جە تەوێڵۍ ژمارێو وێبەخشێ خەڵات کریێ و ژمارێوی تەرێچ نیگەرانێنێ
جە تەوێڵۍ ژمارێو وێبەخشێ خەڵاتشان پنە بەخشیا و بەشێوی تەرێ جە وێبەخشەکان نیگەرانێنێ کە پەراوێزێ وزیێنێ و خەڵات نەکریێن و ناڕەزایەتی وێشان یاونان ڕاوەبەری ناحیەو بیارێ.
جە شارو تەوێڵۍ سەر بە هەورامانۆ لهۆنی، جە مەڕاسمێوەنە ژمارێو کناچێ و کوڕێ گەنجێ شارەکەی خەڵات کریێ کە جە ماوەی ویەردەنە وێبەخشانە کار و هەرمانەشان پەی خزمەتکەردەی و وشیارکەردەی گلێرگەیەی کەردێنە و بەتایبەتی جە دمای سەرهۆردای پەتا و نەوەشی کۆرۆنا (کۆڤید ١٩)ی جە؟ئا چوارچوەنە ژمارێو چالاکیێشان ئەنجامێ دێنی.
هاموەخت ژمارێو تەرێ جە وێبەخشەکێ تەوێڵۍ جە پەیوەندیێوەنە چەنی ئاژانسەکەیمان فوڕات نیوز ANFی، نیگەرانی وێشان جە ئا مەڕاسیمەیە نیشانەدا و گلەیێشان جە ڕێکوزێ مەڕاسیمەکەی کەردێ کە ئاڎێشان نادیدێ گێرتێنێ و وازیارێنێ جیاوازی جە میانو وێبەخشەکانە نەکریۆن.
ئا وێبەخشێ و مەواچانێ: ڕاستەن ئێمە وێبەخشانە و بەبێ وەرانوەر، هەرمانە و چالاکیێمان کەردێنی، بەڵام وەختێو کە بەشێو جە وێبەخشەکان خەڵات مەکریانێ و بەشێویچشان پەراوێزێ مەوزیانێ، وەش نییەن و یاگۍ نیگەرانییەن و ئێمە جەی بارەوە پەیووەندیمان بەڕاوەبەری ناحیەو بیارێ کەردەن و بڕیارەن جەنزیکتەرین کاتەنە چەنی ڕاوەبەرو بیارێ چەمپنەکەوتەی ئەنجام بڎێمێنە، چونکە ئا کەسێ کە خەڵات کریێنێ هیچکام نە وێبەخشێنێ و نە تەوێڵەیێ.
یاگۍ یاداوەرین، وەڵتەر ANF هەواڵش سەبارەت بە چالاکی ئا وێبەخشا تەوێڵۍ وەڵاوکەردەنەوە کە ئارۆ جە مەڕاسیمو خەڵات کەردەکەی نیگەرانێ و ناڕازیێنێ.
لینکو چالاکییەکەی:
