جە سەرانسەرو ۋەرکۆتوو کورڎسانی و ئێرانی چالاکی و نا ڕەزایی لوۋا ڕاۋە

مەراسېمو چوۋارشەممە سوری جە ئێران و ۋەرکۊتوو کورڎسانی فاڕیا پۍ ۋێنېشاندای و چالاکی و نا ڕەزایی دژوو دەسەڵاتی و پەیامو درێژەدای بە سەرھورداو" ژەنۍ، ژیای، ئازاڎیی" ئەرەیاۋیا.

شەۋەو یەرەشەممەی سەرو دماین چوۋارشەممەو ساڵەو کورڎی-ھەتاوی، جە ۋەرکۊتو کورڎسانی و ئێراننە بە چوۋارشەممە سوری ئەشناسیان و گرڎ ساڵۍ چا شەۋێنە خەڵک بە کەرڎەیۊ ئێری و گێڵنای زەماۋنۍ ئا بۊنەیە پېرۊز مکەرا، بەڵام ئێساڵ ئا شەۋۍ جېا جە ساڵانی ۋیەرڎەی پۍ سەرھوردای دژوو دەسەڵاتی فاڕیا.

سەرەڕاو گێرتەینە ۋەرو ڕەوشۍ تنی ئەمنی جە لایەنو دەسەڵاتیۊ پۍ ڕاگێرتەی جە لوۋای ڕاۋەو نا ڕەزایەتېەکا جە گرڎو شارەکاو پارێزگاکاو ۋەرکۊتوو کورڎسانی، جە ورمێۋە تا ئېلام، جۋانۍ بەکەرڎەیۊ ئێری و وستەیرەو جاڎەکا دژوو دەسەڵاتی دروشمێشا ۋاتێۋە.

بەپاو زانېاریەکا جە چن شارێۋەنە ڕوو ۋەڕوو بیەیۊ جە مابەینو ۋێنېشاندەراو ھێزەکاو دۊڵەتیەنە ڕوۋەشدان، چنڎېن جوۋانۍ گېریێنۍ و زامڎارۍ بېێنۍ.

سەرو ئاستو ئێرانېچ چنی پېرۊزکەرڎەو چوۋارشەممەی سوری، جە فرەو پارێزگاکانە، بەتایبەت گۊرە شارەکاو " تاران، مەشھەد، ئەسفەھان، شېراز، ئەھواز، زاھېدان"یەنە مەراسېمەکە فاڕیا پۍ ۋێنېشاندای دژوو دەسەڵاتی.

ۋێنېشاندەرۍ دژوو دەسەڵاتی و ۋەرپەرسا باڵاو حکومەتی دروشمێشا ۋاتێۋە و ئێرشا جە پۊستەرو ھێماکاو دۊڵەتی ۋەردا، حەرپاسە جەختشا جە درێژەدای بە سەرھۊرداو "ژەنۍ، ژیای، ئازاڎیی" تا یاۋای بە ئامانجەکاش کەرڎۊ.

جە بەشێۋە فرەو شارەکانە ۋەران ڕوو بیەیۊ جە مابەینو ۋێنېشاندەراو ھێزەکا دۊڵەتی ئاما ئاراۋەو جە ئاکامشەنە ژمارێۋە ۋێنېشاندەرۍ گېریۍ و ژمارێۋەیچ زامڎارۍ بیۍ.

بەپاو چڕیێۋە ۋەڵتەرو چالاکا، قەرارا ئارۊیچ ۋێنېشاندای و ناڕەزاییەکۍ بەشێۋێۋی سەران سەری بلاڕاۋە.

دماو گەشمەرڎە بېەو ژینا ئەمېنی جە ١٦ و ئەیلولو ٢٠٢٢ ۋێنېشانداو ناڕەزایی سەران سەرو ئێرانی و ۋەرکۊتو کورڎسانیش گێرتۊ و سەرەڕاو فشارەکا دۊڵەتی و کوشیاو ٥٠٠ ۋێنېشاندەرا و جە داردای ٤ ۋێنېشاندەرا، چالاکی و نا ڕەزاییەکۍ نزیک بە ٦ مانگان ۋەردەوامێنۍ.

ھ.ش