جە ٤٤ وڵاتېوە زیاتەر جە هەزار کەسا دژو سزاو جە قەنارەدای کاروەدایشا نیشانەدا
جە ٤٤ وڵاتا جەهانیوە ١٢٠٠ کەسۍ دژو سزاو جە قەنارەدای سەرو پەخشان عزیزیۍ و وریشە مورادیێرە بانگەوازشا ئەرەیاۋنا.
کاروەدای و هەڵوێسەکۍ جە دژو سزاو جە قەنارەدای پەخشان عەزیزیۍ و وریشە مورادیۍ و زینانیا سیاسی تەری کە جە لایەنو دەسەڵاتدارا ئێرانیوە سزاو جە قەنارەدایشا سەرەرە سەپیان تا مۍ ئینا پەرە ئەساینە. هەر چا چوارچێوەنە جە لایەنو١٢٠٠ کەساوە جە ٤٤ وڵاتا جەهانیوە بەیاننامېوە پێشکەش بە زیاتەر جە ١٠٠ ڕێکوزیای و مېیانەکا تۆرەو مېیاننەتەوەیی فێمینیستی، گلېرگەی مەدەنی و مافو مرۆڤی کریان.
جە بەیاننامەکەنە ئامان،١٢٠٠ کەسۍ ئیمزا کەرۍ داواشا زیاتەر جە ١٠٠ ڕێکوزیایا فێمینیستی و تۆڕە مېیاننەتەوەیی و ئەرەمەرزیا جەهانییەکا کەرڎەن کە پێوەرە پەی دمایی ئارڎەی بە سزاو جە قەنارەدای دەس بە ئەوەکۊشای یۊگېرتانەی بکەرا.
هەرپاسە ئاماژە پانەی کریان کە ئاڎۍ داوا مکەرا فشار وزیۆ سەرو دەسەڵاتدارا ئێرانی پەی ئانەی دەموودەس سزاو جە قەنارەدای ئا دووە زینانییە سیاسییە کوردۍ، پەخشان عەزیزیە و وریشە مورادیۍ هۊرشېوناوە و ئازاڎۍ بکریا.
هەرپاسە جە بەیاننامەکەنە ئاماژە پانەی کریان کە ڕێکوزیاکۍ پارێزنەرا مافو ژەنا مشۊم گرڎ دەرفەتێوەشا پەی ۋنەپەرسایۆ جە ۋەرپەرسا ئێرانی سەبارەت بە ئامارەی مەترسیڎارۍ سزاو جە قەنارەدای ژەنا بەکار بارا.
بەشێوە چا کەسا ئیمزاشا سەرو بەیاننامەکەی کەرڎەن ئینێنۍ: گوڵروخ ئێرانیە، زەینەب جەلالیانە، نێرگس محەمەدیە، مەریەم سەدات یەحیاویە، حورا نیکبەختە، سەکینە پەروانە، موتەهار گۆییە و ویدا ڕەبانیەنۍ.
