ڕاپیمای درێژ جە ٢١و کانوونو دووەمی جە شارو لۆرێنتی فەڕەنسای جە چوارچێوەو هەڵمەتۊو "ئازادی پەی عەبدوڵا ئۆجالانی، چارەسەری سیاسی پەی پرسو کورد"ینە دەسشپنەکریا، ئارۆ یاوا پاریس. ڕاپیماکەی بە شێوێوە جەماوەری ۋەردەمو مېیانو کولتووری ئەحمەد کایەینە بە گلېرۆبیەی بەردەوام بۍ.

چالاکا تا ۋەردەمو نوسینگەو ئەنفرۆماسیۆنی کوردەسانی، کە جە ٩و کانوونو دووەمو ٢٠٢٣ێنە هەر یەرە ژەنی شۆڕشگێڵنۍ کوردی؛ ساکینە جانسزە، فیدان دۆغانە و لەیلا شایەلمەزە چنەشەنە جە لایەنو میتو دۊڵەتو تورکیوە تیرۆرۍ کریۍ، ڕاپیمایشا کەرد.

چالاکا ۋەردەمو بیناو نوسینگەو ئەنفرۆماسیۆنو کوردەسانینە دماو نیایرەو چەپکە ولا، ئەرەیاۋنێوەشا ۋەناوە.

جە ئەرەیاۋناکەینە باس چانەی کریا پاریس پەی کوردا شارێوە سیمبولییا و وچیا: "جە پاریسنە دووۍ جارۍ کوردۍ تیرۆرۍ کریۍ. هامکات ئەنجامدای ئی چالاکییە پەی ۋنەپەرسایۆ چا کەسا هەڤاڵاکێماشا گەشمەرڎۍ کەردۍ. بۊنەو ئا ژەنە گەشمەرڎاوە ڕاپیمای مکەرمۍ."

دماو ۋەنایۆ ئەرەیاۋناکەی چالاکا تا وەردەمو کەنیسەی چەرمەی لووۍ. جە ڕاپیماکەینە وەڵاکریاوۍ بە زۋانی فەرەنسی دەربارەو مەرامو ڕاپیماکەیۆ وەڵاکریێوە.