جە هەڵەبجە جەژنەوارەو هەناری دەستش پنەکەرد و ٣ ڕوێ بەردەوامەن
جە هەڵەبجە بەبەشداری ٤٠٠ باغدارێ و دەستڕەنگینێ و بەرهەمئاوەرێ هەڵەبجەی، هەورامانی و شارەزوور-ی، ٦مین جەژنەوارەو (هەناری و پایزو هەڵەبجە-ی) دەستش پنەکەرد و ٣ ڕوێ بەردەوام مەبۆنە.
سەرسەبای ئارۆی سەعات ١٠:٠٠ بە وەختو هەرێمەکەی، جە شاری یاری هەڵەبجەی، ٦مین جەژنەوارەو (هەناری و پایزو هەڵەبجە-ی) دەستش پنەکەرد.
ڕێکوزێ و سەرپەرشتیارێ جەژنوارەکەی بە ئاژانسەکەیمان فوڕات نیوز (ANF)یشان وات: "٦مین جەژنەوارەو هەناری و پایزو هەڵەبجەی، ٣ ڕۆێ درێژەش مەبۆنە و جە میانشەنە ڕانماییە تەندروستییەکێ وەرچمێ گیریێنێ و وازیاریێنێ هاموڵاتیێ پابەدێشان ببانێ".
ڕێکوزێ وسەرپەرشتیارێ جەژنوارەکەی ئاشکراشان کەرد: "جە جەژنەوارەکەنە، زیاتەر جە ٤٠٠ باغدارێ و دەستڕەنگینێ و بەرهەمئاوەرێ جە هەڵەبجە، هەورامان و شارەزوور-ەوە بەشدارێنێ و بەرهەمێ کشتوکاڵیێ، باغداریێ، وێمانێ و پیشە دەستیەکێ وێشان نمایشێ مەکەرانێ".
ساڵانە چەنی دەستپنەکەردەی جەژنەوارەو هەناری و پایزو هەڵەبجەی، گەرموگوڕی مەگنونە بازارو شارەکەی و جە بواری ئابوریەنە باغدارێ و هیتیاری وبەرهەمئاوەرێ هەڵەبجەی و دەوروبەریش سوندمەندێ مەبانێ و بەشێ جە بەرهەمەکێ وێشان ساخێ مەکەرانێوە.
جە هەڵەبجە و هەورامان، نزیک بە ٩ هەزار دۆنمێ باغە هەنارێ هەنێ و ساڵانە زیاتەر جە ٢٥ هەزار تەنێ هەنارێ بەرهەم ماوەرانێ. هەنارێ هەڵەبجەی و هەورامانی بە کوالیتەتەرین جۆرێ هەناریەنێ جیهانەنە و نامبانگشان کوردستان و جیهانەرە وەڵاو بییەنەوە. جە هەڵەبجە و هەورامان چەنڎین جۆرێ هەنارێ بەتامێ و ئاودارێ بەرهەمێ ماوریانێ کە گرتەرینێشان ئینێنێ: (ساڵەخانی، مەلەسی، کەوە هەنار، مێوەش، تشە هەنار، لاسیاوە یان لاڕەشە).
جە هەڵەبجە و هەورامان، سەرەڕاو ئانەیە ساڵانە نزیک بە ٢٥ هەزار تەنێ هەنارێ بەرهەم مارویانێ، بەڵام حکومەت و دەسەڵاتدارێ و سەرمایەدارێ هەرێمو کوردستانی و ئێراقی گرنگیشان بە ناوچەکەی و هەناری نەڎان و تا ئیسە کارگا و سەردخانەی تایبەت بە هەناری ناوچەکەنە نییەن و بە ئا هۆکارە ساڵانە هەزاران تەنێ هەنارێ فەوتیانێ و یان تاڵان و هەرزان ورەشێ مەکریانێ.
خاوەن باغە هەنارەکێ داوا جە حکومەتەکێ هەرێمی و ئێراقی و سەرمایەدارێ ناوچەکەی و کوردستانی و ئێراقی مەکەرانێ، تا سەردخانێ و فابریکێ تایبەتێ بە هەناری جە ناوچەکەنە دروستێ بکەرانێ. هامکات هەوەڵ بڎانێ هەنارێ هەڵەبجەی و هەورامانێ ڕەوانێ وڵاتێ و بازارەکێ جیهانی بکریانێ و بە ئی تەوەرە ڕا جە زیانکەوتەی جە هەناری بگێریۆن و هەم هیتیارێ و خاوەن باغە هەنارەکێ، هەم هاموڵاتیێ و حکومەت و سەرمایەدارێ زیاتەر جە هەناری سودمەندێ ببانێ و هاموەختیچ مەبۆنە بە هاندەر پەی باغدارێ و هیتیارێ و هاموڵاتیێ تا زیاتەر گرنگی بە هەناری بەرهەمە وێمانەکان بڎانێ و جە بەرهەمی هاوردەی بیانی دوورێ بگانێوە.
