شارو کیلی ئەڵمانیاینە دژو هرووژمە ئەرەگیرییەکا دۆڵەتو تورکی پەی سەرو وەرنیشتی، گلێرۆبییەی ئەنجامدریا. دیفێندو کوردەسانی و ئەنجومەنو گەلو کوردی کیلەنە چالاکییەکەشا رێکوزتەبێ، کوردێ و دۆساشا بەشداریشا جە چالاکییەکەنە کەرد.
چالاکۍ کە جە هاوتبەنهوف پلاتزو کیلینە سەعات ١٥:٠٠ گلێربیێبێنێ، پەی یاڏکەردەی گەشمەرڏا ئازادی دەقێوە بە بێدەنگی مدرێ. گلێرۆبییەکەی جەلایەنو بنەیانەو گەشمەرڏە ئاندۆک جۆتکاری (کۆنستانتین گەدیگ) قسێ کریا. ئاندۆک جۆتکار ساڵەو ٢٠١٩نە جە هرووژمەکا دۆڵەتو تورکینە پەی سەرو وەرنیشتی جە سەڕێکانی گەشمەرڏەبیی.
ئەڏا و تاتەو جۆتکاری قسەکاشانە باسشا چانەیە کەرد، "جە سوریانە عەلەوی، دروزی، مەسیحی و کوردەکێچ کە جە وەرنیشتەنە ژیوا، جەلایەنو دۆڵەتو تورکی و چەتەکاشۆ کوشیانە. ئەوروپا و دۆڵەتا جەهانی جە وەراوەرو ئا کۆمکوژیانە بێدەنگێنێ. بەتایبەتی دۆڵەتو ئەڵمانیای بەردەواما جە ورەتەو چەکی بە تورکیای و پی جۆرە بۆ بە هامبەشو کۆمکوژییەکا. جە دژو ئا هرووژما کریا سەرو وەرنیشتی مشۆم وڵاتا وەرنیشتی بەتایبەت ئەڵمانیا بێدەنگی وێش ماڕۆنە، تورکیای دادگایی بکەرا و گرد هامکاری و ورەتێوە چەکی بە تورکیای مردنا".
بنەیانەکە ئانەشا وست ڕووە کە گەشمەرڏە ئاندۆک و هەمڕاکێش، پا چەکا کە بە تورکیای ورەشیێنێ، کوشیێنۍ و داواشا جە گرد کەسێ کەرد کە جە دژو ئەرەگیری و کۆمکوژییەکا دەنگ هۆربڕا.
بە درێژایی گلێرۆبییەکەی دروشمەکۍ "بژیوۆ سەرۆک ئاپۆ"، "بژیوۆ مڏرامان و وەرنیشتی"، "ژەنی، ژیوای، ئازادی"، "بژیوۆ مڏرامانو یەپەگە"ی و "بژیوۆ مڏرامان یەپەژەی" وچیێوە. چالاکیەکە بە پەیامو پەشتیوانی و هامسۆزی بەشداربییا دمایش ئاما.
