی ئا دەورەشە گێرتەن ئەستۆ. پەی ئانەی سیخوڕی پەی دۆڵەتو تورکی بکەرۆ، پەی تیرۆرکەردەی رۆشنۋیرا، نویسەرا، سیاسەتمەدارا و خەباتکارا ئەرەیاۋنای زانیاری مڎۆ بە دۆڵەتو تورکی کۆلۆنیالیستی. جە سەرەتاو دەسپنەکەردەو لکنایۆ جە لایەنو دۆڵەتو تورکیوە ، پەدەکە جە ئاستی سەرەکینە ۋەرپەرسا.
نمەتاوا کۆمکوژیەکەی پەرڎەپۆش بکەرا
کاربەدەسا پەدەکەی بە هەڵوێسێوە کە جە متەی ۋنەو کوردانە پاگیری مکەرۆ، پەی ئانەی بتاوۆ ڕەوایی بە سیخوڕی پەی دۆڵەتو تورکی فاشیستی بڎۆ لوۍ ۋەرو پەیاشا و رێککۊتەیشا چنی ئیمزاکەرد. دماو ئا رێککۊتەیچە یوەم هرووژمی خائینانە جە ٢٣ۍ ئابو ٢٠٢٤ ینە بە تیرۆرکەردەی ٢ رۆنامەوانا ژەنۍ و زامڎارکەردەی شش خەباتکارا ئەرەیاۋنای، ئەنجامدریا. چەمڎاری و کۆکەردەیۆ زانیاری هەواڵگری ئا هرووژمەیە بە سەرکێشی پەدەکەی و پاراستنی ئەنجامدریا. ئا کۆمکوژیە ئاشکران کە بە رێبازو جەنگی تایبەتی دۆڵەتو تورکی و پەدەکەی نمەتاویۆ پەرڎەپۆش بکریۆ.
یۆ جە مەڵامەتەکا ئا کۆمکوژیەیە ئانەبۍ کە گەرەکشا بۍ دەنگو ئەرەیاۋنای ئازاڎیی کپ بکەرا و چەمتەرسنش بکەرا کە ئاستو کۆمکوژیەکا و رێککۆتەی چەپەڵیشا جە کورڎەسانەنە وزۆ ڕووە. مەڵامەتۍ تەریچ ئانەبۍ کە گەرەکشا بۍ گەلوو پانیشتوو کورڎەسانی، لایەنگراو دیموکراسی، ئەرەیاۋنکارا، سیاسەتمەدارا، نویسەرا و گرڎوو ئا کەسا کە خاوەن هەستو ۋەرپرسیاینۍ چەمتەرسن بکەرا. هەرپاسە پەی ئانەی بۍ کە دۆڵەتو تورکی بە مەڵامەتوو ئا سیخوڕیۆ بە پەدەکەی بواچۆ "ئافەرین". پەی ئافەرینێوە خیانەتش جە ڕێخەو کوردا کەرڎ، کۆمکوژی تورکیش بە ڕسمی کەرد. پەدەکە نکۆڵیش جە بیەو نەتەوەییش کەرد. خیانەت جە روو زانسی، باوەڕی و کۆمەڵایەتیوە بە هیچ جۆرێ پاساو هۊرگیر نییا. خیانەت ئینا جبەرو سروشتینە. ئینا جبەرو مرۆڤایەتینە، بۍ مانان. قەڵبتەری ڕاو سوکایەتیکەردەین بە ۋێش.
گەلوو کورڎی جە یاڎش نمەکەرۆ و چنەش وەش نمەبۆ
گەلوو کورڎی بە ئیراڎەو ۋێش و راسی ۋێش ۋنەپەرسای جە تیرۆرکەردەو ئا دووە کۆششکارە ناوازا ئەرەیاۋنای مکەرۆ. تاریخ حەجگیز خائینا جە یاڎ نمەکەرۆ، چنەشا وەش نمەبۆ و مەبەخشۆشا. گەلوو کورڎی ڕا نمەڎۆ ۋنەو رۆڵەکاش بە زایە بلۆ؛ خاوەنداری جە میراتی ئەرەیاۋنای ئازاڎیی مکەرۆ کە غوربەتلی ئەرسۆز، خەلیل داغ، عەلی کانیرۆژ و رۆسیدا مێردینە شۆنەو ۋێشارە جیاشا ئاست. کۆششکارا ئەرەیاۋنای ئازاڎیی حەقیقەتو گەلوو کورڎی گرڎ کاتۍ نیشانە مڎا.
